မဲခေါင်၊ အောက်တိုဘာ ၁၈
ဒေါ်နယ်ထရမ့်ကြားဝင်စွမ်းဆောင်ပေးခြင်းကြောင့် အစ္စရေးနှင့် ဟားမက်စ်တို့ အပစ်အခတ်ရပ်စဲပြီး ငတ်မွတ်ခေါင်းပါးနေသော ဂါဇာတွင်းရှိပြည်သူများစွာအတွက် ကယ်ဆယ်ထောက်ပံ့ရေးကားများ မဝင်ရောက်လာမီ ပင်လယ်ကမ်းခြေ၌ ကမ္ဘာ့အကြီးဆုံး ငါးမျိုးစိတ် ဝေလငါးမန်းကြီးတစ်ကောင်အား ရာပေါင်းများစွာသော လူများ ကြိုးများဖြင့် တုပ်နှောင်ဖမ်းဆီးနေသည့် ရုပ်သံမှတ်တမ်းများ ထွက်ပေါ် လာသည်။
ခွန်းယူနစ်ရှိ ပင်လယ်ကမ်းနားတွင်း ယင်း ၁၀ မီတာအရှည်ခန့်ရှိ ဝေလငါးမန်းကြီးအား ဝိုင်းအုံနေမှု မြင်ကွင်းအရ သောင်လာတင်နေခြင်း သို့မဟုတ် တံငါသည်များက ဖမ်းဆီးလာနိုင်ခြင်း ဟုတ်၊ မဟုတ် သဲသဲကွဲကွဲမသိရသေးသော်လည်း ဝိုင်းဖမ်းဆီးနေသူများထဲမှ အသံများအရ “အစ္စရေးဟာ ငါတို့ကို စားဖို့သောက်ဖို့ ငါးမပေးတာ ၂ နှစ်ကြာခဲ့ပြီ။ ဒီနေ့တော့ စားဖို့ငါးကြီးကို ပေးလာပြီ” ဟု ပြောဆိုခဲ့ရာ ထိုငါးကြီးအား ဝိုင်းဝန်း ခုတ်ပိုင်းကာ ဝေမျှ စားသုံးလိုက်ဖွယ်ရှိသည်ဟု ယူဆနေကြသည်။
အစ္စရေးရှိ သဘာ၀ပတ်ဝန်းကျင် ထိန်းသိမ်းရေးအဖွဲ့ Sharks က ယင်းဝေလငါးမန်းကြီးသည် Ofek ဟု အမည်ပေးထားသော ငါးကြီးဖြစ်ကာ ယခင် မြေထဲပင်လယ်ကမ်းရိုးတန်းများတွင် မကြာခဏ မြင် တွေ့ရသည့် ဝေလငါးမန်းကြီးဖြစ်သည်ဟု ဆိုသည်။
ဝေလငါးမန်းမျိုးနွယ်သည် ပင်လယ် သမုဒ္ဒရာများ ထဲတွင် အကြီးဆုံးငါးမျိုးစိတ်ဖြစ်ကာ ၁၄ မီတာအရှည်အထိ ကြီးထွားတတ်သည်ဟု သိရသည်။
၎င်းတို့ သည် နှစ်ရာချီ အသက်ရှင်နေထိုင်နိုင်ကာ ပင်လယ်ကြမ်းပြင်မှ အပင်များ၊ ငါးလေးများကို စားသောက် တတ်သည်။
ကိုကလင်း
Ref:Thesun
#MeKongNews
#ဂါဇာ
#ဝေလငါး
#ဟားမက်စ်
#အစ္စရေး
