မဲခေါင်၊ ဇန်နဝါရီ ၄
ဗင်နီဇွဲလားမြို့တော် ကာရာကက်စ်မှ အမေရိကန် တပ်ဖွဲ့ဝင်များ၏ ဖမ်းဆီး ခေါ်ဆောင်သွားခြင်း ခံရပြီးနောက် လက်ရှိတွင် အမေရိကန်၌ ထိန်းသိမ်းခံထားရသည့် ဗင်နီဇွဲလားသမ္မတ နီကိုးလပ်စ် မာဒူရိုနှင့် ၎င်း၏ဇနီးဖြစ်သူတို့ကို ချက်ချင်း ပြန်လွှတ်ပေးရန် တရုတ်နိုင်ငံက ယနေ့တွင် တောင်းဆိုလိုက်သည်။
“သမ္မတ မာဂျုရိုနဲ့ ၎င်းရဲ့ဇနီးတို့ရဲ့ ကိုယ်ရေးကိုယ်တာ လုံခြုံမှုကို အာမခံပေးဖို့၊ သူတို့ကို ချက်ချင်း ပြန်လွှတ်ပေးဖို့၊ ဗင်နီဇွဲလားအစိုးရကို ဖြုတ်ချဖို့ ကြိုးပမ်းနေမှုတွေကို ရပ်တန့်ဖို့နဲ့ ဒီပြဿနာကိုတွေ့ဆုံဆွေးနွေး အဖြေရှာတဲ့ နည်းလမ်းနဲ့ ဖြေရှင်းဖို့ အမေရိကန်ကို တရုတ်နိုင်ငံက တောင်းဆိုပါတယ်” ဟု တရုတ် နိုင်ငံခြားရေးဝန်ကြီးဌာန၏ ထုတ်ပြန်ချက်တွင် ဖော်ပြထားသည်။
အချုပ်အခြာအာဏာပိုင် နိုင်ငံတစ်နိုင်ငံနှင့် ယင်းနိုင်ငံ၏ သမ္မတအပေါ် အမေရိကန်ပြည်ထောင်စု၏ ပြောင်ပြောင်တင်းတင်း အင်အားသုံး လုပ်ဆောင်ချက်အပေါ် တရုတ်နိုင်ငံအနေဖြင့် အလွန်အမင်း တုန်လှုပ်မိသလို ပြင်းထန်စွာ ရှုတ်ချကြောင်း ဗင်နီဇွဲလားတွင် လုပ်ဆောင်ခဲ့သော အမေရိကန်၏ စစ်ဆင်ရေးအပြီး ယမန်နေ့တွင် တရုတ် နိုင်ငံခြားရေးဝန်ကြီးဌာနက ထုတ်ပြန်ခဲ့သေးသည်။
အမေရိကန်၏ ယခုကဲ့သို့ ဗိုလ်ကျစိုးမိုးသည့် လုပ်ရပ်များမှာ နိုင်ငံတကာဥပဒေနှင့် ဗင်နီဇွဲလားနိုင်ငံ၏ အချုပ်အခြာ အာဏာကို ပြင်းထန်စွာ ချိုးဖောက်နေပြီး လက်တင်အမေရိကနှင့် ကာရစ်ဘီယံဒေသ၏ ငြိမ်းချမ်းရေးနှင့် လုံခြုံရေးကို ခြိမ်းခြောက်နေသဖြင့် တရုတ်နိုင်ငံအနေဖြင့် ယင်းလုပ်ရပ်ကို ပြတ်ပြတ်သားသား ဆန့်ကျင်ကြောင်းလည်း ထုတ်ပြန်ချက်က ဆိုသည်။
အမေရိကန်အနေဖြင့် နိုင်ငံတကာဥပဒေများ၊ ကုလသမဂ္ဂ ပဋိညာဉ်စာတမ်းပါ ရည်ရွယ်ချက်နှင့် အခြေခံမူများကို လိုက်နာရန်နှင့် အခြားနိုင်ငံများ၏ အချုပ်အခြာအာဏာနှင့် လုံခြုံရေးကို ချိုးဖောက်နေမှုများအား ရပ်တန့်ရန် တောင်းဆိုကြောင်း တရုတ်က ဆိုသည်။
ထို့အတူ အမေရိကန်၏ လုပ်ရပ်ကို နိုင်ငံတကာ ဓားပြတိုက်မှု ဟု ဗင်နီဇွဲလား၏ မိတ်ဖက် ရုရှားအစိုးရက ကင်ပွန်းတပ်ခဲ့ပြီး အချုပ်အခြာအာဏာပိုင် နိုင်ငံတစ်ခု၏ ခေါင်းဆောင်ကို အဓမ္မ ဖမ်းဆီးခြင်းသည် နိုင်ငံတကာ ဥပဒေအားလုံးကို ပြောင်ပြောင်တင်းတင်း ချိုးဖောက်ခြင်း ဖြစ်ကြောင်း ပြောကြားခဲ့သည်။
အမေရိကန်၏ လုပ်ရပ်သည် အန္တရာယ်ရှိသော လုပ်ရပ်ဖြစ်ပြီး ယင်းဖြစ်ရပ်ကြောင့် ဖြစ်ပေါ်လာမည့် နောက် ဆက်တွဲ အကျိုးဆက်များအတွက် အမေရိကန်တွင် လုံးဝ တာဝန်ရှိသည်ဟု ရုရှားနိုင်ငံခြားရေး ဝန်ကြီးဌာနက သတိပေးထားသည်။
ထို့ပြင် ယင်းကိစ္စနှင့် ပတ်သက်၍ ကုလသမဂ္ဂ လုံခြုံရေးကောင်စီ တွင် အရေးပေါ် အစည်းအဝေး ခေါ်ယူရန် ရုရှားက ချက်ချင်း တောင်းဆိုထားပြီး အမေရိကန်၏ တရားမဝင် ကျူးကျော်မှုကို ကမ္ဘာက သိအောင် လုပ်ဆောင်မည်ဟု ရုရှားသံအမတ်က ပြောကြားခဲ့သည်။
Ref: CNN
#MeKongNews
#မာဂျုရို
#ပြန်လွှတ်
#တရုတ်
#တောင်းဆို
