မဲခေါင်၊ အောက်တိုဘာ ၂၆
ပအိုဝ်းပြည်သူ့စစ်ပါတီနှင့် မဟာမိတ်ပြုထားသည့်အတွက် ယခင်က ဝင်ရောက်ယှဥ်ပြိုင်ခဲ့ခြင်းမရှိသည့် ရှမ်းပြည်တောင်ပိုင်း၊ ပအိုဝ်းဒေသမှ မဲဆန္ဒနယ်များတွင် ကြံ့ခိုင်ရေးပါတီက မဟာမိတ်ဖျက်က ကွက်ပြည့်ရွေးကောက်ပွဲဝင်မည်ဖြစ်ကြောင်း သိရသည်။
နိုင်ငံတကာက အတုအယောင်ရွေးကောက်ပွဲဟု သတ်မှတ်ထားသည့် ယခုစစ်ကောင်စီပြုလုပ်မည့် ရွေးကောက်ပွဲတွင် ကြံ့ခိုင်ရေးပါတီက ၎င်း၏ မဟာမိတ်ပါတီ နယ်မြေများတွင်ပါ ရွေးကောက်ပွဲဝင်ခြင်းမှာ အတွင်းစည်းမဟာမိတ်ကို ဖျက်လိုက်ခြင်းဖြစ်ကြောင်း ရှမ်းပြည်အခြေစိုက် နိုင်ငံရေးလေ့လာသူတစ်ဦးက မဲခေါင်သို့ပြောသည်။
“ပအိုဝ်းဒေသမှာ USDP က ဝင်ပြိုင်မယ်လို့ သိရတယ်။ ၂၀၁၀၊ ၂၀၁၅၊ ၂၀၂၀ တွေတုန်းက ဝင် မပြိုင်ဘူးပဲ။ PNO ကို မိတ်ဖက်အနေနဲ့မထားဘဲ အတွင်းစည်း မိတ်ဖျက်တဲ့သဘောပေါ့။ ကွက်ပြည့်ကစားတဲ့နိုင်ငံရေးပွဲမှာ ပအိုဝ်းပါတီကို နေရာမပေးတဲ့အနေအထားပဲ။ လက်ရှိ ဒေသဥက္ကဌ ဖြစ်တဲ့ ဗိုလ်မှူးကြီးဟောင်း ခွန်ရဲထွေးလည်း ရွေးကောက်ပွဲကို USDP အနေနဲ့ပဲ ဝင်မယ်” ဟု ၎င်းက ဆိုသည်။
ယခင်က USDP အနေဖြင့်မဟုတ်ဘဲ ပအိုဝ်းအမျိုးသားများကိုသာ ပအိုဝ်းဒေသအုပ်ချုပ်ရေးတွင် နေရာပေးရာက ယခုအခါ နိုင်ငံရေးအရပါ နေရာယူလွှမ်းမိုးလာခြင်းဖြစ်သဖြင့် စစ်ရေးအရလက်အောက်ခံအဖြစ် PNO ပြည်သူ့စစ်၊ အုပ်ချုပ်ရေးအရ USDP ပါတီဝင်ကို ဒေသဦးစီးဥက္ကဌအပြင် ယခု နိုင်ငံရေးလက်အောက်ခံအဖြစ်ပါ သတ်မှတ်လုပ်ဆောင်လာခြင်းဖြစ်သည်ဟု ရှမ်းပြည်အခြေစိုက် နိုင်ငံရေးလေ့လာသုံးသပ်သူများက သုံးသပ်ပြောဆိုသည်။
ယခင်က ပအိုးဝ်မဲဆန္ဒနယ်မြေအတွင်း ကျားဖြူပါတီတစ်ခုသာ ဝင်ရောက်ယှဥ်ပြိုင်ခဲ့သလို တိုင်းရင်းသားနေရာများတွင်လည်း ဗမာနှင့်ရှမ်းများသာ ဝင်ရောက်ခဲ့သည်။
လက်ရှိ စစ်တပ်၏ UEC ၏ ထုတ်ပြန်ချက်အရ လွှတ်တော် အဆင့်ဆင့်တွင် နိုင်သူအကုန်ယူ စနစ်တွင် ဝင်ရောက်ယှဥ်ပြိုင်သူ၏ ကိုယ်ရေးဖော်ပြချက် Profile ဖြင့် ဝင်ရောက်ယှဥ်ပြိုင်ရမည်ဖြစ်ပြီး အချိုးကျ PR စနစ်ဖြင့်တွက်ချက်ပုံအဖြစ် လူ အစား ပါတီ အနေဖြင့် ယှဥ်ပြိုင်ရမည်ဟု အကြမ်းဖျဥ်း သိရသည်။
စစ်တပ် UEC ကပြုလုပ်မည့် ရွေးကောက်ပွဲမှာ အပိုင်းလိုက်ပြုလုပ်မည်ဖြစ်ပြီး အပိုင်း ၁ ကို လာမည့် ဒီဇင်ဘာ၂၈ ရက်တွင်ပြုလုပ်မည်ဖြစ်ပြီး အာဆီယံ အပါအဝင် နိုင်ငံတကာမှ အတုအယောင်ရွေးကောက်ပွဲအဖြစ် သတ်မှတ်ထားသည်။
#MeKongNews
#စစ်ကောင်စီ
#အတုအယောင်ရွေးကောက်ပွဲ
#ပအိုဝ်းဒေသ
#ကြံ့ခိုင်ရေးပါတီ
