မဲခေါင်၊ ဒီဇင်ဘာ ၂၇
UWSA ထိန်းချုပ်ရာ “ဝ”ဒေသ၊ ဟိုပန်မြို့တွင် လူသတ်မှု ကျူးလွန်သူ အမျိုးသားတစ်ဦးကို UWSA တရားစီရင်ရေးဌာနက သေဒဏ် ချမှတ်ခဲ့ကြောင်း ဒေသတွင်းမီဒီယာ Wa News Land က ယနေ့ ဖော်ပြသည်။
ယနေ့ ဒီဇင်ဘာ ၂၇ ရက် နံနက် ၈ နာရီ ကျော်တွင် ယင်းပြစ်ဒဏ်ချမှုကို ဟိုပန်မြို့ယဥ်ကျေးမှုကွင်းတွင် ဒေသခံများ ရှေ့မှောက်၌ ပြုလုပ်ခဲ့ကြောင်း သိရသည်။
ဟိုပန်မြို့တွင် အလုပ်လာလုပ်သူ မိုင်းမော၊ ပန်ကွဲကျေးရွာမှ မောင်ကျော်လွင် ခေါ် ကိုလှ ၃၅ နှစ်နှင့် ကျောက်မဲခရိုင်၊ နောင်ချိုမြို့နယ်၊ ကံကြီးအုပ်စု လက်ပံကုန်းရွာမှ တစ်ခန်းတည်းအတူနေ စိုင်းအောင်လင်းဦး ၂၄ နှစ်တို့ အချင်းချင်း စကားများပြီး စိုင်းအောင်လင်းဦးမှ မောင်ကျော်လွင်ကို သေသည်အထိ ကျုးလွန်ခဲ့ခြင်း ဖြစ်ကြောင်းသိရသည်။
“စိုင်းအောင်လင်းဦးက နဂိုလောင်းကစားလုပ်လို့ အကြွေးတင်နေတာ၊ ဆေးသုံးတော့ ဆေးကြောင်နေတာလည်း ပါတယ်။ စကားအချေအတင် များကြရင်း တူနဲ့ခေါင်းကို သေတဲ့ထိ ရိုက်လိုက်တာ”ဟု နီးစပ်သူများက ပြောကြားကြောင်း သတင်းက ဖော်ပြသည်။
လူသတ်မှု ကျူးလွန်ပြီးနောက် စိုင်းအောင်လင်းဦးက မောင်ကျော်လွင်၏ vivo တံဆိပ် လက်ကိုင်ဖုန်း နှင့်အတူ ဖုန်းကာဗာနောက်ရှိ တရုတ်ငွေ ၁၅၀ ယွမ်ကိုယူပြီး လောင်းကစားရုံကို ထပ်သွားခဲ့သည်ဟု ဆိုသည်။
ယင်းပြစ်မှုကို “ဝ” ပြည်နယ် အခြေခံဥပဒေ ရာဇဝတ်မှုဆိုင်ရာဥပဒေ အခန်း (၄) အရ “နိုင်ငံသား၏ ပုဂ္ဂိုလ်ရေးဆိုင်ရာ အခွင့်အရေးများနှင့် ဒီမိုကရေစီအခွင့် အရေးများကို ချိုးဖောက်ခြင်းဆိုင်ရာ ပြစ်မှု၊ ပုဒ်မ (၁၉၁) – ရည်ရွယ်ချက်ရှိရှိ လူသတ်မှုအရ သက်သေ အထောက်အထား ခိုင်လုံသောကြောင့် ပြစ်မှု အထမြောက်ကြောင်း သတ်မှတ်ခဲ့ပါသည်။”ဟု UWSA က ဆိုသည်။
စုံစမ်းစစ်ဆေးမှုများကို အဆင့်ဆင့် အစီရင်ခံပြီးနောက် “ဝ” ပြည် သွေးစည်း ညီညွတ်ရေးပါတီ ဗဟိုကော်မတီက တရားခံ စိုင်းအောင်လင်းဦးကို ရည်ရွယ်ချက်ရှိရှိ လူသတ်မှုဖြင့် သေဒဏ်ချမှတ်ခဲ့ကြောင်း သတင်းက ဆိုသည်။
#MeKongNews
#စကားများ
#လူသတ်မှု
#UWSA
#သေဒဏ်
