မဲခေါင်၊ ဒီဇင်ဘာ ၃၀
ရုရှားသမ္မတ ဗလာဒီမာပူတင်၏ နေအိမ်တစ်လုံးကို ယူကရိန်းက ဒရုန်းများဖြင့် တိုက်ခိုက်ခဲ့သည်ဆိုသော ရုရှားတို့၏ စွပ်စွဲမှုကို ယူကရိန်းသမ္မတ ဗိုလိုဒီမာဇီလန်စကီးက ငြင်းဆိုလိုက်ပြီး ငြိမ်းချမ်းရေး ဆွေးနွေးမှုများကို လမ်းလွဲအောင် မော်စကိုက လုပ်နေသည်ဟု ပြောသည်။
ရုရှားနိုင်ငံ၊ အနောက်မြောက်ပိုင်း နော့ဗ်ဂိုရော့ဒေသရှိ ပူတင်၏ နိုင်ငံတော်နေအိမ် တစ်လုံးကို ဒရုန်း ၉၁ စီးဖြင့် ယမန်နေ့ညတွင် ယူကရိန်းက တိုက်ခိုက်ခဲ့သည်ဟု ရုရှားနိုင်ငံခြားရေးဝန်ကြီး ဆာဂေးလက်ဗ်ရော့က ဆိုသည်။
ပူတင်၏နေအိမ်ဆီသို့ ပစ်လွှတ်လိုက်သည်ဆိုသော ဒရုန်း ၉၁ စီးစလုံးကို ကြားဖြတ်ပစ်ချခဲ့ကာ ရုရှား၏ လေကြောင်းရန် ကာကွယ်ရေးစနစ်များက ဖျက်ဆီးပစ်ခဲ့သည်ဟု အင်စတာဂရမ်ပေါ်မှ ထုတ်ပြန်ချက်တွင် လက်ဗ်ရော့က ဆိုသည်။
ယင်းတိုက်ခိုက်မှုကြောင့် ဒဏ်ရာရခြင်း ၊ ပျက်စီးမှုများ မဖြစ်ခဲ့ကြောင်း ၎င်းက ဆက်ပြောသည်။
ယင်းနှင့်အတူ ငြိမ်းချမ်းရေးဆွေးနွေးပွဲမှ ၎င်းတို့၏ အနေအထားကို ပြန်လည်သုံးသပ်သွားမည်ဟု ရုရှားကပြောသည်။
“နိုင်ငံတော် အကြမ်းဖက်မှုဝါဒဆီ ကူးပြောင်းသွားတဲ့ အပြစ်သား ကိဗ်အစိုးရရဲ့ နောက်ဆုံးပြိုကွဲမှုကို ထောက်ရှုရရင် ရုရှားရဲ့ ညှိနှိုင်းဆွေးနွေးမှု အနေအထားကို ပြန်သုံးသပ်ရလိမ့်မယ်” ဟု ၎င်းက ဆိုသည်။
ရုရှားကစွပ်စွဲထားသော တိုက်ခိုက်မှု ဖြစ်ချိန်၌ ပူတင် မည်သည့်နေရာတွင် ရှိနေသည်မှာ ရှင်းရှင်းလင်းလင်း မရှိပေ။
ထိုပြောဆိုမှုများမှာ ယူကရိန်းကို ဆက်လက် တိုက်ခိုက်နိုင်ရေး အကြောင်းပြချက်တစ်ခု ကရင်မလင်ကပေးရန် ရည်ရွယ်ထားသော ရုရှားတို့၏ ထုံးစံ လိမ်ညာမှုများ ဖြစ်ကြောင်း ဇီလန်စကီးက ပယ် ချပြောဆိုသည်။
“ အခုအချိန်မှာ ကမ္ဘာကြီးက နှုတ်ဆိတ်မနေဖို့ အရေးကြီးပါတယ်။ ရေရှည်ငြိမ်းချမ်းရေး ရရှိနိုင်မယ့်အလုပ်ကို အားနည်းသွားအောင် ရုရှားက လုပ်ဆောင်မှာကို ကျွန်တော်တို့ ခွင့်မပြုနိုင်ပါဘူး” ဟု ၎င်းက X လူမှုကွန်ရက်တွင် ပြောသည်။
သို့ရာတွင် အမေရိကန်နှင့် ညှိနှိုင်းဆွေးနွေးမှု လုပ်ငန်းစဉ်မှ ထွက်ခွာသွားရန် ရုရှားက မရည်ရွယ်ကြောင်း လက်ဗ်ရော့က ဆက်လက် ပြောကြားခဲ့ကြောင်း ရုရှားအစိုးရ တာ့စ် သတင်းဌာနက ဖော်ပြသည်။
အမေရိကန်သမ္မတ ထရမ့်နှင့် ယူကရိန်းသမ္မတ ဇီလန်စကီးတို့ နှစ်ဦး စစ်ပွဲအဆုံးသတ်နိုင်ရန် ပြန်ပြင်ထားသော ငြိမ်းချမ်းရေး အစီအစဉ်တစ်ရပ်ကို အမေရိကန်နိုင်ငံ၊ ဖလော်ရီဒါပြည်နယ်တွင် တနင်္ဂနွေနေ့က ဆွေးနွေးခဲ့ကြပြီးနောက် မော်စကို၏ ယင်းပြောကြားမှုများ ထွက်လာခြင်း ဖြစ်သည်။
စစ်ပွဲကို ၂၀၂၆ ခုနှစ်တွင် အဆုံးသတ်နိုင်ဖွယ်ရှိကြောင်း ဖလော်ရီဒါတွေ့ဆုံပွဲ အပြီးတွင် ယူကရိန်းသမ္မတက ဖောက်စ်သတင်းဌာနကို ပြောကြားခဲ့သည်။
အေးကျော်
Ref: BBC
#MeKongNews
#ပူတင်နေအိမ်
#ဒရုန်း
#ယူကရိန်း
#ငြင်းဆို
