မဲခေါင်၊ နိုဝင်ဘာ ၁၆
အောက်တိုဘာလမှစတင်ပြီး မြန်မာစစ်ကောင်စီက ထိုင်း-မြန်မာနယ်စပ် မြ၀တီမြို့ရှိ နာမည်ဆိုးနှင့် ကမ္ဘာကျော်သော KK Park ကျားဖြန့်ဝင်းအား စီးနင်းဖောက်ခွဲဖျက်ဆီးနေရာ ထွက်ပြေးလွတ်မြောက်လာ သူများစွာရှိသလို ပြန်လည်ရှင်းလင်းပြောပြမှုများအရ ထိုဝင်းအတွင်းလူကိုယ်တွင်းအင်္ဂါများ ထုတ်ယူကာ မှောင်ခိုစျေးကွက်အတွင်းသို့ ရောင်းချရာတွင် ခွဲစိတ်ထုတ်ယူသည့် အထူးကုဆရာဝန်များ၊ ဆေးရုံအဆောင်များရှိခဲ့သည်ဟု သိရသည်။
ယင်းကျားဖြန့်ဝင်းအတွင်း အထင်ရှားဆုံးသော လူကိုယ်တွင်းအင်္ဂါ ထုတ်ယူရောင်းစားသည့် ကိစ္စများထဲ ဘီလာရုစ်သူ ဗဲရာကရက်ဗ်ဆိုဗာနှင့် ကင်ညာသူ ဂရေစ်မာတာတို့ကိစ္စများဖြစ်ခဲ့သည်။
အသက် ၂၆ နှစ်ရှိပြီဖြစ်သော ငယ်ရွယ်ချောမောသည့် ဘီလာရုစ်နိုင်ငံသူ အဆိုတော်မလေး ဗဲရာသည် ၂၀၂၅ ခုနှစ် စက်တင်ဘာ ၁၂ ရက်က လစာအလွန်ကောင်းသော မော်ဒယ်လုပ်ငန်းလုပ်ရန် လိမ်ခေါ်ခံရမှု ကြောင့် ဘန်ကောက်သို့ စတင်ရောက်ရှိလာပြီး တစ်ပတ်အတွင်းမှာပင် မြန်မာနယ်စပ် ကျားဖြန့်ဝင်းသို့ ရောက်ရှိခဲ့ရကြောင်း၊ ချောမောပြီးငယ်ရွယ်သူဖြစ်သောကြောင့် ချမ်းသာသည့်နိုင်ငံတကာမှ အမျိုးသား များကို ပစ်မှတ်ထား ငွေလိမ်ရသည့်အလုပ်ကို ခိုင်းစေခံရပြီး မိခင်ဖြစ်သူသည် အောက်တိုဘာ ၄ ရက်၌သာ နောက်ဆုံးအကြိမ်အဖြစ် သမီးဖြစ်သူ ဗဲရာနှင့် အဆက်အသွယ်ရပြီးနောက် ပြန်ပေးငွေ ဒေါ်လာ ၅ သိန်းတောင်းကြပြီး မပေးနိုင်သဖြင့် ရက်ပိုင်းအကြာ၌ ကိုယ်တွင်းအင်္ဂါထုတ်ယူကာ ရောင်းစားလိုက်ပြီး အလောင်းကို မီးရှို့လိုက်ပြီဟု မက်ဆေ့ချ်ပို့လာခဲ့ သည်ဟု သိရသည်။
ကင်ညာသူ ဂရေ့စ်မာတာသည်လည်း ၂၂ နှစ်သာရှိသေးကာ ချောမောလှပသူဖြစ် ပြီး KK Park သို့ရောက်အပြီး ၄ လအကြာတွင် ကိုယ်တွင်းအင်္ဂါများ ထုတ်ယူခံရကာ ထိုင်းဘက်ခြမ်း သို့ သတိလစ်ပြီး ပြင်းထန်စွာဖျားနားပြီးရောက်ရှိလာသူဖြစ်သည်။
