မဲခေါင်၊ ဒီဇင်ဘာ ၂
မြန်မာနိုင်ငံ မြ၀တီမြို့ရှိ ကျားဖြန့်လုပ်ငန်းများကို အောက်တိုဘာလတွင်း စတင်နှိမ်နင်းရာ KK Park နှင့် ရွှေကုက္ကိုလ်ကျားဖြန့်စင်တာများမှ သောင်ရင်းမြစ်ဖြတ်ကူးလာသည့် ကျားဖြန့်နှင့်ပတ်သက်သော တရုတ်နိုင်ငံသား ၁၂၀၈ ယောက်ထဲမှ ပထမအသုတ် အယောက် ၃၀၀ ကို ဒီဇင်ဘာ ၁ ရက်တွင် ထိုင်း လ၀ကနှင့် အာဏာပိုင်များက မဲဆောက်လေဆိပ်မှ တစ်ဆင့် တရုတ်နိုင်ငံသို့ ပြန်ပို့ခဲ့ကြောင်း ထုတ်ပြန် ကြေညာသွားခဲ့သည်။
တရုတ်ရဲတပ်ဖွဲ့ဝင်များနှင့် ထိုင်းရဲတပ်ဖွဲ့တို့ ပူးပေါင်းပြီး အဆိုပါ အယောက် ၃၀၀ ကို လေယာဉ်ပေါ် မပို့ဆောင်မီ မှတ်ပုံတင်အချက်အလက် စစ်ဆေးခြင်း၊ ခန္ဓာကိုယ် ရှာဖွေခြင်းများ ပူးပေါင်းလုပ်ဆောင် ပြီးမှ လုံခြုံရေးတင်ကြပ်စွာဖြင့် ခေါ်ဆောင်လာကာ ပို့ဆောင်ခဲ့ခြင်းဖြစ်သည်ဟု ထိုင်းအာဏာပိုင်များက ထုတ်ပြန်သည်။
တရုတ်နိုင်ငံသား ကျားဖြန့်လုပ်ငန်းနှင့်ပတ်သက်သူ ၁၂၀၈ ယောက်ရှိသည့်အတွက် ဒီဇင်ဘာ ၁ ရက်မှ စတင်ကာ ဒီဇင်ဘာ ၄ ရက်အထိ လေကြောင်းခရီးစဉ် ၆ ခု ပြေးဆွဲပြီး တရုတ်သို့ ပြန်ပို့သွားမည်ဖြစ် ကြောင်းလည်း သိရသည်။
မြန်မာစစ်ကောင်စီက စက်တင်ဘာလဆန်းပိုင်းမှစတင်ပြီး ကျားဖြန့်လုပ်ငန်းများကို နှိမ်နင်းခဲ့သည်ဟု ထုတ်ပြန်သော်လည်း ခိုင်မာသော သတင်းရင်းမြစ်များအရ ကျားဖြန့် ခေါင်းဆောင်များသည် နေရာ ရွှေ့ပြောင်းကာ ဒုစရိုက်နယ်မြေသစ်များတွင် ဆက်လက်လုပ်ကိုင်နေသည်ဟု သိရှိရသည်။ ရွှေကုက္ကိုလ် မြို့သစ်ကျားဖြန့်စင်တာများကို နိုဝင်ဘာ ၁၈ ရက်မှ စတင်ပြီး ၆ ရက်ကြာ နှိမ်နင်းမှုတွင် ပြည်ပသား ၁၇၄၆ ယောက် ဖမ်းဆီးနိုင်ခဲ့သည်ဟုလည်း သိရသည်။
ထိုင်းအာဏာပိုင်များက တရုတ်ကျားဖြန့်ပတ်သက်သူများအားလုံးကို စစ်ဆေးမှုများ ပြုလုပ်ပြီးသဖြင့် ဦးစွာ နိုင်ငံပြန်ပို့ခြင်းဖြစ်ကာ တရုတ်များပို့အပြီးတွင် နိုင်ငံစုံမှ ကျားဖြန့် လုပ်သားများကို ထပ်မံပို့ ဆောင်ရန် စီစဉ်ထားသည်ဟုလည်း ထုတ်ပြန်ခဲ့သည်။
ကိုကလင်း
Ref: Khaosod
#MeKongNews
#ကျားဖြန့်
#မြဝတီ
#တရုတ်
#မြန်မာ
