မဲခေါင်၊ နိုဝင်ဘာ ၂၁
ရှမ်းပြည်တောင်ပိုင်း၊ ပအိုဝ်းဒေသ၌ PNO ပြည်သူ့စစ် နှင့် စစ်ကောင်စီ၏ ပြည်သူ့စစ်မှုထမ်း နှစ်မျိုးစလုံးအတွက် အိမ်တိုင်းကျပ်သိန်းချီ ပေးနေရသဖြင့် မတတ်နိုင်ကြတော့ ဟု ဆီဆိုင်ဒေသခံတစ်ဦးက မဲခေါင် သို့ပြောသည်။
လက်ရှိတွင် နိုဝင်ဘာ ၁၇ ရက်က ဖွင့်သွားသည့် ပြည်သူ့စစ်မှုထမ်းအပတ်စဥ် (၁၉) အတွက် PNO ပြည်သူ့စစ်ထဲ ဝင်ပြီးသူများပါ ကင်းလွတ်ခွင့်မရဘဲ ပါသွားရသည် ဟု ဒေသခံများကဆိုသည်။
“ပြောတုန်းက PNO လုပ်ပြီးရင် ဗမာတပ်ထဲမခေါ်တော့ဘူးပြောတာ၊ အခု နံမည်ပါတော့ မသွားလို့မရဘူးတဲ့၊ မသွားရင် သိန်း ၇၀ အနည်းဆုံးပေးရမယ် တောင်းတာ။ PNO ယူနီဖောင်းကအစ ဝယ်ဝတ်ရတာ ထည့်ခဲ့ရတဲ့ ငွေတွေအများကြီး အခု စစ်ထဲပါသွားရပြီ” ဟု ဆီဆိုင်ဒေသခံ မိသားစုဝင်တစ်ဦးက ၎င်း၏တူ ပါသွားသည့် အခြေအနေအား မဲခေါင်သို့ ပြောသည်။
စစ်တပ်က စစ်မှုထမ်းဥပဒေ ပြဌာန်းပြီးနောက် ၂၀၂၄ ခုနှစ်၊ မတ်လမှစပြီး ပြည်သူ့စစ်မှုထမ်းအတွက် လူငှားထည့်ရန် တစ်ရွာလုံးငွေကောက်ပြီး သတ်မှတ်နှုန်းတိုင်း လစဉ်ထည့်နေကြရာမှ ယခုတွင် ငွေသာမက လူပါထည့်နေရကြောင်း သိရသည်။
ရွာအရွယ်အစားပေါ် မူတည်၍ လူဦးရေနည်းသည့် ရွာငယ်ဆိုပါက တစ်အိမ် ကျပ်တစ်သိန်းမှ ၂ သိန်း အထိပေးရသကဲ့သို့၊ လူဦးရေများသည့် ရွာကြီးဆိုလျှင် တစ်အိမ် အနည်းဆုံး နှစ်သောင်းကျပ်မှ စပြီး ထည့်နေရကြောင်း သိရသည်။
“ဗမာစစ်မှုထမ်း အတွက်သာမဟုတ်ဘူး PNO ပြည်သူ့စစ်အတွက်လည်း ကောက်ပါတယ်။ နှစ်မျိုးနှစ်ခါ ကြုံနေရတာပါ” ဟု ဟိုပုံးဒေသခံတစ်ဦးက ပြောသည်။
ယင်းကဲ့သို့ နှစ်မျိုးစလုံးအတွက် ငွေပေးရသည့်အပြင် ပြည်သူ့စစ်မှုထမ်းအတွက် အသက် ၁၈ နှစ်မှ ၃၅ နှစ် အတွင်းသာ ခေါ်ယူသော်လည်း PNO ကမူ အသက် ၅၀ အထိ သတ်မှတ်ထားသဖြင့် အိမ်ထောင်ဦးစီးများ စီးပွားရှာနိုင်သည့် အခြေအနေမရှိကြတော့ ဟု ၎င်းက ပြောသည်။
“လယ်နဲ့စိုက်ပျိုးရေး အလုပ်တွေမှာ ယောင်္ကျားတွေ မရှိကြတော့ဘူး။ ပြည်သူ့စစ်က အလှည့်ကျလို့ မသွားနိုင်ရင် ငှားထည့်ရတာ၊ ဂိတ်စောင့်က တစ်ရက် ၅ သောင်းလောက်နဲ့ ရပေမယ့် ရှေ့တန်းဆိုမရတော့ဘူး။ ငွေမတတ်နိုင်လို့ မငှားနိုင်တော့ ကိုယ်တိုင်လိုက်ရတော့တာ” ဟု ပင်လောင်းဒေသခံတစ်ဦးက ပြောသည်။
လတ်တလောတွင် ပအိုဝ်းပါတီအပြင် ကြံ့ခိုင်ရေးပါတီကလည်း မဲဆွယ်နေရာ ပြည်သူ့စစ်ရော စစ်မှုထမ်းပါ မရှိအောင် လုပ်ပေးမည့် မည်သည့် ပါတီကိုမဆို မဲထည့်မည်ဆိုသော်လည်း၊ ယခုချိန်ထိ ငြိမ်းချမ်းရေးထက် စစ်ကိုသာ လိုလားသူများ ဖြစ်နေသဖြင့် မည်သည့်လူကြီး တစ်စုံတစ်ယောက်မျှ အားကိုး၍မရ ဟု တောင်ကြီး၊ ညိုမီးရပ်ကွက် နေသူတစ်ဦးက ဆိုသည်။
လက်ရှိတွင် ပြည်သူ့စစ်မှုထမ်း အပတ်စဥ် (၁၉) ဖွင့်လှစ်သွားပြီးနောက် နောက်လာမည့် အပတ်စဥ်များအတွက် စတင် ငွေကောက်ခံနေကြောင်း သိရသည်။
#MeKongNews
#ပအိုဝ်းဒေသ
#စစ်မှုထမ်းကြေး
#PNO
#စစ်ကောင်စီ
