မဲခေါင်၊ အောက်တိုဘာ ၁၆
စစ်ကောင်စီပြုလုပ်မည့် ရွေးကောက်ပွဲကို UWSA အားပေးထောက်ခံသည်ဟု UWSA ၏ လားရှိုးမြို့ဆက်ဆံရေးရုံးတာဝန်ခံ ဦးညီရမ်းက ပြောသည်။
၂၀၂၅ ခုနှစ်၊ အောက်တိုဘာ ၁၅-၁၇ ရက်ထိ ကျင်းပသည့် တစ်နိုင်ငံလုံးပစ်ခတ်တိုက်ခိုက်မှုရပ်စဲရေး သဘောတူ စာချုပ်(NCA) လက်မှတ်ရေးထိုးခြင်း ၁၀ နှစ်ပြည့် နှစ်ပတ်လည် အခမ်းအနားမှာ တက်ရောက်လာစဉ် ၎င်းက ပြောကြားခဲ့ခြင်းဖြစ်သည်။
“ကျနော်တို့အနေနဲ့ မကြာမီကျင်းပမယ့် ရွေးကောက်ပွဲကို ကျနော်တို့ “ဝ” အဖွဲ့ UWSA ရဲ့သဘောထားကလည်း ထုတ်ပြန်ပြီးသားလည်း ဖြစ်တယ်ပေါ့နော်၊ ကျနော်တို့ ဒီရွေးကောက်ပွဲကို အားပေးထောက်ခံသွားမယ်ဆိုတဲ့ မက်ဆေ့ချ်ကို ကျနော်တို့ပေးလိုပါတယ်” ဟု ဦးညီရမ်းက မီဒီယာများသို့ ပြောကြားခဲ့ခြင်း ဖြစ်သည်။
၎င်းက စစ်ကောင်စီ၏ရွေးကောက်ပွဲကို ထောက်ခံသည်ဟု ပြောသော်လည်း UWSA ဝ မြောက်ပိုင်းထိန်းချုပ်နယ်မြေ ဟိုပန်နဲ့ ပန်လုံမြို့များမှာ စစ်ကောင်စီက ကျင်းပမည့်ရွေးကောက်ပွဲအတွက် လူထုစည်းရုံးရေးဆင်းခြင်း၊ မဲဆွယ်စည်းရုံးခြင်းမျိုး တွေ့ရှိပါက တရားစီရင်ရေးဌာနသို့ တိုင်ကြားနိုင်ကြောင်း “ဝ” လူငယ့်အသံ WNL က ပြီးခဲ့သည့် စက်တင်ဘာ ၅ ရက်က သတင်းဖော်ပြခဲ့သည်။
ယင်း အသိပေးချက်ကို စက်တင်ဘာလ ၄ ရက် နံနက်ပိုင်းမှာ ပြုလုပ်သည့် “ဝ” ပြည်နယ်၊ စစ်မှု ထမ်းဆိုင်ရာ ဥပဒေ၊ ပြစ်မှုများနှင့်ပတ်သက်ပြီး ချမှတ်အရေးယူနိုင်သည့် ပုဒ်မ၊ ဥပဒေဆိုင်ရာ အသိ ပညာပေး လူထုအစည်းအဝေးတွင်ထည့်သွင်းပြောဆိုခဲ့ခြင်း ဖြစ်ကြောင်း တက်ရောက်ခဲ့သူ ဒေသခံ အမျိုးသားတစ်ဦးက ပြောသည်ဟု ပါရှိခဲ့သည်။
