မဲခေါင်၊ နိုဝင်ဘာ ၂၅
ပြောင်းကားများထဲမှ ငွေတောင်းခြင်း အပါအဝင် ရှမ်းပြည်တောင်ပိုင်း၊ ဆီဆိုင်မြို့ အဝင်အထွက်ဂိတ်တွင် ကျေးရွာမှ မြို့သို့ ခြံထွက်ပစ္စည်း လာရောင်းချသော တောင်သူများထံမှ စစ်ကောင်စီတပ်နှင့် ပူးပေါင်းအဖွဲ့က ငွေတောင်းကြမ်းနေသဖြင့် တောင်သူများ လူလုံးမလှ ဖြစ်နေရကြောင်း ဒေသခံများထံမှ သိရသည်။
ယင်းဂိတ်တွင် စစ်ကောင်စီတပ်၊ ရဲနှင့် ပအိုဝ်းပြည်သူ့စစ် – PNO တို့ ပူးတွဲစောင့်ကြပြီး မြို့တောင်ဘက် နှင့် မြို့မြောက်ဘက် နှစ်ဂိတ်စလုံး၌ ငွေတောင်းကြမ်းကြကြောင်း ၎င်းတို့က ပြောသည်။
“ကျနော်တို့ တောင်သူတွေ မြို့ပေါ် ပြောင်းလာရောင်းရင် မြို့အဝင်ရဲဂိတ်က ကားသေး၊ ထော်လာဂျီဆို ၅၀၀၀၊ Canter ဆို ၁၀၀၀၀ တောင်းတယ်ဗျ။ ရဲဂိတ်တောင်ဘက်နဲ့ မြောက်ဘက် နှစ်ဂိတ်လုံး တောင်းတယ်။ ပြောင်းတစ်ထုပ်စိုက်ရင် တစ်သိန်းမြတ်ဖို့တောင် မလွယ်ဘူးဗျ။ ပြောင်းကားမှ မဟုတ်ပါဘူး၊ ပဲစင်းငုံ၊ သနပ်ဖက်၊ ငရုတ်သီး၊ စပါးသယ်ကားလည်း တောင်းတယ်”ဟု ကိုယ်တွေ့ ကြုံရသူ တောင်သူတစ်ဦးက မဲခေါင်သို့ ပြောသည်။
ယခုကဲ့သို့ ဂိတ်များတွင် ပေးရခြင်းနှင့် ကားခကုန်ကျခြင်း၊ ရောင်းချသောကုန် ဈေးမရခြင်း၊ ပွဲစားများနှိမ်ခြင်းတို့ကြောင့် တောင်သူများ နှစ်စဉ်လိုလို အရှုံးဖြင့်သာ ရောင်းချနေရကြောင်း ဒေသခံများက ပြောသည်။
“အရင်တုန်းကဆို ပွဲစားတွေက ရွာအထိ လာဝယ်ကြတယ်။ ခုနောက်ပိုင်း ဂိတ်တွေများလာလို့ ပွဲစားတွေက လာမဝယ်ကြတော့ဘူး။ တောင်ကြီး၊ ဆိုက်ခေါင်၊ အောင်ပန်းအထိ သွားရောင်းရတယ်။ သွား ရောင်းပြီး တစ်နှစ်စာ ကုန်ခဲ့တဲ့အချိန် ကိုယ့်လုပ်အားခတောင် ပြန်မရပါဘူး။ အရင်းတောင် မနည်းပြန်ရအောင် ကြိုးစားရတာ။ ဒီလိုကြုံတာ သုံးလေးနှစ် ဆက်တိုက်ပဲ၊ တောင်ယာ ဆက်လုပ်ဖို့တောင် အားမရှိဘူး စိတ်ဓာတ်တွေကျမိပါတယ်”ဟု နောက်ထပ် တောင်သူတစ်ဦးကလည်း မဲခေါင်သို့ ပြောသည်။
ပြီးခဲ့သည့် မိုးရာသီ ပြောင်းစစိုက်သည့်အချိန် တောင်သူများက မြို့ပေါ်သို့ မြေသြဇာ တက်ဝယ်ချိန်လည်း ယင်းဂိတ်ရှိ စစ်သားများက မြေဩဇာတစ်အိတ် ကျပ် ၁၀၀၀ တောင်းသဖြင့် ပေးခဲ့ရသေးကြောင်း ဒေသခံတောင်သူများက ပြောသည်။
ထို့ပြင် ယင်းဂိတ်များတွင် တာဝန်ချိန်ကျသော စစ်သားများသည် နေ့စဉ်လိုလို အရက်မူးနေပြီး ခရီးသွားနှင့် ကုန်တင်ကားများကိုလည်း ကြမ်းတမ်းစွာဆဲဆိုခြင်း၊ ရစ်ခြင်း၊ လိုအပ်သည်ထက် စစ်ဆေးခြင်းများ ပြုလုပ်လျက်ရှိကြောင်း ဒေသခံများထံမှ သိရသည်။
#MeKongNews
#ဆီဆိုင်
#တောင်သူ
#စစ်ကောင်စီ
#ငွေတောင်းကြမ်း
