မဲခေါင်၊ ဇန်နဝါရီ ၅
ဗင်နီဇွဲလား ခေါင်းဆောင် နီကိုးလပ်စ်မာဒူရိုကို ဖမ်းဆီးရန် သမ္မတ ဒေါ်နယ်ထရမ့်၏ ဆုံးဖြတ်ချက်သည် မာဒူရို မရှိတော့သည့် နောက်ပိုင်း အမေရိကန် ရေနံကုမ္ပဏီများအတွက် လုပ်ငန်းသဘောတူညီချက်များ ပိုမိုလွယ်ကူစေရန် ရည်ရွယ်ခြင်းဖြစ်သည်ဟူသော ပြောဆိုချက်များကို အမေရိကန် နိုင်ငံခြားရေးဝန်ကြီး မာကိုရူဘီယိုက ယနေ့တွင် ပယ်ချလိုက်သည်။
CBS ၏ “Face the Nation” အစီအစဉ်တွင် ရေနံကုမ္ပဏီများကို မျက်နှာသာပေးရန် ယခုကဲ့သို့ လုပ်ဆောင်ခဲ့ခြင်း ဟုတ်၊ မဟုတ်မေးမြန်းရာ “အခု ဖြစ်ပျက်ခဲ့တာကတော့ ကျနော်တို့ဟာ မူးယစ်ဆေး မှောင်ခိုသမားတစ်ဦးကို ဖမ်းဆီးခဲ့တာဖြစ်ပြီး၊ သူဟာ ကျနော်တို့ ပြည်သူတွေအပေါ် ၁၅ နှစ်ကြာ ကျူးလွန်ခဲ့တဲ့ ရာဇ၀တ်မှုတွေ အတွက် အမေရိကန်မှာ တရားရင်ဆိုင်ရတော့မှာ ဖြစ်ပါတယ်” ဟု ရူဘီယိုက ဖြေကြားခဲ့သည်။
“ရေနံနဲ့ပတ်သက်ပြီး ပြောရရင်တော့ ဗင်နီဇွဲလားရဲ့ ရေနံလုပ်ငန်းဟာ လုံးဝကို ပျက်စီးနေပါပြီ။ သူတို့နိုင်ငံနဲ့ ပြည်သူတွေအတွက် ကြွယ်ဝချမ်းသာမှုတွေ အများကြီး ဖန်တီးပေးခဲ့တဲ့ ရေနံတွင်းတွေ အားလုံးဟာ ပျက်စီးကုန်ပါပြီ။ အဲဒါတွေက ဟောင်းနွမ်း ဆွေးမြည့်နေပြီး ဘဏ္ဍာရေးအရလည်း ဒေဝါလီခံနေရပါပြီ” ဟု ၎င်းက ဆိုသည်။
“အဲဒီလုပ်ငန်းတွေမှာ ပြန်လည် ရင်းနှီးမြှုပ်နှံဖို့ လိုအပ်နေတာကတော့ သိသာထင်ရှားပါတယ်။ သူတို့မှာ အဲဒီလုပ်ငန်းကို ပြန်လည် ထူထောင်နိုင်တဲ့ လုပ်ဆောင်နိုင်စွမ်း မရှိတော့ဘူး။ အာမခံချက်နဲ့ လုပ်ငန်းအခြေအနေ အချို့ အောက်မှာသာ ရင်းနှီးမြှုပ်နှံမယ့် ပုဂ္ဂလိက ကုမ္ပဏီတွေဆီက ရင်းနှီးမြှုပ်နှံမှုတွေ သူတို့ လိုအပ်နေပါတယ်” ဟု ၎င်းက ဆက်လက်ပြောကြားခဲ့သည်။
ABC ၏ “This Week” အစီအစဉ်တွင်မူ ၎င်းအနေဖြင့် ရေနံကုမ္ပဏီများနှင့် တိုက်ရိုက် ဆက်သွယ်ပြောဆိုခြင်း မရှိသေးသော်လည်း၊ ထိုကုမ္ပဏီများနှင့် ဆက်သွယ် ဆောင်ရွက်မည့် ပြည်ထဲရေးဝန်ကြီးဌာနနှင့် စွမ်းအင်ဝန်ကြီးဌာန ဝန်ကြီးများနှင့် စကားပြောဆိုထားကြောင်း ရူဘီယိုက ပြောကြားခဲ့သည်။
ထို့ပြင် အနောက်နိုင်ငံကုမ္ပဏီများနှင့် ရုရှားနှင့်တရုတ်မဟုတ်သော ကုမ္ပဏီများထံမှ အကြီးအကျယ် စိတ်ဝင်စားမှုများ ရှိလာလိမ့်မည်ဟု ၎င်းက ခန့်မှန်းထားသည်။
“အမေရိကန် ပင်လယ်ကွေ့ ကမ်းရိုးတန်းက ကျနော်တို့ရဲ့ ရေနံချက်စက်ရုံတွေဟာ ဒီလို ရေနံစိမ်း တွေကို ချက်လုပ်တဲ့နေရာမှာ အကောင်းဆုံးတွေပါ။ ပြီးတော့ လက်ရှိ ကမ္ဘာတစ်ဝှမ်းမှာ ရေနံစိမ်း ပြတ်လပ်မှုတွေ ရှိနေတဲ့ အတွက်ကြောင့် အခွင့်အရေးနဲ့ နေရာပေးမယ်ဆိုရင် ပုဂ္ဂလိကလုပ်ငန်းတွေ ဘက်ကနေ အလွန်အမင်း ဝယ်လိုအားနဲ့ စိတ်ဝင်စားမှုတွေ ရှိလာလိမ့်မယ်လို့ ကျနော် ထင်ပါတယ်” ဟု ရူဘီယိုက ဆိုသည်။
Ref: CNN
#MeKongNews
#မာဒူရို
#ဖမ်းဆီး
#ရေနံ
#ရူဘီယို
