မဲခေါင်၊ ဒီဇင်ဘာ ၂၃
ယခုနောက်ဆုံးဖြစ်ပေါ်လာခဲ့သော ထိုင်းနှင့် ကမ္ဘောဒီးယားကြားက နယ်စပ်ပဋိပက္ခကို ထိုင်းနိုင်ငံက စတင်ခဲ့ကြောင်း အမေရိကန်သမ္မတ ဒေါ်နယ်ထရန့်က ပြောကြားခဲ့သည်ဟု သတင်းများ ထွက်ပေါ်လာခဲ့ပြီးနောက် ၎င်းအနေဖြင့် စိုးရိမ်ပူပန်မှုမရှိကြောင်း ထိုင်းဝန်ကြီးချုပ် အနုတင်ချန်ဗီရာကူးလ်က ပြောသည်။
“အမှန်တရားကို လူတိုင်းက သိရှိနေကြပါပြီ။ ကျွန်တော် စိုးရိမ်ပူပန်မှု လုံးဝမရှိပါဘူး။ ကျွန်တော်တို့ ကျုးကျော် ခံခဲ့ရတယ်။ တိုက်ခိုက်ခံခဲ့ရတယ်။ ကျွန်တော်တို့ လုပ်ခဲ့တာက ကျွန်တော်တို့ရဲ့အချုပ်အခြာကို ကာကွယ်ဖို့ တုံ့ပြန်ခဲ့တာပဲ ဖြစ်တယ်” ဟု အနုတင်က ပြောသည်။
နိုင်ငံအများအပြားက ဘက်မလိုက်ဘဲ ကြားနေသည့်ပုံ ပေါ်သော်လည်း နောက်ဆုံးတွင် ကမ္ဘောဒီးယားဘက် ပါသွားပုံ ရပါသလား ဟု မေးမြန်းရာတွင် ဘက်လိုက်သွားသည် ဆိုသော နိုင်ငံကို ၎င်းအနေဖြင့် သတိမထားမိ ကြောင်း အနုတင်က ပြောကြားပြီး ထိုင်း-ကမ္ဘောဒီးယား ပြဿနာသည် နှစ်နိုင်ငံကြားက ကိစ္စဖြစ်ကြောင်း ဆက်ပြောသည်။
“တစ်ဖက်ဖက် နဲ့ အတူ ရပ်တည်တယ်လို့ ပြောတဲ့နိုင်ငံ တစ်နိုင်ငံမှ ကျွန်တော် မတွေ့သေးပါဘူး။ တွေ့တဲ့နိုင်ငံ အားလုံးက ကြားနေတယ်လို့ပဲ ပြောကြပါတယ်” ဟု ၎င်းက ဆိုသည်။
နယ်စပ် တိုက်ခိုက်မှုများတွင် သေဆုံး သို့မဟုတ် ဒဏ်ရာရရှိခဲ့သော တပ်ဖွဲ့ဝင်များအတွက် လျော်ကြေးပေးရန်နှင့် တိုက်ခိုက်မှုများအတွင်း ထိခိုက်ခဲ့သော အရပ်သားများအတွက် အကူအညီပေးရန် အမျိုးသားလုံခြုံရေးကောင်စီ – NSC က အဆိုပြု တင်ပြခဲ့ကြောင်းကိုလည်း ဝန်ကြီးချုပ်နှင့် ပြည်ထဲရေးဝန်ကြီးပူးတွဲ တာဝန်ယူထားသူ အနုတင်က အစောပိုင်းတွင် အတည်ပြုပြောကြားခဲ့သည်။
ထိုအတောအတွင်းမှာပင် မနက်ဖြန် ကျင်းပမည့် အထွေထွေနယ်စပ်ရေးရာ ကော်မတီ – GBC အစည်းအဝေးကို နယ်စပ် ထိုင်းဧရိယာမှ မလေးရှားနိုင်ငံ ကွာလာလမ်ပူမြို့သို့ ပြောင်းရွှေ့ကျင်းပရေး ကမ္ဘောဒီယားက တောင်းဆိုမှုကို ထိုင်းဘက်က ပယ်ချခဲ့ကြောင်း အကြီးတန်းထိုင်းလုံခြုံရေး သတင်းရင်းမြစ်ကို ကိုးကား၍ ထိုင်းမီဒီယာများက ဖော်ပြသည်။
နယ်စပ် လုံခြုံရေးအခြေအနေကို အကြောင်းပြ၍ ယင်းအစည်းအဝေးအား ကွာလာလမ်ပူမြို့တွင် ကျင်းပရန် ကမ္ဘောဒီးယား ကာကွယ်ရေးဝန်ကြီး တီးဆေဟာက ထိုင်းကာကွယ်ရေးဝန်ကြီး နတ်ဖာနစ်အား စာရေးသားတောင်း ဆိုခဲ့ကြောင်း အေအက်ဖ်ပီသတင်းက ဖော်ပြခဲ့သည်။
GBC အစည်းအဝေး နောက်ဆုံးအကြိမ်ကို ကမ္ဘောဒီးယားနိုင်ငံ ခိုကောင်ပြည်နယ်တွင် ကျင်းပခဲ့ကြောင်းနှင့် ယခုအခါ ထိုင်းနိုင်ငံက လက်ခံကျင်းပရမည့် အလှည့်ဖြစ်ကြောင်း ထိုင်းကာကွယ်ရေးဝန်ကြီး နတ်ဖာနစ်က အစောပိုင်းတွင် ပြောကြားထားခဲ့ပြီး ထိုင်းအစိုးရက စစ်ရေး နှင့် သံတမန်ရေးကို ခွဲခြားနိုင်သဖြင့် ကမ္ဘောဒီးယားအနေဖြင့် စိုးရိမ်စရာ မရှိကြောင်း ၎င်းက ဆက်ပြောသည်။
အေးကျော်
Ref: The Nation/ AFP
#MeKongNews
#စစ်ပွဲ
#ထိုင်း
#ကမ္ဘောဒီးယား
#ထရမ့်
