မဲခေါင်၊ နိုဝင်ဘာ ၁၅
PNO က ကောက်ခံသည့် စစ်မှုထမ်းစရိတ် လစဉ်ကျပ် ၃သိန်းကို မထည့်နိုင်သည့် ရှမ်းပြည်တောင်ပိုင်း၊ တောင်ကြီးမြို့နယ်၊ကျောက်တလုံးကြီးမြို့၊ ဝင်းယရွာနေသူတစ်ဦး၏ နေအိမ်ကို ပအိုဝ်းပြည်သူ့စစ် – PNO က ဖျက်ဆီးခဲ့ကြောင်း ဒေသခံများထံမှ သိရသည်။
ယင်းရွာနေ အသက် ၂၀ ကျော် လူငယ်တစ်ဦးသည် ထိုင်းနိုင်ငံတွင် အလုပ်လုပ်ကိုင်နေပြီး ရွာတွင်ကောက်ခံသော စစ်မှုထမ်းစရိတ် ကျပ် ၃ သိန်း မထည့်နိုင်သောကြောင့် ရွာရှိနေအိမ်ကို PNO တပ်သားများက နိုဝင်ဘာပထမပတ်အတွင်း လာရောက်ဖျက်ဆီးခဲ့ကြောင်း သိရသည်။
“ပိုက်ဆံမထည့်နိုင်လို့ဆိုပြီး ရွာမှာကျန်တဲ့ သူ့မိဘအိမ်ကိုဖျက်ဆီးတာ သူ့မိဘတွေလည်းရှိသေးတယ်။ သူတို့မိဘတွေကလည်း တစ်နေ့လုပ်မှ တစ်နေ့စားရတဲ့သူ အဆင်ပြေတဲ့သူတွေ မဟုတ်ဘူး။ အဲဒါ ၃ သိန်း မထည့်နိုင်တော့ အိမ်လာဖျက်ဆီးကြတယ်။ အခုဆို သူ့မိဘတွေက အမျိုးတွေရဲ့အိမ်မှာ သွားနေရတယ်။ သူများနိုင်ငံမှာ နေတာလွယ် တယ်၊ အဆင်ပြေတယ်လို့ သူတို့ထင်တာ။ စာနာစိတ်ကို လုံးဝမရှိတာ” ဟု ရွာခံတစ်ဦးက မဲခေါင်သို့ ပြောသည်။
ထို့ပြင် ရွာတွင်မရှိဘဲ ပြည်ပရောက်နေသော လူငယ်များမှာ စစ်မှုထမ်းစရိတ် တစ်နှစ်စာ ၆ သိန်းကျပ် ပြန်ပေးရကြောင်း သိရသည်။
မထည့်လျှင် လူမှုရေးပြစ်ဒဏ်ပေးခြင်း၊ ရွာမှနှင်ထုတ်ခြင်း၊ ခြိမ်းခြောက်ခြင်း၊ ပစ္စည်းများသိမ်းသွားခြင်းတို့ ပြုလုပ်လျက်ရှိကြောင်း သိရသည်။
ယင်းကိစ္စနှင့် ပက်သက်ပြီး PNO စစ်ဦးစီးချုပ် ဗိုလ်မှူးကြီးခွန်မြင့်အောင်နှင့် ဗိုလ်မှူးခွန်ထွန်းရွှေတို့ကို ဆက်သွယ်မေးမြန်းသော်လည်း ဖုန်းလက်ခံဖြေကြားခြင်း မရှိပေ။
PNO သည် စစ်ကောင်စီ အာဏာသိမ်းပြီးနောက် ပအိုဝ်းဒေသတွင် စစ်သားစုဆောင်းခြင်း၊ ငွေကောက်ခံခြင်း စသည့် လူအခွင့်အရေး ချိုးဖောက်မှုများ ပေါ်ပေါ်ထင်ထင် လုပ်ဆောင်လျက်ရှိကြောင်း ဒေသခံများထံမှ သိရသည်။
#MeKongNews
#PNO
#ကျောက်တလုံးကြီး
#တောင်ကြီး
#နေအိမ်ဖျက်ဆီး
