မဲခေါင်၊ ဒီဇင်ဘာ ၃၁

ရှမ်းပြည်မြောက်ပိုင်းရှိ၊ မြို့နယ် ၄ ခု၌ ကလေးငယ် ၁၀၀ တွင် ၂၃ ဦးခန့်သာ ကျောင်းပညာ သင်ယူနိုင်သည်ဟု “ဝ” လူငယ်အသံက ပြုလုပ်သည့် စစ်တမ်းတစ်ခုတွင် ဖော်ပြသည်။

စစ်တမ်းတွင် ဖော်ပြချက်အရ ကွမ်းလုံ၊ ဟိုပန်၊ ပန်လုံ၊ တန့်ယန်းမြို့နယ် ၄ ခုအတွင်းတွင် ကလေး ငယ်၂၃ ဒသမ ၁၆ ရာခိုင်နှုန်းသာ အစိုးရ သို့မဟုတ် ပုဂ္ဂလိက တရားဝင် ကျောင်းတက် ရောက်နေကြပြီး ၂ ဒသမ ၁၂ ရာခိုင်နှုန်းသော ကလေးငယ်များသည် ကျေးရွာရပ်ကွက် အခြေပြု သင်ကြားရေး စင်တာများတွင် တက်ရောက်နေကြသည်။

ထို့ပြင် အဆိုပါ မြို့နယ်လေးခုတွင် ကလေးအများစုသည် မြန်မာအစိုးရ ကျောင်းထက် တရုတ်ကျောင်းကို တက်ရောက်သူ ပိုများပြားလာသည်ကိုလည်း သိသိသာသာ တွေ့ရှိရသည်ဟု “ဝ” လူငယ်အသံက ပြောသည်၊

“မိဘတွေ အများစုက တရုတ်ဘာသာ စကားကျွမ်းကျင်မှုဟာ အနာဂတ်မှာ အလုပ်အကိုင် အခွင့်အလမ်းကောင်း ပိုမိုရရှိစေနိုင်တယ်လို့ ယုံကြည်ကြပြီး အထူးသဖြင့် တရုတ်နိုင်ငံနဲ့ နယ်စပ်ချင်း ထိစပ်နေတဲ့ ဒေသတွေမှာ ပိုမိုတွေ့ ရှိလာရပါတယ်။”ဟု “ဝ” လူငယ်အသံမှ တာဝန်ရှိသူတဦးကပြောသည်။

လက်နက်ကိုင် ပဋိပက္ခဒဏ်သင့် ဒေသများတွင် မြန်မာအစိုးရ ပညာရေးကို ရေးတတ်၊ ဖတ်တတ်ရုံသာ တက်ရောက်ကြကာ အုပ်ချုပ်သူ အပြောင်းအလဲ ကာလကြား ပညာရေး ကမောက်ကမ ဖြစ်လာမှုကြောင့် ရေရှည်ဘဝအတွက် အလုပ်အကိုင် အာမခံချက်ရှိသည့် တရုတ်ကျောင်းကိုသာ ကလေးများက သင်ယူလာကြခြင်း ဖြစ်သည်ဟု စစ်တမ်း အစီရင်ခံစာတွင် ဖော်ပြသည်။

“ဒီအခြေအနေတွေကို တိုင်းရင်းသား လက်နက်ကိုင် ထိန်းချုပ် နယ်မြေတွေမှာ အများဆုံး တွေ့လာရပါတယ်”ဟု “ဝ” လူငယ်အသံ တာဝန်ရှိသူတစ်ဦးက ပြောသည်။

ထို့ပြင် ပြီးခဲ့သည့် ၁၂ လအတွင်း လက်နက်ကိုင် အဖွဲ့များက ကလေးများအား စစ်သား စုဆောင်းခြင်း သို့မဟုတ် စု ဆောင်းရန် ကြိုးပမ်းခြင်းများ ရှိခဲ့ကြောင်း စစ်တမ်းတွင်ပါဝင်သူ ၁၅ ရာခိုင်နှုန်းကျော်က ဖြေဆိုခဲ့ကြသည်။

“ပဋိပက္ခတွေကြောင့် ပညာရေးစနစ်တွေ ပြိုလဲတဲ့အခါ ကလေးတွေဟာ ခေါင်းပုံဖြတ်ခံရခြင်းနဲ့ အကြမ်းဖက်ခံရခြင်း အန္တရာယ်ပို မြင့်တက်လာနေပါတယ်။ ပညာရေးကို ကာကွယ် စောင့်ရှောက်ခြင်းဟာ ကလေးတွေကို ကာကွယ် စောင့်ရှောက်ခြင်းပါပဲ။ ပညာရေးဟာ ရွေးချယ်စရာ တစ်ခု မဟုတ်ပါဘူး။ ဒါဟာ ပဋိပက္ခတွေ ကြားထဲမှာ တောင် ရသင့်ရထိုက်တဲ့ အခြေခံ အခွင့်အရေးတစ်ရပ်ပဲ ဖြစ်တယ်”ဟု “ဝ” လူငယ်အသံမှ တာဝန်ရှိသူ တစ်ဦးက ပြောသည်။

ယခုစစ်တမ်းကို “ဝ” လူငယ်အသံက နိုဝင်ဘာလတွင် ပြုလုပ်ခဲ့ခြင်း ဖြစ်ပြီး မြို့နယ် ၄ ခုအတွင်းရှိ မိဘ၊ ကျောင်းသား ကျောင်းသူ၊ ဆရာ၊ ဆရာမနှင့် ဒေသခံ ရပ်မိရပ်ဖ ၁၀၀ ခန့်ကို မေးမြန်းကာ စစ်တမ်း ကောက်ယူခဲ့ခြင်း ဖြစ် သည်။

#MeKongNews
#ရှမ်းမြောက်
#ပညာ
#သင်ကြား
#ရှမ်းပြည်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)