မဲခေါင်၊ ဒီဇင်ဘာ ၂၉
မြောက်ကိုရီးယား ခေါင်းဆောင် ကင်ဂျုံအန်သည် ယမန်နေ့က တာဝေးပစ် မဟာဗျူဟာမြောက် ပစ်မှတ်ရှာ ဒုံးကျည်များ ပစ်လွှတ်မှုကို ကြီးကြပ်ခဲ့ပြီး လုံခြုံရေးရာ ခြိမ်းခြောက်မှုများ ရင်ဆိုင်လာခဲ့ရပါက တန်ပြန်တိုက်ခိုက်ရန် အသင့်ဖြစ်မှုနှင့် ၎င်းတို့၏ နျူကလီးယား အင်အားကို ထိုပစ်လွှတ်မှုများက အတည်ပြုခဲ့ကြောင်း မြောက်ကိုရီးယား အစိုးရသတင်းဌာန KCNA က ယနေ့ ဖော်ပြသည်။
၂၀၂၆ ခုနှစ်စောစောပိုင်းတွင် ကျင်းပမည်ဟု မျှော်လင့်ထားသော အဓိက ပါတီညီလာခံ မတိုင်မီ နိုင်ငံ၏ စစ်ရေးနှင့် စီးပွားရေးတိုးတက်မှုကို မီးမောင်းထိုးပြရန် မကြာသေးမီ သီတင်းပတ်များတွင် ကင်ဂျုံအန်က လှုပ်ရှားမှု အများအပြားတက်ရောက်ခဲ့ကာ ယခု ဒုံးကျည်ပစ်လွှတ်မှုလည်း ပါဝင်လာခဲ့ခြင်းဖြစ်သည်။
ကိုရီးယားကျွန်းဆွယ် အနောက်ဘက် ပင်လယ်သို့ ဒုံးကျည်များ ပျံသန်းသွားပြီး ပစ်မှတ်များကို ထိမှန်သွားခဲ့ချိန်တွင် ကင်ဂျုံအန်က အားရကျေနပ်မှု ပြသခဲ့သည်ဟု KCNA သတင်းက ဖော်ပြသည်။
မြောက်ကိုရီးယားနိုင်ငံက လုံခြုံရေး ခြိမ်းခြောက်မှု အမျိုးမျိုးကို ရင်ဆိုင်နေရသဖြင့် နိုင်ငံမှ နျူကလီးယား ဟန့်တား မှု အစိတ်အပိုင်းများ၏ မြန်ဆန်သော တုံ့ပြန်မှုနှင့် ယုံကြည်စိတ်ချရမှုကို ပုံမှန် စစ်ဆေးနေခြင်းသည် တာဝန်သိသော လေ့ကျင့်မှုဖြစ်သည်ဟု ကင်ဂျုံအန်က ပြောကြားခဲ့သည်။
နျုကလီးယားတိုက်ပွဲဝင် တပ်ဖွဲ့ အကန့်အသတ်မဲ့ ဖွံ့ဖြိုးတိုးတက်ရေးအတွက် မဆုတ်မနစ် ကြိုးပမ်း အားထုတ် သွားရေးကိုလည်း ကင်ဂျုံအန်က ထပ်မံ အတည်ပြုခဲ့ကြောင်း KCNA သတင်းက ဖော်ပြသည်။
ယမန်နေ့ နံနက် ၈ နာရီခန့်က ပြုံယမ်းမြို့အနီး ဆူနန်ဧရိယာမှ ခရုဇ်ဒုံးကျည် အများအပြား ပစ်လွှတ်မှုများကို ထောက်လှမ်း သိရှိခဲ့သည်ဟု တောင်ကိုရီးယားစစ်ဦးစီးချုပ်ရုံးက ယနေ့ ထုတ်ပြန်ပြောကြားသည်။
နျူကလီးယား စွမ်းအင်သုံး ရေငုပ်သင်္ဘော တည်ဆောက်ရန် ဆက်လက် ကြိုးပမ်းမှုများ အပါအဝင် ပြီးခဲ့သည့် သီတင်းပတ်အတွင်း မြောက်ကိုရီးယားက လုပ်ဆောင်ခဲ့သော စစ်ရေးလှုပ်ရှားမှုများသည် ကိုရီးယား ကျွန်းဆွယ် ငြိမ်းချမ်း တည်ငြိမ်ရေးကို အားနည်းသွားစေသည့် လုပ်ရပ်များဖြစ်ကြောင်း တောင်ကိုရီးယား ကာကွယ်ရေးဝန် ကြီးဌာန ပြောခွင့်ရသူတစ်ဦးက ဆိုသည်။
ယမန်နေ့က စမ်းသပ်မှုသည် သမားရိုးကျ လက်နက်နှင့် နျူကလီးယား လက်နက်များကိုပါ သယ်ဆောင်နိုင်သော ခရုဇ် ဒုံးကျည်များကို အဆင့်မြှင့်တင်၍ စမ်းသပ်ခြင်း ဖြစ်နိုင်ကြောင်း ဆိုးလ်မြို့မှ အမျိုးသား ပြန်လည် ပေါင်းစည်းရေး ကိုရီးယားအင်စတီကျူမှ မြောက်ကိုရီးယားအရေး ကျွမ်းကျင်သူ ဟောင်မင်းက သုံးသပ်သည်။
အေးကျော်
Reuters
#MeKongNews
#ခရုဇ်ဒုံးကျည်
#မြောက်ကိုရီးယား
#ပစ်လွှတ်မှု
#ကင်ဂျုံအန်
