မဲခေါင်၊ ဒီဇင်ဘာ ၂၃
ဗင်နီဇွဲလားသမ္မတ နီကိုလပ်စ်မာဂျုရို ရာထူးမှဆင်းလျှင် ဉာဏ်ကောင်းရာ ကျမည်ဟု အမေရိကန်သမ္မတ ဒေါ် နယ်ထရမ့်က ယမန်နေ့တွင် ပြောကြားခဲ့ပြီး မကြာသေးမီ သီတင်းပတ်များက ဗင်နီဇွဲလားကမ်းလွန်မှ သိမ်း ပိုက် ထားသော ရေနံများကို အမေရိကန်ကသိမ်းထားခြင်း၊ သို့မဟုတ် ရောင်းချခြင်း လုပ်သွားနိုင်သည်ဟုလည်း ဆိုသည်။
၎င်း၏ ရည်မှန်းချက်မှာ မာဂျုရိုအား အတင်းအကျပ် ဆင်းခိုင်းရန် ဖြစ်ပါသလားဟု မေးမြန်းရာတွင် “ အဲဒီလို ဖြစ်နိုင်ပါတယ်။ သူဘာလုပ်ချင်သလဲ ဆိုတာ သူ့ပေါ်မှာ မူတည်ပါတယ်။ သူ အဲလိုလုပ်ခဲ့ရင် သူ ဉာဏ်ကောင်းတာပေါ့။ ဒါပေမယ့် ကျွန်တော်တို့ စောင့်ကြည့်ကြတာပေါ့” ဟု ထရမ့်က ဆိုသည်။
“သူတစ်ခုခုလုပ်ခဲ့ရင်၊ အကြောတင်းတင်း ကစားခဲ့မယ်ဆိုရင် ဒါဟာ သူတင်းမာမှုပြတာ နောက်ဆုံးအကြိမ် ဖြစ်ပါလိမ့်မယ်” ဟု ၎င်းက ဆက်ပြောသည်။
သတင်းစာ ရှင်းလင်းပွဲမှာပင် ၎င်းနှင့် တစ်နှစ်ပတ်လုံး အငြင်းပွားခဲ့သော ကိုလံဘီယာသမ္မတ ဂူစတာဗိုပက်ထရို အကြောင်းလည်း ထရမ့်က ပြောသည်။
“ သူက အမေရိကန် ရဲ့ မိတ်ဆွေမဟုတ်ပါဘူး။ အလွန်ဆိုးတဲ့လူပါ။ သူက ကိုကင်းတွေထုတ်လုပ်ပြီး အမေရိကန်ကို ပို့နေတာကြောင့် သူ သတိထားနေသင့်ပါတယ်” ဟု ဗင်နီဇွဲလားနှင့် တင်းမာမှုများကို ကိုင်တွယ်နေမှုအပေါ် ပက် ထရို၏ ဝေဖန်မှုများနှင့် ပတ်သက်၍ ၎င်းက ပြောသည်။
မာဂျုရိုအပေါ် ထရမ့်၏ ဖိအားပေးခြင်းတွင် ဒေသတွင်း၌ စစ်အင်အားသိသာစွာ တိုးမြှင့်ထားခြင်းနှင့် ဗင်နီဇွဲလားနိုင်ငံ အနီး ကာရစ်ဘီယံပင်လယ်နှင့် ပစိဖိတ်သမုဒ္ဒရာတွင် မူးယစ်ဆေးဝါးများ မှောင်ခိုကူးနေသည် ဆိုသော သင်္ဘောများအား အကြိမ်ပေါင်း ၂ ဒါဇင်ကျော် တိုက်ခိုက်ခဲ့ခြင်းများလည်း ပါဝင်သည်။
ယင်းတိုက်ခိုက်မှုများတွင် အနည်းဆုံး လူပေါင်းတစ်ရာကျော် သေဆုံးခဲ့သည်။
မူးယစ်မှောင်ခို သင်္ဘောများအား တိုက်ခိုက်မှုအပြင် ဒဏ်ခတ် ပိတ်ဆို့ထားသည့် ဗင်နီဇွဲလားနိုင်ငံသို့ အဝင်အထွက် လုပ်နေသော ရေနံတင်သင်္ဘောများ အားလုံးကို ပိတ်ဆို့ တားဆီးသွားရန် ထရမ့်က ယခင်ကတည်းက ကြေညာ ထားခဲ့ကာ မကြာသေးမီ သတင်းပတ်များတွင် ယင်းကို စတင်လိုက်ပြီး သီတင်း ၂ ပတ်မပြည့်မီ ရေနံတင်သင်္ဘော ၃ စီးကို ဖမ်းဆီး သိမ်းပိုက်လိုက်သည်။
အေးကျော်
Ref: Reuters
#MeKongNews
#ဗင်နီဇွဲလား
#မာဂျုရို
#အာဏာစွန့်
#ထရမ့်
