မဲခေါင်၊ နိုဝင်ဘာ ၂၆
အာဖရိကတောင်ပိုင်း ဆာဟာရသဲကန္တာရနယ်ရှိ အခြောက်သွေ့ဆုံးဒေသတွင် တည်ရှိသော နမီးဘီးယား နိုင်ငံ ရွေးကောက်ပွဲတွင် ထူးခြားစွာဖြင့် အဒေါ့ဖ်ဟစ်တလာ နောက်ထပ် ၅ နှစ် တာဝန်ထမ်းဆောင်ရန် သောင်ပြိုကမ်းပြိုအနိုင်ရနေခဲ့ကြောင်း သိရှိရသည်။
နမီးဘီးယားရွေးကောက်ပွဲသည် နိုဝင်ဘာ ၂၆ ရက်တွင် အပြီးသတ်မည်ဖြစ်သော်လည်း အွမ်ပန်ဂျာ မဲဆန္ဒနယ်တွင် ၂၀၂၀ ပြည့်နှစ်ရွေးကောက်ပွဲက မဲအများဆုံးရရှိပြီး မဲဆန္ဒနယ်အမတ်ဖြစ်ခဲ့သော အဒေါ့ဖ်ဟစ်တလာသည် ယခုရွေးကောက်ပွဲတွင်လည်း အနီးဆုံးပြိုင်ဘက် ၂၁၃ မဲသာရချိန် ဆန္ဒမဲ အားလုံး၏ ၈၅ ရာခိုင်နှုန်းဖြစ်သည့် မဲပေါင်း ၁၁၉၆ မဲ ရရှိထားပြီးဖြစ်ခြင်းကြောင့် သောင်ပြိုကမ်းပြို့ အနိုင်ရကာ နောက်ထပ် ၅ နှစ် တာဝန်ထမ်းရန် သေချာသွားခဲ့ပြီဖြစ်သည်။
ထူးခြားသည်မှာ အဒေါ့ဖ်ဟစ်တလာ နာမည်ရလာပုံဖြစ်ပြီး ၎င်းသည် ဥရောပတစ်တိုက်လုံးရှိ ဂျူး လူဦးရေ ၃ ပုံ ၂ ပုံဖြစ်သော ဂျူး ၆ သန်းကို သတ်ခဲ့သော ဂျာမနီနာဇီ အာဏာရှင် အဒေါ့ဖ်ဟစ်တလာကဲ့ သို့ ရက်စက်သည့် အာဏာရှင်မဟုတ်ဘဲ ကံဆိုးစွာဖြင့် ထိုနာမည်ကို ဖခင်ပေးသည့်အတိုင်း ရရှိခဲ့ကာ ပြင်ဆင်ချိန် မရှိဘဲ အမတ်ဖြစ်လာခြင်းဖြစ်သည်ဟု ရှင်းလင်းပြောကြားသွားခဲ့သည်။
နမီးဘီးယားသည် ၁၉၉၀ ပြည့်နှစ်မှ တောင်အာဖရိကမှ လွတ်လပ်ရေးရခဲ့သော နိုင်ငံဖြစ်သော်လည်း ဂျာမနီ၏ ကိုလိုနီလုပ်ခဲ့ရာ နယ်မြေဖြစ်သော အနောက်တောင်အာဖရိက နယ်မြေထဲမှ တစ်နိုင်ငံဖြစ်ခဲ့ ကာ ၁၉၀၄ ခုနှစ်မှ ၁၉၀၈ ခုနှစ်အထိ ဂျာမန်တပ်သားများသည် နာမာမျိုးနွယ်စုတိုင်းရင်းသား ၁၀၀၀၀ နှင့် ဟီရီယိုတိုင်းရင်းသားမျိုးနွယ်စု ၆၅၀၀၀ ကိုသတ်ဖြတ်ခဲ့သည့် သမိုင်းဆိုးလည်း ရှိခဲ့သည်။
