မဲခေါင်၊ ဒီဇင်ဘာ ၇
ရှမ်းပြည်တောင်ပိုင်း၊ တောင်ကြီးမြို့နယ်၊ နားဟီး၊ နားရီနှင့် ဟမ်ဖို့ကျေးရွာတွင် ပအိုဝ်းပြည်သူ့စစ် – PNO က စစ်သုံးစရိတ်အပြင် အိမ်ခွန်များပါ လစဉ် တောင်းနေသောကြောင့် ပြည်သူများ အခက်ခဲ ဖြစ်နေရကြောင်း ဒေသခံများက မဲခေါင်သို့ ပြောသည်။
နားဟီး ကျေးရွာအုပ်စုမှ ပအိုဝ်းပြည်သူ့စစ် – PNO ခန့် အုပ်ချုပ်ရေးမှူး ခွန်ထွန်းဦးနှင့် ဆယ်အိမ်ခေါင်းများက ကောက်ခံနေပြီး စစ်အသုံးစရိတ် တစ်လ ၅ သောင်းကျပ် အိမ်ခွန် တစ်လ ၅ သောင်းကျပ် လစဉ် ထည့်ပေးရကြောင်း ၎င်းတို့က ဆိုသည်။
“လကွယ်ရောက်တိုင်း ပေးရတယ်၊ မပေးရင်လည်း မရဘူး။ ရွာသားတွေကို ခြိမ်းခြောက်တယ်။ အိမ်သိမ်းမယ် ရွာက နှင်ထုတ်မယ်ဆိုပြီး ပြောတယ်။ အဲ့ဘက် ရွာသားတွေက သူတို့ကို အရမ်း စိတ်ကုန်နေပြီ။ ရွာသားတွေက သူတို့ကို ကောင်းကောင်း မဆုတောင်းပေးဘူးလေ။ သေခါနီးဆို ဒုက္ခတွေရောက်စေ လေဖြန်းပြီးသေစေ ချမ်းသေပီးသေစေ ဆိုပြီး သူတို့ကို ဝိုင်းဆုတောင်းနေကြပြီ”ဟု အသက် ၃၀ ကျော် ဒေသခံတစ်ဦးက မဲခေါင်သို့ ပြောသည်။
စစ်သုံးစရိတ် ကောက်ခံသည်မှာ သုံးနှစ်ရှိလာပြီး အိမ်ခွန်ကို ယခုနှစ်မှ စတင် ကောက်ခံကြောင်း ၎င်းက ဆက်ပြောသည်။
“အိမ်ခွန်ကောက်တာ ကျွန်တော်တို့ရွာနဲ့ နားရီဘက်ဘဲ ကောက်တာ တစ်ခြားရွာတွေ လိုက်မေးတာ ကြား တောင် မကြားဖူးဘူးတဲ့ ရီတောင် ရီလိုက်သေးတယ်။ အခွန် အရမ်းများတော့ ရွာသားတွေ က အခွန်ကျေပဲအောင် ထည့်ရပြီး ထမင်းလျှော့စား ရတာတွေတောင် ရှိတယ်။ ပြည်သူကို စာနာစိတ်လည်း မရှိကြဘူး”ဟု အခြား ဒေသခံတစ်ဦးက မဲခေါင်သို့ ပြောသည်။
ပြီးခဲ့သည့် နိုဝင်ဘာ ပထမပတ်တွင်လည်း ကျောက်တလုံးကြီးမြို့၊ ဝင်းယရွာတွင် စစ်မှုထမ်းစရိတ် မထည့်နိုင်သူ နေအိမ်ကို PNO က ဖျက်ဆီးခဲ့သေးကြောင်း ဒေသခံများထံမှ သိရသည်။
#MeKongNews
#ကျောက်တစ်လုံး
#စစ်သုံးစရိတ်
#အိမ်ခွန်
#PNO