ထိုပြောကြားမှုတွင် “အစည်းအဝေးမှာ ထည့်ပြောသွားတာ ဟုတ်တယ်။ အခြားအဖွဲ့အစည်း၊ ပါတီတွေက မဲထည့်ဖို့ လာစည်းရုံးတာမျိုးတို့၊ လက် မှတ်ဘာညာ လိမ်ပြီးထိုးခိုင်းတာတို့ အခကြေးငွေပေးပြီး မဲဆွယ်စည်းရုံးရေး လာလုပ်တာတို့ တွေ့ရင်တိုင်ကြားဖို့ အသိပေးထားတယ်။ “ဝ”တပ် အုပ်ချုပ်တဲ့ နေရာတိုင်းမှာ “ဝ” ပြည်သွေးစည်း ညီညွတ်ရေး ပါတီ – UWSP တစ်ခုပဲရှိတယ်။ အခြားပါတီတွေ မရှိဘူး။ မဲပုံးထောင်ခွင့်လည်း မပြုထားဘူးလို့ ပြောတယ်”ဟု ပါရှိခဲ့သည်။
ယင်းသတင်းဖော်ပြမှုနှင့် ပတ်သက်ပြီး ဦးညီရမ်းကတုံ့ပြန်ရာတွင် “တခြားမီဒီယာတွေ ရေးတာဗျာ အဲတာ မမှန်ပါဘူး။ ဒီကိစ္စနဲ့ကျနော်တို့အားပေးထောက်ခံတယ်ဆိုတဲ့ မက်ဆေ့ကိုလည်း ကျနော်တို့ ဗဟိုဌာနချုပ်အနေနဲ့လည်း ထုတ်ပြန်ခဲ့ပြီးသားပါ”ဟု ပါရှိခဲ့သည်။
ဦးညီရမ်းက ရွေးကောက်ပွဲကို အားပေးထောက်ခံသည်ဆိုသော်လည်း မဲဆန္ဒနယ်မြေအဖြစ်သတ် မှတ်ခံရသည့် UWSA ထိန်းချုပ် ဟိုပန်၌ ရွေး ကောက်ပွဲ ပြုလုပ်နိုင်ခြင်းမရှိကြောင်း စစ်ကောင်စီက ထုတ်ပြန်ထားသည်။
ဦးညီရမ်း၏ ပြောကြားချက်မှာ UWSA ထိန်းချုပ် “ဝ” မြောက်ပိုင်း၏ ရွေးကောက်ပွဲနှင့်ပတ်သက်သည့် အခြေအနေဖြစ်သည်ဟု နားလည်ရပြီး “ဝ” တောင်ပိုင်း စစ်ဒေသ – ၁၇၁ တွင်မူ မူလကတည်းက “ဝ” တပ်ဖွဲ့၏ ပြန်ကြားရေးအဖွဲ့ဝင် ဦးအိုက်ပလိပ်ဆိုသူက ကြံ့ခိုင်ရေးပါတီမှ ရွေးကောက်ပွဲ ဝင်ရောက်ယှဉ်ပြိုင်ရန် ပြင်ဆင်နေကြောင်း မဲခေါင်မှ စုံစမ်းသိရသည်။
“ဝ” တောင်ပိုင်း စစ်ဒေသ – ၁၇၁ ၏ ဌာနချုပ် ဟွေအောကျေးရွာမှာ မိုင်းတုံမြို့နယ်အတွင်းတည်ရှိရာ စစ်ကောင်စီ ကျင်းပမည့် ရွေးကောက်ပွဲတွင် မိုင်းတုံမြို့နယ်မဲဆန္ဒနယ်၌ “ဝ” ပြန်ကြားရေးအဖွဲ့ဝင် ဦးအိုက်ပလိပ်က ကြံ့ခိုင်ရေးပါတီမှ ဝင်ရောက်မည်ဖြစ်ကြောင်း မိုင်းတုံခရိုင်ရွေးကောက်ပွဲ ကော်မရှင်နှင့်နီးစပ်သူတစ်ဦးထံမှ သိရသည်။
