မဲခေါင်၊ အောက်တိုဘာ ၃၁
အောက်တိုဘာ ၂၁ ရက်နေ့က အမေရိကန်အခေါ် မိုးပျံချာနိုဘိုင်းဆိုသည့် 9M730 Burevestnik နျူကလီးယားတင်ဆောင်နိုင်သော ဒုံးကျည်သစ်ကို စမ်းသပ်ပစ်လွှတ်ပြီးနောက် ပူတင်သည် အောက်တိုဘာ ၂၈ ရက်တွင် နောက်ထပ် မဟာဗျူဟာ နျူကလီးယားလက်နက်ဖြစ်သော ရေငုပ် သင်္ဘောမှ ပစ်လွှတ်သည့် ပိုဆိုက်ဒွန် စူပါတိုပီဒို ဒုံးကျည်ကို စမ်းသပ်ပစ်လွှတ်ကာ အလွန်အောင်မြင်ခဲ့သည်ဟု ထုတ်ပြန်သွားခဲ့သည်။
9M730 Burevestnik ကို ရုရှားမှ ပေါက်ကွဲသွားသော နျူကလီးယားစက်ရုံကြီး ချာနိုဘိုင်းနှင့် နှိုင်းရခြင်းမှာ ပစ်ခံရသည့် နိုင်ငံပျက်စီးမှုထက် ပစ်ခတ်ရန် စမ်းသပ်ရမှုများ၊ စတင်ပစ်ခတ်မှုများတွင် လမ်းတစ်လျှောက် ရေဒီယိုသတ္တိကြွမှုများက ရုရှားကိုသာ ပိုထိခိုက်စေမည်ဖြစ်သောကြောင့်ဟု ဆိုကာ နာမည် ပေးခဲ့ခြင်းဖြစ်သည်။
ယခု ရေငုပ်သင်္ဘောမှ ပစ်လွှတ်အင်ဂျင်ပါတပ်ဆင်စမ်းသပ်ပစ်ခတ်မှုတွင် ပိုဆိုက်ဒွန် စူပါတိုပီဒို လုပ်ငန်း ဆောင်တာသည် အလွန်အောင်မြင်သဖြင့် ပန်းကန်ပြားပေါ်မှ ဘီစကစ်ကဲ့သလို့ အသင့်စားရန်သာ လိုတော့ကြောင်းနှင့် ရေအောက် တိုပီဒိုဖြစ်သောကြောင့် မည်သူမျှ တားဆီးနိုင်ရန်မရှိသလို မိမိတို့ပိုင် Sarmat တိုက်ချင်းပစ် နျူကလီးယားဒုံးကျည်ထက်ပင် ပိုမိုပြင်းထန်ထိရောက်သည်ဟု ပူတင်ဘက်က ကြုံးဝါးသွားခဲ့သည်။
ယင်းပိုဆိုက်ဒွန်တော်ပီဒိုသည် ရေအောက်အနက် ပေ ၃၀၀၀ အထိငုပ်ကာ တစ်နာရီ ၁၁၅ မိုင်နှုန်းဖြင့် ပစ်မှတ်ကို ပစ်ခတ်နိုင်သလို ပစ်မှတ်ကမ်းရိုးတန်းအရောက် နျူကလီးယားတင်ဆောင်ဖောက်ခွဲလျှင် ရေဒီယိုသတ္တိကြွမှုဆူနာမီလှိုင်းများရိုက်ခတ်မှုက မည်သူမျှ ကမ်းခြေဒေသများတွင် ဆက်နေမရစေသည်အထိ ပြင်းထန်ထိရောက်သည်ဟု ရုရှားဘက်က ထုတ်ပြန် သတိပေးထားသည်။
လုံခြုံရေးအထူးကျွမ်းကျင်သူ ဖိလစ်အင်ဂရမ်ကမူ ရုရှားသည် အဆိုပါ ပိုဆိုက်ဒွန် တိုပီဒိုကို နျူကလီးယားထိပ်ဖူးတပ်ပြီး စမ်းသပ်သည်ဆိုခြင်းမှာ မဖြစ်နိုင်ကြောင်း၊ တစ်ခါ စမ်းသပ်လျှင်ပင် ရေဒီယိုသတ္တိကြွမှုကို အဆိုပါ သက်ရောက်နယ်မြေတစ်လျှောက် ခံရနိုင်မည်ဖြစ်သောကြောင့် တကယ် တမ်း ရွေးချယ်စရာလမ်းမရှိတော့မှသာ နျူကလီးယားထိပ်ဖူးတပ်ကာ ပစ်ခတ်လိမ့်မည်ဟု သုံးသပ်သွားခဲ့သည်။
ရုရှားဘက်မှ ယခုလို အမေရိကန်နှင့် သဘောတူထားခဲ့သော နျူကလီးယားလက်နက်များ မစမ်းသပ်ရသဘောတူညီချက်ကို ဖျက်သိမ်းပြီး ယခုလို နျူကလီးယားလက်နက်များ စမ်းသပ်ပစ်ခတ်နေသဖြင့် ဒေါ်နယ်ထရမ့်ကလည်း နှစ် ၃၀ ကြာ ရပ်ဆိုင်းထားသော နျူကလီးယားလက်နက် စမ်းသပ်ပစ်ခတ်မှုများကို ပြန်လည်လုပ်ဆောင်ရန် အမေရိကန်သမ္မတ ဒေါ်နယ်ထရမ့်ကလည်း ပင်တဂွန်သို့ အောက်တိုဘာ ၂၉ ရက်တွင် အမိန့်ပေးခဲ့သည်။
ကိုကလင်း
Ref:Thesun
#MeKongNews
#ရုရှား
#ပိုဆိုက်ဒွန်
#တိုပီဒို
#နျူကလီးယား
