မဲခေါင်၊ နိုဝင်ဘာ ၁၅

ကရင်နီပြည်နယ်၊ ဖရူဆိုမြို့နယ် အနောက်ခြမ်းရှိ စိန်တောင်တန်းစစ်ရှောင်စခန်းတွင် ရာသီတုပ်ကွေး အဖြစ်များနေကြောင်း စစ်ရှောင်များထံမှ သိရသည်။

တုပ်ကွေးရောဂါ ဖြစ်ပွားသူများသည် အဖျားကြီးခြင်း၊ မေ့မြောခြင်း၊ ထုံထိုင်းခြင်း၊ လည်ချောင်းနာခြင်း၊ အသက်ရှူရခက်ခဲခြင်း၊ ရင်ဘတ်အောင့်ခြင်း၊ မူးဝေ့ခြင်း၊ ရေဓာတ်ခန်းခြောက်ခြင်းတို့ကို ခံစားနေရကြောင်း ၎င်းတို့က ပြောသည်။

“ကလေးနဲ့ အသက်ကြီးတဲ့သူတွေ အဖြစ်များတယ်။ အရင်လကကတည်းက စဖြစ်ကြတာ ခုထိဘဲ။ တစ်ယောက်နဲ့ တစ်ယောက်ကူးတယ်၊ တစ်ယောက်က နေကောင်းသွားရင် နောက်တစ်ယောက်က ဖျားတယ်။ နေကောင်းပြီးသူလည်း ပြန်ပြီးဖျားကြတယ်။ စခန်းမှာပဲ ဆေးပေးခန်းရှိတော့ အဲမှာပဲပြန်ကုကြတယ်” ဟု စစ်ဘေးရှောင်တစ်ဦးက မဲခေါင်သို့ ပြောသည်။

ယင်းစစ်ရှောင်စခန်းတွင် အိမ်ထောင်စု ၁၂၅ စုရှိပြီး လူဦးရေ ၅၀၀ ကျော် ရှိသည့်အနက် လူဦးရေ ၃၀၀ ကျော် ရာသီတုပ်ကွေး ဖြစ်ပွားနေကြောင်း သိရသည်။

ဖရူဆိုဒေသ၌ စစ်ရှောင် ၅၀၀၀ ဝန်းကျင်ရှိပြီး အလှုရှင်လည်းမရှိဘဲ စားသောက်ရေးကို ဖြစ်သလိုသာ ဖြေရှင်းစားသောက် နေရခြင်းကြောင့် ကလေးငယ်အများစုလည်း အာဟာရဓာတ် ချို့တဲ့နေကြကြောင်း သိရသည်။

#MeKongNews
#ဖရူဆို
#စစ်ရှောင်စခန်း
#ရာသီတုပ်ကွေး #စိန်တောင်တန်း

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)