မဲခေါင်၊ ဒီဇင်ဘာ ၁
ပအိုဝ်းပြည်သူ့စစ် – PNO ခွင့်ပြုချက်ဖြင့် ရှမ်းပြည်တောင်ပိုင်း၊ တောင်ကြီးမြို့နယ်၊ ဖက်ကွန်၊ နောင်လေ၊ မောက်ဝေါ့၊ ထီပသဲ့ ကျေးရွာများ၌ နာရေးတိုင်းတွင် လောင်းကစားဝိုင်းမျိုးစုံ ထည့်သွင်းပြီး ကလေးအများစုပါ လာကစားနေကြကြောင်း ဒေသခံများထံမှ သိရသည်။
နာရေးတစ်ပွဲ လိုင်းကြေး ကျပ်သိန်း ၂၀ ယူပြီး PNO က ခွင့်ပြုထားကာ လောင်းကစားဝိုင်း လာသူများ၏ လုံခြုံရေးကိုလည်း ၎င်းတို့ တပ်သားများကိုယ်တိုင် တာဝန်ယူပေးထားကြောင်း ဒေသခံများက ပြောသည်။
” ဒီလို ဖွင့်ခွင့်ပေးတာ ၂ နှစ်ရှိပြီ အသုဘပွဲက ဖဲဝိုင်းပဲဆို ဓလေ့တစ်ခုလို ဖြစ်နေတော့ အဆင်ပြေတယ်လေ၊ အခုက ဂျင်လေးကောင် တခြား လောင်းကစားဝိုင်းတွေပါ ထည့်ခွင့်ပေးတော့ ဒေသခံတွေက အရမ်းပျက်စီးကြတယ်။ ဒီလိုဖွင့်ခွင့်ပေးတာ လုံးဝ သဘောမကျကြဘူး”ဟု ဒေသခံတစ်ဦးက မဲခေါင်သို့ ပြောသည်။
ယင်းတို့တွင် ဖဲဝိုင်း၊ ဂျင်လေးကောင်၊ ဂလုံးဂလုံးနှင့် အခြား လောင်းကစားများ ထည့်သွင်းထားပြီး ဒေသတွင်းရှိ ၁၅ နှစ်အောက် ကလေးများစွာလည်း ပါဝင် ကစားကြကြောင်း ဒေသခံများက ပြောသည်။
“၅ နှစ် ၆ နှစ်အရွယ် ကလေးကအစ ကစားတတ်ပြီ။ လောင်းကစားဝိုင်းမှာ ကလေးတွေက တက်တက်ကြွကြွ အားရပါးရ ပါဝင်တာတွေ့ရတော့ သူတို့ အနာဂတ်အတွက် အရမ်း ရင်လေးတယ်။ ဘယ်လို လောင်းကစားပဲလာလာ သူတို့က ကစားတတ်နေပြီ။ ရွာမှာ အသုဘပွဲရှိရင် တချို့ကလေးဆို ကျောင်းပြေးပြီးတော့တောင် လောင်းကစားဝိုင်းမှာ ရောက်နေတာမျိုးပေါ့။ အခြေအနေက အရမ်းဆိုးရွားပါတယ်”ဟု ဒေသခံတစ်ဦးက မဲခေါင်သို့ ပြောသည်။
ယခုကဲ့သို့ လောင်းကစားဝိုင်း ပေါများလာခြင်းကြောင့် တောင်ကြီးတွင် ခိုးဆိုးလုယက်မှု များလာပြီး၊ အိမ်တွင်း အကြမ်းဖက်ခံရသော အမျိုးသမီးလည်း များလာကြောင်း ဒေသခံများက ပြောသည်။
#MeKongNews
#တောင်ကြီး
#လောင်းကစားမျိုးစုံ
#ကလေးများ
#PNO
