မဲခေါင်၊ ဒီဇင်ဘာ ၂၅
လီဗာပူးဘောလုံးအသင်းကပင် ချီးကျူးရသည်ဟု ကြွားလုံးထုတ်ခဲ့သည့် နောင်ကား ဘောလုံးပွဲအတွက် ဟုဆိုကာ စစ်ကောင်စီ လက်အောက်ခံ PNO ပြည်သူ့စစ်က တစ်အိမ် ၃ သောင်းကျပ် တောင်းခဲ့ကြောင်း ကိုယ်တိုင်ထည့်ခဲ့ရသည့် ဒေသခံများက ပြောသည်။
တောင်ကြီးမြို့နယ်၊ တခေါ့မွူး ကျေးရွာအုပ်စုတွင် အထက်အမိန့် ဟုဆိုကာ PNO က တောင်းယူခဲ့ခြင်း ဖြစ်သည်ဟု ကိုယ်တိုင်ထည့်ခဲ့ရသည့် ဒေသခံတစ်ဦးက ပြောသည်။
“နောင်ကားဘောလုံးပွဲ အောင်မြင်ရေးအတွက်လို့ ပြောပြီး PNO အုပ်ချုပ်ရေးမှူးက ကောက်တာဗျ။ တစ်အိမ် ၃ သောင်းတဲ့။ အထက်လူကြီးက ငွေကြေးမကောက်ဘူးလို့ ပြောတယ် ။ ဒါပေမယ့် အောက်ခြေမှာက အထက်ကခိုင်းလို့ ဆိုပြီးတော့ ကောက်တယ်။” ဟု ၎င်းက ပြောသည်။
ယင်းငွေကြေးကောက်ခံမှုကို PNO အုပ်ချုပ်ရေးမှူး ခွန်ပန်းရွှေဆိုသူက ဦးဆောင်ခြင်း ဖြစ်သည်ဟု သတင်းရင်းမြစ်များက ပြောသည်။
နောင်ကား ဘောလုံးပွဲအတွက် ငွေမတောင်းဟု PNO ခေါင်းဆောင်များက ပြောလေ့ရှိသော်လည်း အောက်ခြေတွင်မူ PNO အုပ်ချုပ်ရေးမှူးများက နှစ်စဉ် ကောက်ခံလေ့ရှိကြောင်း ဒေသခံများက ပြောသည်။
“ကျေးရွာအုပ်စု တစ်ခုကို အိမ်ခြေတစ်ထောင်ပဲ ထားဦး၊ သူတို့ ကောက်တဲ့ငွေက တစ်အိမ် ၃ သောင်းဆိုတော့ သိန်း ၃၀၀ အနည်းဆုံးရတယ်။ ကျွန်တော်တို့အုပ်စုက အိမ်ခြေ ၂ ထောင်လောက်ရှိတယ်။ နှစ်တိုင်း ငွေထည့်ရတယ်။ အဲ့ငွေတွေက ဘောလုံးသမားတွေကို ကူညီတာလည်း မဟုတ်ပါဘူး။ ဘောလုံးကန်တဲ့ သူတွေက သူတို့စရိတ်နဲ့ သူတို့စုပြီး ကန်တာပါ”ဟု ဒေသခံတစ်ဦးက ပြောသည်။
ထို့ပြင် ဘောလုံးပွဲ ကျင်းပသည့် နောင်ကားကျေးရွာအုပ်စု အတွင်းရှိ ရွာများသည်လည်း PNO ၏ စေခိုင်းချက်အရ ဘောလုံးကွင်း တံမျက်စည်းလှည်းခြင်း၊ အမှိုက်ကောက်ခြင်းများကို အလှည့်ကျ လုပ်ပေးရကြောင်းလည်း ဒေသခံများက ဆိုသည်။
“ညတိုင်းပဲ ဘောလုံးပွဲပြီးရင် ကွင်းသန့်ရှင်းရေး သွားလုပ်ပေးရတယ်။ အလကား သွားလုပ်ပေးရတာ။ ပွဲအတွက် စပွန်ဆာပေးတဲ့ ကုမ္မဏီတွေရဲ့ အလှူငွေကို လူကြီးတွေပဲ စားရတာ။ ရွာသားတွေက အကုန်လုံး အလကား လုပ်ပေးရတာပါ”ဟု ဒေသခံ သတင်းရင်းမြစ်တစ်ဦးက ပြောသည်။
ယခုနှစ် နောင်ကားဘောလုံးပွဲကို အသင်းပေါင်း ၁၄၀ ကျော်ဖြင့် ဒီဇင်ဘာ ၁၇ ရက်မှ စတင် ကျင်းပလျှက်ရှိသည်။
ဥရောပအပါအဝင် ကမ္ဘာက ၇ နှစ်စာ အချိန်ယူရမည့် ဘောလုံးပြိုင်ပွဲကို PNO က တစ်လကျော်ဖြင့် ကျင်းပနိုင်ခဲ့သဖြင့် လီဗားပူးအသင်းကပါ နောင်ကားဘောလုံးပွဲကို အံ့ဩချီးကျုးခဲ့သည်ဟု ဥက္ကဌ ခွန်စံလွင်က ဘောလုံးပွဲဖွင့်ပွဲတွင် ကြွားဝါ ပြောဆိုခဲ့သည်။
#MeKongNews
#PNO
#နောင်ကား
#လီဗာပူး
#ဘောလုံးပွဲ
