မဲခေါင်၊ ဒီဇင်ဘာ ၂၄
ထိုင်းနိုင်ငံ အရှေ့မြောက်ပိုင်း၊ ပြည်နယ်လေးခုရှိ ၉၈ နေရာတွင် ကမ္ဘောဒီးယားမှ BM-21 ဒုံးကျည်ပေါင်း ၆၉၅ လုံးကျရောက်ခဲ့ပြီး အဆောက်အအုံ ၈၁ လုံး ပျက်စီးသွားခဲ့သည်ဟု ထိုင်းအမှတ်-၂ စစ်ဒေသ က ထုတ်ပြန် ပြောကြားသည်။
ဆီဆာကက်ပြည်နယ်၊ ခန်သာရာလစ်ခရိုင်တွင် ဒုံးကျည် ၁၃၄ လုံး၊ ဥဘွန်ရက်ချာဌာနီပြည်နယ်၊ နမ် ယွမ်ခရိုင်တွင် တစ်လုံး၊ ဘူရီရမ်ပြည်နယ် ဘန်ခွက်ခရိုင်တွင် ၂၇ လုံး၊ ဆူရင်ပြည်နယ်၌ ကက်ချောင်ခရိုင် တွင် ၃၁ လုံး နှင့် ဒေါင်ရက်ခရိုင်တွင် ၅၀၂ လုံး အသီးသီး ကျရောက်ခဲ့သည်ဟု အမှတ်-၂ စစ်ဒေသက စာ ရင်းနှင့်တကွ ထုတ်ပြန်ခဲ့သည်။
အရပ်သားကျေးရွာများ၊ နေအိမ်များ၊ ဘုရားကျောင်းများ နှင့် စာသင်ကျောင်း တစ်ကျောင်းကို ဒုံးကျည်များ ထိမှန်ပြီး ပျက်စီးနေသောပုံများကို အမှတ်-၂ စစ်ဒေသရုံးက ယနေ့တွင် ထုတ်ပြန်ခဲ့သည်။
အရပ်သားနေရပ် အများအပြားတွင် ဒုံးကျည်များ ကျရောက် ပေါက်ကွဲခဲ့ခြင်းကို ထောက်ရှု၍ စစ်ရေးနှင့် အရပ်သား ပစ်မှတ်များကို မခွဲခြားဘဲ ပစ်ခတ်တိုက်ခိုက်ခြင်း၊ အရပ်သားများကို ကာကွယ်ရန် လုံလောက်သော အတိုင်းအတာများ မပါဝင်ခြင်းကို သက်သေပြနေသည်ဟု ထိုင်းစစ်တပ်က ဆက်ပြောသည်။
ထိုသို့ တိုက်ခိုက်မှုများသည် နိုင်ငံတကာ လူသားချင်းစာနာ ထောက်ထားမှုဥပဒေကို ချိုးဖောက်ရာကျသည်ဟုလည်း ထုတ်ပြန်ချက်က ဖော်ပြသည်။
အရပ်သားများထိခိုက်ပြီး နေအိမ်အဆောက်အဦးများကို ပျက်စီးစေသော အင်အားမျိုးသုံး၍ ငြိမ်းချမ်းရေး ရရှိရန်ကြိုးပမ်းမှုဟု ၎င်းတို့ပြောသည့်ကိစ္စကိုလည်း စစ်ဘက်က ဝေဖန်ခဲ့ပြီး တာဝန်ယူ၊ တာဝန်ခံမှု၊ ပစ်မှတ်ခွဲခြားမှု၊ လိုက်ဖက်သော အင်အားသုံးမှု၊ စစ်မှန်သော စစ်ရေး လိုအပ်ချက်များဖြင့်သာ ငြိမ်းချမ်းရေး ရရှိနိုင်သည်ဟု ထိုင်းစစ်တပ်က ဆက်ပြောသည်။
ထိုအတောအတွင်းမှာပင် တရုတ်နိုင်ငံ China Media Group မှ ဂျာနယ်လစ်အဖွဲ့တစ်ဖွဲ့က ယနေ့ ဒီ ဇင်ဘာ ၂၄ ရက်တွင် ဆီဆာကက်ပြည်နယ်မှ မြို့နယ်၊ ကျေးရွာများသို့ သွားရောက်ကာ ကမ္ဘောဒီးယားမှ ပစ်ခတ်လိုက်သော လက်နက်များကြောင့် အရပ်သားနေရာများ ပျက်စီးမှုများကို ကြည့်ရှုပြီး အချက်အလက်များကို စိစစ်ခဲ့ကြကြောင်း ထိုင်းမီဒီယာများက ဖော်ပြသည်။
တရုတ် ဂျာနယ်လစ်များက ဆီဆာကက်ပြည်နယ်၊ ကန်သာရာလက်ခရိုင်မှ ဆောသောင်ချိုင် ခရိုင်ခွဲသို့ သွားရောက်ခဲ့ပြီး အမှတ် -၂ ဖွံ့ဖြိုးတိုးတက်ရေးတပ်ရင်းမှ ဒုတိယအကြီးအကဲ ဗိုလ်မှူးကြီး ပက်ဆာခွန်က ၎င်းတို့အား လိုက်လံပြသခဲ့သည်။
၎င်းတို့က နေရာအများအပြားသို့ သွားရောက်ခဲ့ကြရာ၌ BM – 21 ဒုံးကျည်စ ထိမှန်၍ သေဆုံးခဲ့သူတစ်ဦး၏ နေအိမ်၊ ရွာသားများစုပေါင်း ခိုလှုံနေသော ဘန်ကာတစ်ခု၊ ထိခိုက်ခဲ့သော စာသင်ကျောင်း တစ်ကျောင်းနှင့် ဆိုးဆိုးရွားရွား ပျက်စီးသွားသော နေအိမ် ၆ လုံးတို့ကို ကြည့်ရှုခဲ့ကြသည်။
ယင်းခရီးစဉ် အတွင်းမှာပင် တရုတ်ဂျာနယ်လစ်များက ကျေးရွာလုံခြုံရေး လုပ်ကိုင်နေသူများ၊ ကျေးရွာ ခေါင်းဆောင်များနှင့် တွေ့ဆုံ၍ သိလိုသည်များကို မေးမြန်းခဲ့ကြကြောင်း သိရသည်။
အေးကျော်
Ref: The Nation/Khaosod
#MeKongNews
#ထိုင်းအရပ်သား
#ကမ္ဘောဒီးယား
#ဒုံးကျည်
#ပစ်ခတ်