မဲဆောက်တွင် အခြေစိုက်ကာ ကျားဖြန့် ဓားစာခံများနှင့် လူမှောင်ခိုကူးခံရသူများကို ကူညီကယ်ဆယ်ရေးလုပ်နေသည့် Global Alms အဖွဲ့မှ စီအီးအို Mechelle Moore က ဂရေ့စ်မတာသည် KK Park ဆေးရုံတွင် တရားမဝင် ကိုယ်တွင်းအင်္ဂါ ထုတ်ယူခံရပြီး မဲဆောက်သို့ သတိလစ်ရောက်ရှိလာကြောင်း၊ မိသားစုနှင့် တွေ့ဆုံနိုင်ရန် ဆက်သွယ်ပေး ပြီး အသက်ဆက်နိုင်ရေး အသက်ကူကိရိယာများ တပ်ဆင်ထားရှိပေးသော်လည်း မည်သို့မျှ မရှင်သန် နိုင်တော့သဖြင့် အသက်ကူကိရိယာများကို သူမကိုယ်တိုင် ဖြုတ်ခဲ့ရသည်ဟု ပူလစ်ဇာစင်တာသို့ ပြော ကြားသွားခဲ့သည်။
အသက် ၂၄ နှစ်အရွယ် ဆိုက်ဘေးရီးယားသူ ဒါရှီနီမာအိုချာနီမာယီကာကိုလည်း KK Park ကျားဖြန့်ဝင်းထဲ၌ပင် ကိုယ်တွင်းအင်္ဂါများ ထုတ်ယူရောင်းစားရန် စီစဉ်ခဲ့သေးသော် လည်း ထိုင်းရှိ ရုရှားသံအမတ်ကြီး တိုမီခင်ကိုယ်တိုင် ကြားဝင်စေ့စပ်ရာမှ အောင်မြင်စွာ ကယ်ထုတ်နိုင် ခဲ့သည့် မှတ်တမ်းလည်း ရှိသည်။
ယခုနောက်ဆုံး KK Park ကျားဖြန့်ငရဲခန်းမှ လွတ်မြောက်လာသည့် ရုရှားသူ ကေစီနာပန်တီလီဗာက မိမိ သည်လည်း ထိုင်းတွင် ဘာသာပြန်အလုပ်ဟု လိမ်ခေါ်ခံရပြီး လက်နက်ကိုင်စစ်သားများက သောင်ရင်း မြစ်ကို ဖြတ်ကျော်ခိုင်းပြီး KK Park သို့ ခေါ်ဆောင်ခဲ့ကြောင်း၊ KK Park မှ ၂ မိနစ်သွားစာ အကွာအဝေး၌ ရှိသည့် Paulin ဟုခေါ်သော အဆောင်တွင် အလုပ်လုပ်ရကြောင်း၊ ထိုအဆောင်မှာ လူများကို ရိုက်နှက် နှိပ်စက်သည့်အဆောင်ဖြစ်ကာ လိမ်လည်မှုအလုပ် ကောင်းစွာမလုပ်နိုင်သူများအား ပို့ဆောင်နှိပ်စက် ရာအဆောင်ဖြစ်ကာ ထိုသို့ နှိပ်စက်သည့်တိုင်း ထပ်မသုံးမဝင်နိုင်တော့လျှင် အနီးအနားရှိ ကိုယ်တွင်း အင်္ဂါများ ထုတ်ယူကာ မှောင်ခိုစျေးကွက်သို့ ပို့ဆောင်သည့် ခွဲစိတ်ရာ ဆေးရံဆောင်သို့ ပို့ခံရကြောင်း ပြောကြားခဲ့သည်။
၎င်းသည် ဘာသာပြန်မှုနှင့် လူမှုကွန်ရက်ပေါ် လိမ်လည်ပေးရမှုတွင် အသုံးကျနေသဖြင့်သာ ကံကောင်း ခဲ့ပြီး KK Park သို့ အလုပ်ဝင်ရန်နည်းမျိုးစုံဖြင့် ရောက်လာသူတိုင်းအား သွေးစစ်ခြင်းမှာ ကိုယ်တွင်း အင်္ဂါမှောင်ခိုစျေးကွက် လိုအပ်ချက်နှင့် ကိုက်ညီမှုရှိမရှိ မှတ်တမ်းထားရန် လုပ်ဆောင်ခြင်းဖြစ်သည်ဟု The Sun သို့ ပြောကြားသွားခဲ့သည်။
