မဲခေါင်၊ ဒီဇင်ဘာ ၃၀
ထိုင်းနိုင်ငံနှင့် ဒီဇင်ဘာ ၂၇ ရက် အပစ်အခတ်ရပ်စဲမှုသည် နယ်မြေများနှင့် ကိုယ့်ကိုယ်ကိုယ် ကာကွယ်ပိုင်ခွင့်ကို စွန့်လွှတ်ခြင်းဟု မဆိုလိုကြောင်း ကမ္ဘောဒီးယားဝန်ကြီးချုပ် ဟွန်မာနက်က ပြောသည်။
ကမ္ဘောဒီးယားက ငြိမ်းချမ်းရေးလမ်းစဉ်ကို လိုက်နာနေချိန်မှာပင် မိမိကိုယ်ကိုယ် ကာကွယ်ပိုင်ခွင့်ကိုလည်း ထိန်းသိမ်းထားသည်ဟု ဟွန်မာနက်က ပြောကြားပြီး အပစ်အခတ် ရပ်စဲမှုအရ ကမ္ဘောဒီးယားက ထိုင်းဆီ နယ်မြေ များ ဆုံးရှုံးသွားနိုင်သည် ဆိုသော ပြည်သူများ၏ စိုးရိမ်မှုများကို လျော့ပါးစေခဲ့သည်ဟု ဖနွမ်းပင်ပို့စ်က ဖော်ပြသည်။
“ကမ္ဘောဒီးယားက ငြိမ်းချမ်းရေးလမ်းကြောင်းကို လိုက်နာနေပါတယ်။ ပြည်သူတွေရဲ့ အသက်အိုးအိမ်နဲ့ သာယာဝပြောမှုကို အားလုံးထက် ဦးစားပေးနေပါတယ်” ဟွန်မာနက်က ပြောသည်။
ထိုင်းနှင့် ကမ္ဘောဒီးယားက ဒီဇင်ဘာ ၂၇ ရက်တွင် ချက်ခြင်း အပစ်အခတ် ရပ်စဲရန် ပူးတွဲ ကြေညာချက်တစ်ရပ် ထုတ်ပြန်ခဲ့ကာ နှစ်ဖက်စလုံးမှ တပ်ဖွဲ့များသည်လည်း တိုက်ခိုက်မှုများ ရပ်တန့်သွားသည့် နေရာတွင်သာ ဆက်ရှိနေရမည်ဟု သတင်းက ဖော်ပြသည်။
ကမ္ဘောဒီးယာက ဆက်လက် တိုက်ပွဲ ဝင်နိုင်သော်လည်း ပဋိပက္ခကို ဆက်လက် ရှည်ကြာအောင် လုပ်ခြင်းက လုံးဝ အကျိုးမရှိကြောင်း၊ အထူးသဖြင့် နိုင်ငံငယ်လေးအနေဖြင့် အကျိုးမရှိဟု ဟွန်မာနက်က ဆက်လက် ပြောကြားခဲ့သည်။
ပြည်သူလူထုအတွက် ဒုက္ခရောက်မှု၊ နာကျင်မှုများ အနည်းဆုံးဖြစ်စေရန် တိုက်ခိုက်မှုများ ပို၍ ကျယ်ပြန့်မလာခင် ရပ်တန့်သွားရန် ညှိနှိုင်းဆွေးနွေးမှု လမ်းကြောင်းကို အစိုးရက ရွေးချယ်ခဲ့ခြင်း ဖြစ်သည်ဟု ဟွန်မာနက်အား ကိုးကား၍ သတင်းက ဆိုသည်။
တိုက်ခိုက်မှုများကို ရပ်တန့်ခြင်းမှာ စစ်သားများ၊ ရဲတပ်ဖွဲ့များနှင့် အရပ်သားများကြား အသက်သွေးချွေးဖြင့် ပေးဆပ်ရမှုများနှင့် ထိခိုက်ဒဏ်ရာ ရခြင်းများကို ရပ်တန့်သွားစေရန် ဖြစ်ကြောင်း ဟွန်မာနက်က ပြောသည်။
“စစ်ပွဲကို စစ်ပွဲနဲ့ မရပ်တန့်နိုင်ပါဘူး” ဟု ၎င်းက ဆိုသည်။
ပြီးခဲ့သည့် တိုက်ပွဲများကြောင့် ကမ္ဘောဒီးယား အရပ်သား ၃၂ ဦး သေဆုံးပြီး ၉၃ ဦး ဒဏ်ရာရခဲ့ကြောင်း သတင်းက ဆက်လက် ဖော်ပြသည်။
အေးကျော်
Ref: The Nation
#MeKongNews
#အပစ်ရပ်
#ကမ္ဘောဒီးယား
#စွန့်လွှတ်
#ဟွန်မာနက်
