မဲခေါင်၊ အောက်တိုဘာ ၂၂
တရုတ်နှင့်နိုင်ငံတကာ ဖိအားများကြောင့် နာမည်ကြီး ကျားဖြန့်ကွန်ရက်ကြီးရှိရာ ဆာခေးယိုခရိုင်ရှိ ကျားဖြန့်လုပ်ငန်းများကို ကမ္ဘောဒီးယားအစိုးရက နှိမ်နင်းပြနေရာ ထိုကျားဖြန့်များသည် ထိုင်းနယ်စပ် ကမ္ဘောဒီးယားဘက်ခြမ်း ဆာရင်ခရိုင် အော်ဒါမင်ချေးခရိုင်ခွဲ အိုဆမက်ချ်နယ်စပ်နေရာသို့ ပြောင်းရွှေ့အခြေချနေကြောင်း ထိုင်းအာဏာပိုင်များက ထုတ်ပြန်ပြီး အထူးစောင့်ကြည့်နေသည်ဟု ထုတ်ပြန်သွားခဲ့သည်။
ယင်းနေရာသစ်သည် ထိုင်း-ကမ္ဘောဒီးယားနယ်စပ်ဂိတ်ချောင်ချွန်းနှင့် နီးကပ်စွာတည်ရှိနေပြီး ယခင်က ကြီးမားသည့် ကာစီနိုအဆောက်အအုံကြီး ၂ ခုသာ ရှိရာမှ ယခုထိုအဆောက်အအုံများအတွင်း ကျားဖြန့် ရုံခန်းများစွာ ငှားစားထားသလို ထောင်ချီသော ကျားဖြန့်သမားများ ရောက်ရှိလာနေကြောင်း၊ ဘေးပတ်ပတ်လည်တွင်လည်း ကျားဖြန့်လုပ်ငန်းအခြေချမည်ဟု ယုံကြည်ရသည့် အဆောက်အအုံသစ် များစွာ တည်ဆောက်နေသည်မှာ ပြီးစီးလုနီးပါး အခြေအနေရောက်နေသဖြင့် အလုံးအရင်းဖြင့် ကျားဖြန့်ကွန်ရက်များ ထိုနေရာသို့ ပြောင်းရွှေ့ အခြေချလာတော့မည်ဟု ကပ်ချိုအန်ခရိုင်အုပ်ချုပ်ရေး မှူး ဆစ်သီယော့ချာရိုအန်သန်နာဆက်က ထုတ်ဖော်ပြောဆိုသွားခဲ့သည်။
ထိုင်းစစ်တပ်၊ ရဲတပ်ဖွဲ့ ၊ ဒေသဆိုင်ရာ အေဂျင်စီများပူးပေါင်းပြီး ယင်းနယ်စပ်ဒေသများတွင် အနီး ကပ်စောင့်ကြည့်လေ့လာနေကြကာ လုံခြုံရေးအတွက် ထိုင်းဘက်မှ သံဆန်ခါခြံစည်းရိုးများ ကာရန်ခြင်းနှင့် စီစီတီဗီများတပ်ဆင်ခြင်းများကို လုပ်ဆောင်တော့မည်ဟုလည်း သိရသည်။
မကြာသေးမီက အိုဆမက်ချ် ဆောက်လုပ်ရေးလုပ်ငန်းမှ အင်ဒိုနီးရှားသား ၈ ယောက် ထိုင်းဘက်သို့ ထွက်ပြေးလွတ်မြောက်လာပြီးနောက် ကျားဖြန့်လုပ်ငန်းများ အခြေစိုက်နေရာသစ်အဖြစ် အိုဆမက်ချ် သို့ လာရောက်ရန် အဆောက်အအုံများစွာ တိုးချဲ့နေခြင်းဖြစ်သည်ဟု သတင်းပေးခဲ့သည်။
ယခင် ထိုင်းနှင့်ကမ္ဘောဒီးယားတို့ နယ်စပ်တွင် ပူးပေါင်းကာ ကျားဖြန့် နှိမ်နင်းမှုများလုပ်ခဲ့သော်လည်း နှစ်နိုင်ငံ နယ်စပ်စစ်ပွဲဖြစ်ပွားပြီးနောက် အဆက်အဆံမရှိတော့သဖြင့် ထိုင်းနယ်စပ်တစ်လျှောက် ကမ္ဘောဒီးယား ကျားဖြန့်ရပ်ဝန်းသစ်များ ထပ်မံတိုးပွားလာမည်ကို စိုးရိမ်ရသည်ဟု ကပ်ချိုအန်ရဲစခန်းမှူး ကမ်ဖွန်နိုနွတ်ချ်ကလည်း ပြောဆိုသွားခဲ့သည်။
လက်ရှိကျားဖြန့်လုပ်ငန်းများသည် ရက်စက်မှုအဖုံဖုံရှိသော်လည်း ကျွမ်းကျင်သည့် လိမ်လည်သူဝန်ထမ်းများအတွက် ရရှိသည့် လိမ်လည်ငွေထဲမှ ၃၀ ရာခိုင်နှုန်းအထိ ဘောနပ်စ်ပေးနေ သဖြင့် စွန့်စားကာ လုပ်ကိုင်နေသူများလည်း တိုးပွားနေကာ ယခင် ကမ္ဘောဒီးယားကျားဖြန့်လုပ်ငန်း၌ တရုတ်လုပ်သားအများဆုံးရှိခဲ့သော်လည်း လက်ရှိတွင် အင်ဒိုနီးရှားသားအများဆုံးဖြစ်လာကာ ဗီယက်နမ်သားများလည်း တိုးပွားလာသည်ဟု သိရသည်။
ကိုကလင်း
Ref: Khaosod
#MeKongNews
#ကျားဖြန့်
#ကမ္ဘောဒီးယား
#ထိုင်းနယ်စပ်
#ဗီယက်နမ်