“အိုက်ပလိပ်က ပြည်နယ်အနေနဲ့ဝင်မှာ၊ အရင်က တရားဟောဆရာကနေ ဘာသာပြန်၊ နောက်ပြန်ကြားရေးအဖွဲ့ဝင်ဖြစ်လာတာ။ အရင်လာပြိုင်တဲ့ “ဝ” ပါတီ မပါဘူး။ ဒီမှာ ပြည်ခိုင်ဖြိုးရယ်၊ တစညရယ်၊ ကျားဖြူရယ် ဒါပဲရှိတယ်” ဟု ၎င်းက မဲခေါင်သို့ပြောသည်။
မြို့နယ်ရွေးကောက်ပွဲမှတ်တမ်းတွင် ၂၀၁၀ ခုနှစ် ရွေးကောက်ပွဲ၌ “ဝ” တောင်ပိုင်းနယ်မြေတစ်ခုလုံး မဲမပေးခဲ့ဘဲ ၂၀၁၅ ခုနှစ်တွင်မှ မဲပေးခဲ့ပြီး ယင်းရွေးကောက်ပွဲတွင် “ဝ” ပါတီကိုယ်စားပြု ဝင်ရောက်ယှဥ်ပြိုင်ခြင်းမရှိခဲ့ပေ။ ၂၀၂၀ ပြည့်နှစ်တွင်မူ “ဝ” ပါတီမှ ပြည်နယ်၂ မဲဆန္ဒနယ်မြေမှ ဝင်ပြိုင်ခဲ့ရာ ဒေါက်တာ Mဇော်လတ်ဆိုသူ အနိုင်ရရှိခဲ့ပြီး ယခု ၂၀၂၅ ခုနှစ်တွင် “ဝ” ပါတီအနေဖြင့် မဟုတ်ဘဲ ပြည်ခိုင်ဖြိုးအနေဖြင့် UWSA ပြန်ကြားရေးအဖွဲ့ဝင်တစ်ဦးက ဝင်ရောက်ယှဥ်ပြိုင်မည်ဖြစ်သည်။
ယခင် စစ်အစိုးရလက်ထက် ၁၉၉၀ ဝန်းကျင်တွင် ရှမ်းပြည်အရှေ့ပိုင်း မိုင်းဆတ်၊ မိုင်းတုံနယ်အတွင်း UWSA တပ်များ စစ်ရေးအရ ခြေကုတ်ရယူခဲ့သည်မှ လက်ရှိတွင် မြို့ပေါ် ကွက်ကွက်လေးသာ ချန်ထားပြီး ကျန်နေရာများအားလုံး UWSA က ထိန်းချုပ်ထားခြင်းဖြစ်သည်။
“ “ဝ” က ပထမတော့ စစ်ရေးနဲ့နယ်မြေ ခြေကုတ်ယူတယ်။ တဖြည်းဖြည်း အုပ်ချုပ်ရေးနဲ့ နယ်ချဲ့လာတယ်။ ခု ရွေးကောက်ပွဲနဲ့ စစ်တပ်နဲ့ပူးပေါင်းပြီး နိုင်ငံရေးဖက် တက်လာပြီ။ လွှတ်တော်မှာတရားဝင် ပြည်နယ်တောင်းဖို့အခွင့်အရေးရဖို့ပေါ့” ဟု နိုင်ငံရေးလေ့လာသူ ရှမ်းပြည် နိုင်ငံရေးအကျဥ်းသားဟောင်းတစ်ဦးက ပြောသည်။
မိုင်းတုံမြို့လူဦးရေ အနီးစပ်ဆုံးမှာ “ဝ” လူမျိုး ၈ သောင်းကျော်၊ လားဟူလူမျိုး ၄ သောင်းနီးပါးနှင့် ရှမ်းလူမျိုး ၃ သောင်းကျော်ရှိကြောင်း မဲခေါင်သတင်းဌာနက စုံစမ်းသိရသည်။
#MeKongNews
#UWSA
#ရွေးကောက်ပွဲ
#စစ်ကောင်စီ
#၁၇၁စစ်ဒေသ
