မဲခေါင်၊ အောက်တိုဘာ ၁၇
ရှမ်းမြောက်တွင် ထိုးစစ်ပြန်ဆင်နေသည့် စစ်ကောင်စီတပ်က ယနေ့နံနက်ပိုင်း၌ သီပေါမြို့တွင်း ရပ်ကွက်အချို့ကို ဒရုန်းဖြင့် ဗုံးကြဲတိုက်ခိုက်မှုများ ပြုလုပ်နေပြီး မြို့တစ်ဝက်ခန့်ကိုလည်း ထိန်းချုပ်ထားကြောင်း သီပေါ်မြို့ရှိ မြေပြင်သတင်းအရင်းအမြစ်များက မဲခေါင်သို့ ယနေ့ အောက်တိုဘာ ၁၇ရက် နံနက်ပိုင်းတွင် ပြောသည်။
ယနေ့နံနက် ၁၀နာရီ ၄၅ မိနစ်ခန့်တွင် ထောင်ကြီး အနီးရှိ ဇာတ်စုနှင့် ကျောင်းစုဘက်သို့ ဒရုန်းဖြင့် ဗုံးကြဲတိုက်ခိုက်မှုများ ပြုလုပ်နေကြောင်း၊ TNLA နှင့် မဟာမိတ်များဘက်မှလည်း နေရာအချို့တွင် ခံစစ်ပြင်ထားကြောင်း မြေပြင်သတင်းရင်းမြစ်တစ်ဦးက ပြောသည်။
“စစ်တပ်က ဈေးပတ်ပတ်လည်၊ မြို့လယ်ဓမ္မာရုံတွေမှာ နေရာယူထားကြတယ်။ အရပ်ဝတ်ပြောက်ကျားတွေလည်း မြို့ထဲမှာရှိတယ်။ မြို့လူထုကိုတော့ မြို့လယ်၊ ဈေး၊ ဇာတ်စု၊ ညောင်ကိုးပင်၊ တုံစင့်ဖက် ပေးမသွားသေးဘူး။ တပ်က အိမ်တံခါးတွေပိတ်နေဖို့၊ အပြင်မထွက်ဖို့ ပြောတယ်”ဟု ၎င်းက မဲခေါင်သို့ ယနေ့ အောက်တိုဘာ ၁၇ရက် နံနက်၇နာရီခွဲတွင် ပြောသည်။
ယမန်နေ့ အောက်တိုဘာ၁၆ရက် ညနေ ၃နာရီခွဲခန့်မှစပြီး တိုက်ပွဲအတွင်း အဆောက်အဦအချို့ မီးလောင်ခဲ့ကြောင်း ဒေသခံတစ်ဦးက ပြောသည်။
“ဇတ်စုဖက်နဲ့သီပေါမြို့ထဲ သီပေါရဲစခန်း၊ ထွေအုပ်၊ မြေစာရင်း၊ စိုက်ပျိုးရေးရုံးတွေနဲ့ ထောင်မှာ နာရီဝက် လောက်ပဲ လောင်တာ။ ရှို့မီးပါ၊ မျက်နှာမှာ Musk တပ်ထားတဲ့ အရပ်ဝတ်နဲ့ လူတွေလိုက်ရှို့တာ၊ ရပ်ရွာထဲကလူတွေ မီးထွက်ငြိမ်းကြတယ်” ဟု၎င်းက ပြောသည်။
Hotel Thipaw တွင်မူ အမိုးပေါ် လက်နက်ကြီးကျရောက် မီးလောင်ခြင်းဖြစ်ကြောင်း ၎င်းဒေသခံက ပြောသည်။
ယမန်နေ့က ညနေ ၄နာရီခွဲတွင် လက်နက်ကြီး၊ လက်နက်ငယ်များဖြင့် တိုက်ပွဲပြင်းထန်လာပြီး ညနေ ၅ နာရီခွဲခန့်တွင် မိုးသည်းထန်လာကာ ညနေ ၆ နာရီခန့်တွင် မီးလောင်နေသည်များ၊ တိုက်ပွဲဖြစ်သံများ ရပ်တန့်သွားခဲ့သည်။
ယမန်နေ့က မြို့အဝင်အထွက်ကို စစ်တပ်က ခွင့်ပြုထားသော်လည်း သီပေါတံတားကို ည ၆နာရီ မှ နံနက်၆နာရီထိပိတ်ထားကာ ယနေ့နံနက်ပိုင်း ပြန်လည်ခွင့်ပြုကြောင်း သိရသည်သော်လည်း အဝင်သာရပြီးအထွက်ကို ခွင့်မပြုတော့ကြောင်း ဒေသခံများထံမှ သိရသည်။
စစ်တပ်က ကျောက်မဲကို အောက်တိုဘာ ၁ရက်က ပြန်ရပြီးနောက် သီပေါကိုတောက်လျှောက်ထိုးစစ် ဆင်လာခဲ့ရာ ၁၅ရက်အကြာတွင် ယခုအခြေအနေ ရောက်ရှိခဲ့ခြင်း ဖြစ်သည်။
#MeKongNews
#သီပေါမြို့နယ်
#စစ်ကောင်စီ
#TNLA
#ဒရုန်းဗုံးကြဲ