ပထမ ကမ္ဘာစစ်ကတည်းက ဂျာမနီကိုလိုနီဖြစ်ခဲ့သည့်အတွက် ယနေ့ကာလတွင် နမီးဘီးယားသို့ နှစ်စဉ် ဂျာမနီသား ၁၂၀၀၀၀ လာရောက်လည်ပတ်ကာ ယနေ့အထိ နိုင်ငံ လမ်းများစွာ၊ နေရာများစွာကို ဂျာမနီ ဘာသာကစားဖြင့် နာမည်ပေးထားသလို ဂျာမနီစကားပြောသည့် လူမျိုးစုအသိုင်းအဝိုင်းလည်း ကျယ်ပြန့်စွာရှိသည်။
အမည် အဒေါ့ဖ်ဟစ်တလာဖြစ်လာရခြင်းနှင့်ပတ်သက်ပြီး “ ကျွန်တော့်နာမည်ကို အဖေပေးခဲ့တာပါ။ အဒေါ့ဖ်ဟစ်တလာ ယူအန်နိုနာလို့ ပေးခဲ့တာ။ အဒေါ့ဖ်ဟစ်တလာဘာလဲဆိုတာလည်း အဖေ မသိဘူး။ ကလေးဘ၀တုန်းက ဒါသာမန်နာမည်လို့ပဲ ကျွန်တော်လည်း ထင်တာပါ။ ဆယ်ကျော်သက်အရွယ် ရောက်မှပဲ ကမ္ဘာတစ်ခုလုံး အုပ်စိုးချင်ခဲ့သူကြီးရဲ့ နာမည်ဖြစ်နေတာ သိခဲ့ရတယ်။ ခုထိလည်း ဇနီးက ကျွန်တော့်ကို အဒေါ့ဖ်လို့ ခေါ်တာပါပဲ။ ကိုယ့်ဘ၀ စာရွက်စာတမ်းမှတ်ပုံတင်အားလုံးမှာ ဒီနာမည်ကြီးက တောက်လျှောက်ပါနေတော့ ပြင်ဖို့ အချိန်နှောင်းသွားခဲ့လို့ ဒီအတိုင်း ဒီနာမည်နဲ့ ကြီးပြင်းခဲ့ရတာပါ။ ကျွန်တော်ကတော့ အသားအရောင်ခွဲခြားမှုကို ဆန့်ကျင်တဲ့သူပါ။ ရက်စက်တတ်သူမဟုတ်တဲ့ ကြင်နာတတ်သူပါ” ဟု ဂျာမန်ဘိုင်းလ်သတင်းစာသို့ ၅၉ နှစ်အရွယ် လွှတ်တော်အမတ်က ပြောပြသွားခဲ့ သည်။
အဒေါ့ဖ်ဟစ်တလာအစစ်သည် ၁၉၃၃ ခုနှစ်တွင် နာဇီပါတီ အာဏာရလာခြင်းမှ ဂျာမနီခေါင်းဆောင် စစ်ဘုရင်ဖြစ်လာကာ ရက်စက်မှုအပေါင်း သရဖူဆောင်းခဲ့ပြီး ဂျူး ၆ သန်းကို သတ်ဖြတ်ခဲ့သည်။
၁၉၄၅ ခုနှစ်တွင် နာဇီတို့ ဗြိတိန်၊ အမေရိကန်နှင့်ရုရှားမဟာမိတ်တပ်များကို စစ်ရှုံးပြီးနောက် ဆိုဗီယက် တပ်နီတော်ကြီး ဘာလင်သို့ ချီတက်လာချိန်၌ မြေအောက်ဥမင်အဆောက်အအုံ Fuhrerbunker ထဲ ပုန်းအောင်းနေရာမှ ကိုယ့်ကိုယ်ကိုယ် သေနတ်ဖြင့် ပစ်သတ်အဆုံးစီရင်ခဲ့ပြီး တပည့်များက Reich Chancellery အဆောက်အအုံရှေ့ ပန်းခြံထဲ မီးသဂြိဟ်လိုက်ကြသည်ဟု သမိုင်းတွင် ဖော်ပြထားသည်။
ကိုကလင်း
Ref: Thesun
#MeKongNews
#နမီးဘီးယား
#ဟစ်တလာ
#ဂျာမနီ
#စစ်ဘုရင်
