မဲခေါင်၊ ဇန်နဝါရီ ၇
မူဆယ်တွင် စစ်ကောင်စီ စစ်တပ်နှင့် ရဲတပ်ဖွဲ့များမှာ တရားမဝင်လုပ်ငန်းများမှ တစ်လ ကျပ်သိန်းတစ်သောင်းကျော် လိုင်းကြေးရနေပြီး ပြည်နယ်ရဲချုပ်ထံ တစ်လ သိန်းတစ်ထောင် လိုင်းကြေးပေးကာ တရားမဝင် လုပ်ငန်းများ လုပ်ကိုင်လည်ပတ်နေကြောင်း သတင်းရင်းမြစ်များထံမှ သိရသည်။
မူဆယ်မြို့တွင် ကျားဖြန့်ရုံ ၅၈ ရုံ၊ လောင်းကစား ၈၇ ရုံ၊ အနှိပ်ခန်း ၇၂ ခု၊ ပြည့်တန်ဆာရုံ အကြီး၃၉ရုံ၊ အသေး၅၉ ရုံနှင့် တရားမဝင် အပေါင်ဆိုင်လုပ်ငန်း ၄၃ ခု ရှိသည်ဟု ရဲတပ်ဖွဲ့နှင့် နီးစပ်သည့် သတင်းရင်းမြစ်ထံမှ သိရသည်။
ယင်းလုပ်ငန်းများကို ကျားဖြန့်ရုံအကြီး၊ အသေးပေါ် မူတည်ပြီး တစ်လ သိန်း ၆၀ မှ ၂၀၀၊ လောင်းကစားရုံကို သိန်း ၂၅ မှ သိန်း ၈၀၊ အနှိပ်ခန်း ၅ သိန်း၊ ပြည့်တန်ဆာခန်း ၁၅ သိန်း၊ အပေါင်ဆိုင် ၁၀ သိန်း စစ်ကောင်စီတပ်ဖွဲ့က ဆက်ကြေး ကောက်ခံနေသည်ဟု မဲခေါင်က ရရှိထားသည့် လိုင်းကြေး စာရင်းအရ သိရသည်။
“ပြည့်တန်ဆာရုံတွေဆို ကောင်းမူးလွယ်၊ ဟိုနား၊ စွမ်စော၊ ဆင်ဖြူဈေးနဲ့ ကားကြီးဝန်းမှာ အများဆုံးပဲ။ လိုင်းကြေး အနေနဲ့ ရပ်ကွက် အုပ်ချုပ်ရေးမှူးရုံးက စာရွက်စာတမ်းကြေး တစ်လ ၁၀ သိန်းနဲ့ အပိုင်နယ်ထိန်းကို တစ်လ ၁၅ သိန်း ပေးရတယ်”ဟု ဒေသခံ သတင်းရင်းမြစ်တစ်ဦးက ပြောသည်။
ထို့ကြောင့် မူဆယ်မြို့တွင် တရားမဝင် လုပ်ငန်းများထံမှ စစ်ကောင်စီ လိုင်းကြေးရရှိမှုမှာ တစ်လသိန်းတစ်သောင်းကျော် ရှိပြီး ယင်းအထဲမှ ရှမ်းပြည်၏ မြို့တော်၊ တောင်ကြီးမြို့ရှိ ပြည်နယ် ရဲမှူးချုပ်ကျော်ကျော်ဟန်ကို တစ်လ သိန်းတစ်ထောင် ခွဲတမ်းပို့ရသည်ဟု မူဆယ်ရဲတပ်ဖွဲ့နှင့် နီးစပ်သည့် သတင်းရင်းမြစ်တစ်ဦးက ဆိုသည်။
“ဒါတောင်မှ ဒီစာရင်းတွေက လိုင်းကြေးသွင်းပြီး လုပ်ရတဲ့ ဟာတွေပဲရှိတယ်။ တချို့ ပြည်သူ့စစ် ပိုင်တဲ့ဟာတွေဆို လိုင်းကြေးမသွင်းရဘဲ ကင်းလွတ်ခွင့် ရနေလို့ ဒီထဲ စာရင်းမပါတာလည်း ရှိသေးတယ်။ ဒါကို ကြည့်ပြီး ရဲတွေ မူဆယ်ကို ဘာလို့ တအား လာချင်ကြတာလဲ ဆိုတာ အဖြေ ပါပြီးသားပဲလေ။ တပ်ကြပ်နယ်ထိန်း တစ်ယောက်က သိန်း ၄/၅ ထောင်တန်တဲ့ အိမ်ကို ပိုင်တယ်ဆိုတာ ဒီလိုတွေ ရနေလို့ပါ” ဟု ၎င်းက ပြောသည်။
