မဲခေါင်၊ အောက်တိုဘာ ၂၉
ဆူဒန်နိုင်ငံ၊ ဒါဖာမြောက်ပိုင်းမြို့တော် အယ်လ်ဖက်ရှာကို တော်လှန်လက်နက်ကိုင်တပ် Rapid Support Forces (RSF) မှ ၁၈ လကြာ ထိုးစစ်ဆင်နေရာမှ ပြီးခဲ့သည့် ၂ ရက်အတွင်း မြို့သိမ်းပိုက်သွားနိုင်ကာ ထို ၂ ရက်အတွင်းမှာပင် ပြည်သူ ၂၀၀၀ ကျော်ကို လူမျိုးရေးမုန်းတီးမှုဖြင့် သတ်ဖြတ်ခဲ့သည်။
အောက်တိုဘာ ၂၆ နှင့် ၂၇ ရက် ၂ ရက်အတွင်းမှာပင် RSF တပ်များသည် အမျိုးသမီးနှင့်ကလေးများစွာကို တစ်အိမ်ထွက်တစ်အိမ်ဝင်၊ တံခါးပေါက်များလိုက်ခေါက်ကာ ရက်စက်စွာဖြင့် အစုလိုက်အပြုံလိုက် သတ်ဖြတ်နေခြင်းဖြစ်ပြီး ဂြိုဟ်တုဓာတ်ပုံများမှာပင် အလောင်းများပျံ့ကျဲနေခြင်းနှင့် မြေပြင်များပေါ် သွေးကွက်များ နီရဲအရောင်ပြောင်းနေသည်ကို ထင်ရှားစွာ မြင်တွေ့နေရသည်။
လူ့အခွင့်အရေးအဖွဲ့အစည်းများစွာက RSF တပ်၏ လုပ်ရပ်မှာ လူမျိုးစု အစုလိုက်အပြုံလိုက်မျိုးတုံး သတ်ဖြတ်နေသည့် အနေအထားမျိုးဖြစ်ကာ အာရပ်လူမှုအသိုင်းအဝိုင်းမဟုတ်သည့် လက်နက်ကိုင် များနှင့် အာရပ်လက်နက်ကိုင် အစိုးရတပ်များအကြား ၂ နှစ်ကြဖြစ်ပွားသည့် ပြည်တွင်းစစ်အတွင်း အလွန်ဆိုးရွားသည့် သတ်ဖြတ်မှုဟု ဝေဖန်ရှုတ်ချနေကြသည်။
အယ်လ်ဖာရှာမြို့ကို RSF တပ်များ ပိတ်ဆို့ထားသည်မှာ ၁၈ လရှိပြီး ပြည်သူ ၂၆၀၀၀၀ ပိတ်မိနေရာတွင် တစ်ဝက်မှာ ကလေးများဖြစ်နေပြီး လက်ရှိ ဆူဒန်အစိုးရတပ်များ ဆုတ်ခွာသွားရချိန် ယခုလို သုတ်သင် သတ်ဖြတ်မှုများ ဖြစ်လာခြင်းဖြစ်ကာ ရက်ပိုင်းအတွင်း နောက်ထပ် လူပေါင်းများစွာ သတ်ဖြတ်ခံရနိုင် ကြောင်း သုံးသပ်နေကြသည်။
RSF တပ်သည် ၂၀၂၃ ခုနှစ်က အယ်လ်ဂီနိုင်နာမြို့ကို သိမ်းစဉ်ကလည်း အရပ်သား ၁၅၀၀၀ ကို သတ်ဖြတ်ခဲ့သေးသည်။
ကုလသမဂ္ဂလူ့အခွင့်အရေးအဖွဲ့ အကြီးအကဲ ဗိုလ်ကာတာ့ခ်က လူမျိုးကွဲပြားမှုကို အကြောင်းပြုပြီး သတ်ဖြတ်နေသည်က ဆူဒန်တွင် တစ်နေ့တခြားပိုဆိုးလာပြီး ပြည်တွင်းစစ်ပွဲကာလအတွင်း ပြည်သူ ၁၄ သန်းနေအိမ်စွန့်ခွာထွက်ပြေးရခြင်း၊ လူပေါင်း ၁၅၀၀၀၀ သေဆုံးခဲ့ရခြင်းအား မတားဆီးနိုင်ခြင်းကြောင့် မိမိတို့ ကုလအနေဖြင့် ရှက်သလို ကျူးလွန်သူများအနေနှင့်လည်း ရှက်စရာကောင်းလွန်နေပြီဖြစ်သည် ဟု ပြောသွားခဲ့သည်။
ဆယ်စုနှစ်ပေါင်းများစွာ ငြိမ်းချမ်းမှုမရှိခဲ့သော ဆူဒန်နိုင်ငံတွင် ၂၀၂၃ ခုနှစ် ဧပြီလမှ စတင်က ဗိုလ်ချုပ် အဘဒယ်ဖက်တက် အယ်လ်ဘာဟမ်ဦးဆောင်သော တပ်နှင့် ဗိုလ်ချုပ် မိုဟာမက်ဟမ်ဒန်ဒါဂါလိုတို့ ဦးဆောင်သော တပ် နှစ်ခြမ်းကွဲပြီး အလုံးစုံ ပြည်တွင်းစစ်ဖြစ်ပွားခဲ့ခြင်းဖြစ်သည်။
ကုလသမဂ္ဂက ဆူဒန်သည် ကမ္ဘာတွင် လူသားချင်းစာနာမှုဆိုင်ရာ ကပ်ဆိုးအကြီးမားဆုံးဆိုက်ကပ်ရောာ နိုင်ငံဖြစ် နေပြီဟုလည်း သတ်မှတ်ထုတ်ပြန်ထားသည်။
ကိုကလင်း
Ref: Thesun
#MeKongNews
#ဆူဒန်
#လူမျိုးတုံးသတ်ဖြတ်မှု
#ကုလသမဂ္ဂ
#ပြည်တွင်းစစ်
