မဲခေါင်၊ ဒီဇင်ဘာ ၂၆

တောင်ကြီးမြို့အပါအဝင် ရှမ်းတောင်ရှိ ပင်လောင်း၊ အောင်ပန်း၊ ကလော စသည့် မြို့များ၌ ချယ်ရီပန်းများ ခူးရောင်းနေမှုကို သဘာဝပတ်ဝန်းကျင် ထိန်းသိမ်းသူများနှင့် ချယ်ရီပန်းချစ်သူများက ကန့်ကွက်နေကြသည်။

ရှမ်းပြည် သင်္ကေတ ချယ်ရီပန်းများသည် ဆောင်းတွင်း ကာလမှသာ ဖူးပွင့်ကြပြီး ခူးဆွတ်လိုက်လျှင် တစ်ရက်မျှသာခံသည့် ပန်းအမျိုးအစား ဖြစ်သဖြင့် အပင်တွင်သာ သဘာဝအတိုင်း ထားသည်က ပိုမိုလှပ၊ သက်တမ်းရှည်သဖြင့် ကန့်ကွက်နေကြခြင်း ဖြစ်ကြောင်း ချယ်ရီချစ်သူများထံမှ သိရသည်။

“ချယ်ရီပန်းဆိုတာ ရှမ်းပြည် ဂုဏ်ဆောင်ပန်းပါ၊ မခူးဖို့ မရောင်းဖို့ ပြောတာကို တောင်ပေါ်မှာ ဒီတိုင်း ပွင့်နေတဲ့ပန်းကို ဘာလို့ တားတာလဲဆိုပြီး ဘုကြည့် ကြည့်ချင်ကြသေးတာ၊ မခူးသင့်ဘူးဆိုတဲ့ အသိတရား ပေးလို့မရရင် ဥပဒေပုဒ်မနဲ့ တားမြစ်မှရမှာပါ။ ဒေသတစ်ခုရဲ့ ပြယုဂ်ကို တန်ဖိုးထားတတ်ပါစေ”ဟု သဘာဝပတ်ဝန်းကျင် ထိန်းသိမ်းသူတစ်ဦးက ပြောသည်။

ချယ်ရီပန်းတစ်စည်းကို ကျပ်နှစ်ထောင်ခန့် စျေးရှိနေပြီး လမ်းဘေး စျေးသည်အများစုက ခူးဆွတ် ရောင်းချနေကြ ကြောင်း သိရသည်။

ရှမ်းအရှေ့၊ လွိုင်မွေ နောင်ပေါ်မြို့လေးတွင်မူ ချယ်ရီပန်းများကို သဘာဝအတိုင်း ထားပြီး မြို့အလှအဖြစ် တန်ဆာဆင်ကာ ပွဲအဖြစ် ကျင်းပလျက်ရှိသည်။

#MeKongNews
#တောင်ကြီး
#ချယ်ရီပန်း
#ချယ်ရီချစ်သူ
#ကန့်ကွက်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)