ယင်းသို့ လိုင်းကြေးရရှိမှု ငွေပမာဏများကြောင့် ရဲတပ်ဖွဲ့ အတွင်းတွင်လည်း အဝေမတည့်ကြကာ ပြီးခဲ့သည့် ဒီဇင်ဘာတွင် နယ်ထိန်း ရဲအုပ်ရဲနောင်နှင့် မြို့မစခန်းမှူး ဒုရဲမှူး နေဆန်းတို့ အပြန်အလှန် တိုင်ကြားခဲ့သေးကြောင်း သိရသည်။
မူဆယ်မြို့အတွင်းရှိ တရားမဝင် လုပ်ငန်းများသည် လကုန်ပြီး ၅ ရက်အတွင်း စစ်ကောင်စီတပ်ဖွဲ့၊ ရဲများနှင့် ဌာန ဆိုင်ရာများကို ဆက်ကြေး ပုံမှန်ပေးရပြီး မပေးသည့် ရုံများကို စစ်ကောင်စီတပ်က အကြောင်းအမျိုးမျိုးဖြင့် ဝင်ရောက် ဖမ်းဆီးလေ့ ရှိသည်ဟု လောင်းကစားရုံနှင့် နီးစပ်သူတစ်ဦးက ပြောသည်။
ပြည့်တန်ဆာလုပ်ငန်းများ၊ လောင်းကစားရုံများ၊ ကျားဖြန့်ရုံများတွင် ဝင်ရောက် လုပ်ကိုင်နေရသူ အချို့မှာ ပွဲစား အဆက်အသွယ် မှတစ်ဆင့် တရုတ်နိုင်ငံတွင် အလုပ်လုပ်ရန် လာရောက်ကြခြင်း ဖြစ်သော်လည်း အကြောင်း အမျိုးမျိုးကြောင့် တရုတ်နိုင်ငံဘက်လည်း မသွားရ၊ နေရပ်ပြန်ရန် စရိတ်လည်း မရှိသဖြင့် လုပ်ကိုင်ရသူများလည်း ရှိသည်။
ကျားဖြန့်ရုံ၊ လောင်းကစားရုံနှင့် ပြည့်တန်ဆာရုံများတွင် အလုပ်လုပ်သူများ၏ မှတ်ပုံတင် စသည့် အထောက်အထားများကို အလုပ်ရှင်သူဌေးက သိမ်းထားပြီး ထွက်ပြေးသူများကို ရုံလုံခြုံရေး ပြည်သူ့စစ်က ဖမ်းဆီး ရိုက်နှက်သည့်အပြင် သတ်ဖြတ်မှုများလည်း ရှိသည်ဟု သတင်းရင်းမြစ်များက ပြောသည်။
ရှမ်းပြည်မြောက်ပိုင်း မူဆယ်မြို့တွင် စစ်ကောင်စီတပ်နှင့် ပြည်သူ့စစ်အဖွဲ့ များစွာရှိပြီး မူးယစ်ဆေးဝါး၊ လောင်းကစားဝိုင်း၊ ကျားဖြန့်ရုံ၊ ပြည့်တန်ဆာရုံများ များပြားလွန်းသဖြင့် ခိုးမှု၊ ဓားပြတိုက်မှု၊ လုယက်မှု၊ ပြန်ပေးဆွဲမှုများ မကြာခဏ ဖြစ်ပွားနေသည်။
#MeKongNews
#မူဆယ်
#စစ်ကောင်စီတပ်
#ပြည်နယ်ရဲချုပ်
#လိုင်းကြေး
#တရားမဝင်