နယူးယောက်တက္ကသိုလ် ဂရော့စ်မန်းဆေးပညာသင်ကျောင်း၏ ဇီ၀ကျင့်ဝတ်ဆိုင်ရာ ပါမောက္ခ ဒေါက်တာအာသာကက်ပလန်က ကိုယ်တွင်းအင်္ဂါထုတ်ယူပြီး မှောင်ခိုစျေးကွက်တွင် ရောင်းစားခြင်းမှာ လွယ်ကူသည့်လုပ်ငန်းမဟုတ်သောကြောင့် KK Park ကျားဖြန့်ဝင်းအတွင်း အထူးကုဆရာဝန်များ၊ ခွဲစိတ် ဆေးရုံအဆောင်များရှိမည်မှာ သေချာကြောင်း၊ အလွန်ခေတ်မီသော ပြင်ဆင်တည်ဆောက်မှုရှိမှသာ လုပ်နိုင်စွမ်းရှိသည့်အရာဖြစ်ကာ ထုတ်ယူခံရသူသည် ကျန်းမာပြီးငယ်ရွယ်ရမည်၊ ခွဲစိတ်မှုတွင် စောင့်ကြည့်ရသည့် ဆေးဘက်ဆိုင်ရာ ပညာရှင်များစွာ ပါဝင်ရသည်ဟု သုံးသပ်ပြောဆိုသွားသည်။
တရုတ်နိုင်ငံသည် မြန်မာနှင့်အိမ်နီးချင်ဖြစ်နေခြင်းက ကိုယ်တွင်းအင်္ဂါမှောင်ခိုစျေးကွက်အတွက် လူကိုယ်တွင်းအင်္ဂါများကို အဆိုပါကျားဖြန့်ဝင်းများအတွင်း ထုတ်ယူပြီး ပေးပို့ရန် အချိန်မီနိုင်ကြောင်း၊ အချိန်မမီသည့် ဝေးလံမှုရှိလျှင် ကိုယ်တွင်းအင်္ဂါ အစားထိုးမှု မအောင်မြင်နိုင်ကြောင်း၊ ကမ္ဘာတွင် ကိုယ်တွင်းအင်္ဂါခွဲစိတ်လဲလှယ်ရန် လိုအပ်သူစုစုပေါင်း၏ ၁၀ ရာခိုင်နှုန်းသာ လှူဒါန်းသူများထံမှ ရရှိ နိုင်သဖြင့် ကိုယ်တွင်းအင်္ဂါမှောင်ခိုစျေးကွက်ကြီးသည် အလွန်ကြီးထွားလာနေပြီး အများအားဖြင့် ဆင်းရဲလွန်သဖြင့် ဆန္ဒအလျှောက် ကိုယ်တွင်းအင်္ဂါ ထုတ်ရောင်သူက မှောင်ခိုစျေးကွက်၌ အများဆုံး ဖြစ်ကြောင်း၎င်းက ပြောသည်။
ထို့နောက် KK Park ကျားဖြန့်ဝင်းအတွင်းမှ အဓမ္မ ကိုယ်တွင်းအင်္ဂါ ထုတ်ယူရောင်းချသည့် လုပ်ငန်းများမှ ရရှိကြောင်း၊ မှောင်ခိုစျေးကွက်၌ ကျောက်ကပ်ကဲ့သို့သော ကိုယ်တွင်းအင်္ဂါ တစ်ခု တန်ဖိုးသည် ဒေါ်လာ ၁၀၀၀၀၀ မှ ၁၀၀၀၀၀၀ အထိ စျေးပေါက်သဖြင့် ကျားဖြန့်ကွန်ရက်များ၌ လိုအပ် သည့်ဝယ်လက်ရှိပါက ကိုက်ညီသူများထဲမှ ကိုယ်တွင်းအင်္ဂါ ထုတ်ယူရောင်းစားခြင်းဖြစ်သည်ဟု သုံးသပ် ပြောဆိုသွားခဲ့သည်။
ကိုကလင်း
Ref:Thesun
#MeKongNews
#ကျားဖြန့်
#တရုတ်နိုင်ငံ
#ကရင်ပြည်နယ်
#မြဝတီ
