မဲခေါင်၊ အောက်တိုဘာ ၁၆
ဥရောပ၏နောက်ဆုံးလက်ကျန် အာဏာရှင်ဟုခေါ်ကြသော ပူတင်၏ အရင်းနှီးဆုံးမဟာမိတ် ဘီလာရုစ်ခေါင်းဆောင် လူကက်ရှန်ကိုက ဒေါ်နယ်ထရမ့်ပြောထားသလို ယူကရိန်းအား အမေရိကန်မှ Tomahawk တိုမာဟော့ခ် ခရုဇ်ဒုံးကျည်များ ပေးအပ်လျှင် ကမ္ဘာ့ နျူကလီးယားစစ်ပွဲကြီး ဖြစ်ပြီဟု ခြိမ်းခြောက် ပြောဆိုသွားခဲ့သည်။
Tomahawk ဒုံးကျည်များသည် တာဝေးပစ်များဖြစ်ကာ ကီလိုမီတာ ၂၅၀၀ အကွာအဝေးအထိ ပစ်နိုင် သလို အလေးချိန် တန်ဝက်ရှိသော မဟာဗျူဟာ ဒုံးကျည်ဖြစ်သည်။
အစ္စရေးနှင့် ဟားမက်စ်တို့ကြား ဂါဇာငြိမ်းချမ်းရေးသဘောတူညီချက် ပထမအဆင့် လုပ်ငန်းစဉ်များအတွက် အစ္စရေးလွှတ်တော်သို့ ရောက်ရှိစကားပြောစဉ် ဒေါ်နယ်ထရမ့်က ဂါဇာငြိမ်းချမ်းရေးအပြီး မိမိတို့နှင့် အီရန် ငြိမ်ချမ်းရေး၊ ရုရှားနှင့် ယူကရိန်း ငြိမ်းချမ်းရေးရမှုများအတွက် ပထမဦးစားပေးအဖြစ် ကြိုးစားမည်ဖြစ်ကြောင်း၊ ရုရှားနှင့်ငြိမ်းချမ်းရေးရရန်မှာမူ ဗျူဟာအဖြစ် Tomahawk ဒုံးကျည်များအား ယူကရိန်းအားပေးခြင်း ဖြင့် ဖိအားပေးရမည်ဖြစ်ကာ အဆိုပါဒုံးကျည်များ နိုင်ငံအတွင်းပိုင်း မဟာဗျူဟာကျသည့် နေရာများ သို့ ကျရောက်လာမည်ကို ရုရှားဘက်က အဖြစ်ခံနိုင်မည်မဟုတ်ဟု ပြောသွားခဲ့သည်။
မိုင် ၁၅၀၀ အထိ ပစ်နိုင်သည့် Tomahawk ဒုံးကျည်များကို အမေရိကန်ထံမှ ယူကရိန်း အလုံး ၂၀ မှ ၅၀ ကြားသာ ရနိုင်မည်ဟု ကျွမ်းကျင်သူများက သုံးသပ်ထားသော်လည်း ယင်းဒုံးကျည်များရသည်နှင့် ရုရှား၏ စစ်ရေးထောက်ပို့လမ်းကြောင်းများ၊ နိုင်ငံတွင်းမှ ဒရုန်းစက်ရုံများ၊ အရေးအပါဆုံး ရေနံသိုလှောင်ရုံများ၊ စစ်ရေးအဆောက်အအုံများကို ပွဲအဖြေပြောင်းအနေအထားဖြင့် ပစ်ခတ်ဖျက်ဆီး နိုင်မည်ဟု ယူကရိန်းသမ္မတ ဇီလန်းစကီးက ယုံကြည်နေသည်။
ထိုအခြေအနေကြောင့် ရုရှား၏ နျူကလီးယားလက်နက်စင်များအား နိုင်ငံအတွင်း တပ်ဆင်ခွင့်ပြုထား သော ဘီလာရုစ်စစ်ခေါင်းဆောင် လူကပ်ရှန်ကိုက တကယ်တမ်းသာ Tomahawk ဒုံးကျည်များ ယူကရိန်းထံသို့ အမေရိကန်မှ ပေးအပ်လိုက်လျှင် နျူကလီးယားစစ်ပွဲကြီး ကမ္ဘာနှင့်ချီ ဖြစ်ပွားပြီဟု အဆုံးစွန်အထိ ခြိမ်းခြောက်စကား ထုတ်ပြန်ပြောဆိုလိုက်ခြင်းဖြစ်သည်။
ကိုကလင်း
Ref:Thesun
#MeKongNews
#တိုမာဟော့ခ်
#ခရုဇ်ဒုံးကျဉ်
#ယူကရိန်း
#ရုရှား
#နျူကလီးယားစစ်ပွဲ
