မဲခေါင်၊ နိုဝင်ဘာ ၅

ကျိုင်းတုံမြို့နယ်၊ လူဝင်မှုကြီးကြပ်ရေး ဦးစီးဌာနမှ မြို့နယ်ဦးစီးမှူး ဦးဝင်းကျော်သူမှာ ကျားဖြန့်များကို တရုတ်အစိုးရမှ အင်တိုက်အားတိုက် နှိမ်နင်းသည့် ၂၀၂၃ နှစ်ကုန်ပိုင်းမှ စတင်ကာ ကျားဖြန့်ခေါင်းဆောင်များ အပါအဝင် ကျားဖြန့်တရုတ််များကို မှတ်ပုံတင်အတု၊ စာရွက်စာတမ်းအတုနှင့် ပတ်စ်ပို့အတုများ ပြုလုပ်ကာ လွတ်အောင်ဆောင်ရွက်ပေးခဲ့ကြောင်း လဝက သတင်းအရင်းအမြစ်များထံမှ သိရသည်။

ယင်းသို့ ပြုလုပ်ပေးသူများထဲတွင် ကိုးကန့်ခေါင်းဆောင်ပိုင်းတစ်ဦး၏ ညီဖြစ်သူပါဝင်ပြီး ၂၀၂၃ ခုနှစ် နှစ်ကုန်ပိုင်းက ကျပ်သိန်း ၁၅၀၀ ရယူကာ မှတ်ပုံတင်နှင့် ပတ်စ်ပို့အတုကို နေ့ချင်းပြီး ဆောင်ရွက်ပေးခဲ့ကြောင်း၊ ယင်းနောက်ပိုင်းတွင် တရုတ်ကျားဖြန့်များကို မှတ်ပုံတင်အတု ကျပ်သိန်းရာချီရယူကာ ဆက်လက်ပြုလုပ်ပေးခဲ့သည်မှာ ယနေ့ထက်ထိဖြစ်ကြောင်း သတင်းရင်းမြစ်က ပြောသည်။

“လာအိုကို လေယာဉ်နဲ့အေးဆေးပြေးတာပါ။ တကယ်တမ်းက တရုတ်ကအလိုရှိနေတဲ့ကောင်ကို၊ လဝက က လုံးဝလာဘ်စားပြီး စာရွက်စာတမ်းအတုနဲ့ကို လွတ်အောင်လုပ်ပေးလိုက်တာပါ။ အခုထိလည်း တရုတ်တွေကို လုပ်ပေးနေတုန်းပဲ။ စစ်ဘက်အရာရှိတချို့ ကြားပွဲစားလုပ်တယ်” ဟု ၎င်းက ပြောသည်။

ကျိုင်းတုံ လဝကမှာ ဒေသခံများထံမှ လာဘ်စားရာတွင်လည်း နာမည်ကြီးနေပြီး အိမ်ထောင်စုစာရင်း၌ မွေးတိုးတစ်ယောက်ထည့်ပါက ကျပ် ၅သိန်း၊ စမတ်ကတ်တွင် အချက်အလက်မကိုက်လို့ ပြင်ဆင်ပါက ကျပ် ၂သိန်း စသည်ဖြင့် တောင်းခံကြောင်းလည်း ဒေသခံများထံမှ သိရသည်။

သက်ကြီးရွယ်အိုများကိုလည်း မောက်မာစွာ ဆက်ဆံကာ ငွေသာ တွင်တွင်တောင်းခံကြောင်း၊ ရုံးသို့ နံနက်အစောကတည်းက သွားရောက်တန်းစီသော်လည်း နောက်နေ့သို့ ပြန်လည်ချိန်းဆိုကြောင်း၊ ငွေပေးမှသာ မြန်မြန်ဆန်ဆန်ရကြောင်း ကျိုင်းတုံမြို့နေ ပြည်သူတစ်ဦးကလည်း ပြောသည်။

“တချို့တိုင်းရင်းသားတွေဆို စကားမတက်ဘူးဆို ပိုပြီးတော့တောင်ဆိုးတယ်။ အော်တယ်ငေါက်တယ်။ မနက်ခင်း အစောကြီးသွားတာတောင်မှ ဟိုနေ့လာခဲ့၊ ဒီနေ့လာခဲ့နဲ့။ တခါတလေ အဖိုးကြီး၊ အဘွားကြီးတွေဆို ဗိုက်ဆာလို့ သူတို့ကို ထိုင်စောင့်နေရတာ တစ်မျိုး။ အမျိုးမျိုး၊ အဖုံဖုံ ကြုံနေရပါတယ်။ ပိုက်ဆံပေးနိုင်တဲ့လူဆိုရင်တော့ အရမ်းကောင်းပါတယ်။ မပေးနိုင်လို့ရှိရင်တော့ မကောင်းဘူးပေါ့။ မှတ်ပုံတင် တစ်ခါလဲမယ်ဆိုရင် တစ်လလောက်ကြာတယ်။ ၅သိန်း၊ ၇သိန်း တတ်နိုင်ရင် ချက်ချင်းပဲရပါတယ်” ဟု ၎င်းကပြောသည်။

ကျိုင်းတုံမြို့နယ် လဝကမှူး ဦးဝင်းကျော်သူမှာ ကျိုင်းတုံမြို့တွင် ၄ နှစ်ကျော် ကြာမြင့်ပြီဖြစ်ပြီး အထက်လူကြီးများကို ပေးကမ်းနိုင်သည့်အတွက် အနေကြာခြင်းဖြစ်ကြောင်း လဝက သတင်းရင်းမြစ်များက ပြောသည်။

#MeKongNews
#ကျိုင်းတုံ
#လဝက
#ကျားဖြန့်
#ဝင်းကျော်သူ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)