မဲခေါင်၊ အောက်တိုဘာ ၁၂
သီပေါ်မြို့နယ်ရှိ သမိုင်းဝင် ဘော်ကြိုဘုရားကြီးကျောင်းဝန်းအတွင်း၌ တိုက်ပွဲများမဖော်ဆောင်ကြရန် ဘော်ကြိုဆရာတော်က မေတ္တာရပ်ခံစာများကပ်ပြီး ကြေညာထားကြောင်း ဒေသခံများထံမှ သိရသည်။
စစ်ကောင်စီက သီပေါကို ပြန်လည်ထိုးစစ်ဆင်လာချိန်တွင် ဘော်ကြိုရှိ ဘုရားကျောင်းကန်များ ထိခိုက်ပျက်စီး ဆုံးရှုံးမှု မဖြစ်ပေါ်စေရန် ယင်းကဲ့သို့ ဆရာတော်မှ ကြိုတင်ဆောင်ရွက်ခြင်းဖြစ်သည်ဟု ဒေသခံတစ်ဦးက ပြောသည်။
လက်ရှိတွင် စစ်ကောင်စီဘက်က သီပေါမြို့ကို ပြန်လည်သိမ်းပိုက်ရန်အတွက် ထိုးစစ်ဆင်နေပြီး TNLA နှင့် မဟာမိတ်တပ်များက သီပေါမြို့အတွင်းကနေ ခံစစ်ဆင်နေကြောင်း ဒေသခံများက ပြောသည်။
“သီပေါမြို့ကို တပ်ကပြန်လည်ထိုးစစ်ဆင်လာချိန်မှာလည်း သမိုင်းဝင်ဘော်ကြိုဘုရားကြီးနဲ့ ဘုရားကြီးကျောင်းဝန်းအတွင်းမှာရှိတဲ့ စေတီတော်ကြီး၊ ကျောင်းဆောင်တွေ၊ သံဃာတော်တွေနဲ့ သက်ကြီးရွယ်အိုတွေ ခိုလှုံနေတာဖြစ်လို့ ထိခိုက်ပျက်စီးမှုမရှိစေဖို့အတွက် အခုလို ဘော်ကြိုဆရာတော်က ဘုရားကြီးကျောင်းဝန်းအရှေ့မှာ ကြိုတင်ကြေညာ ချက်တွေကပ်ပြီး မေတ္တာရပ်ခံထားတာလည်းဖြစ်ပါတယ်” ဟု ဘော်ကြိုဒေသခံတစ်ဦးက ပြောသည်။
စစ်ကောင်စီသည် အဓိကအားဖြင့် လေကြောင်း၊ လက်နက်ကြီးတို့ဖြင့် တိုက်ခိုက်ရာတွင် ဘုရားကျောင်းကန် သာသနာ့အဆောက်အဦးများ၊ စာသင်ကျောင်းများကို အထူးပစ်မှတ်ထားတိုက်ခိုက်နေသဖြင့် ယခုလို မေတ္တာရပ်ခံရသည်ဟုလည်း သီပေါဒေသခံတစ်ဦးက ပြောသည်။
ပြီးခဲ့သည့် စက်တင်ဘာ ၃ရက်က သီပေါမြို့ ဘော်ကြိုစျေးရွာ နတ်စင်အနီးသို့ စစ်ကောင်စီကလေကြောင်းဖြင့် ဗုံး၂လုံးကြဲချခံရမူကြောင့် အရပ် သား၁ဦး ထိခိုက်ဒဏ်ရာရှိခဲ့ပြီးနေအိမ်၂လုံးပျက်ဆီးသွားသည့်အပြင် ဘော်ကြိုဘုရားကျောင်း ဆောင်လည်း အနည်းငယ်ထိမှန်ပျက်စီးခဲ့ရသေးသည်။
လက်ရှိမှာ တပ်စစ်ကြောင်းများသည်သီပေါမြို့ကို သိမ်းပိုက်နိုင်ရန်အတွက် ဆက်လက်ထိုးစစ်ဆင်နေပြီး မြေပြင်စစ်ရေးသတင်းရင်းမြစ်တွေအရ တပ်စစ်ကြောင်းများ သီပေါမြို့နှင့်မလှမ်းမကမ်းနေရာတွေမှာ ရောက်ရှိနေပြီဖြစ်ကြောင်း သိရသည်။
ယနေ့ အောက်တိုဘာ၁၂ရက်နေ့တွင် ရရှိသည့် စစ်ရေးသတင်းအရင်းအမြစ်များအရတောင်ဘက် မိုင်းရယ် မြို့မှ တက်လာသည့် စစ်တပ်စစ်ကြောင်းမှာ သီပေါမှ ၈မိုင် ကျော်ဝေးသည့် နောင်အန်ရွာကို အပြင်းအထန်တိုက်ခိုက်နေကြောင်း သိရသည်။
နောင်အန်သည် TNLA ၏ သီပေါမြို့တောင်ဘက်က အခိုင်အမာ ခံကတုပ် တစ်ခု ဖြစ်ပြီး အင်အား အများအပြားဖြင့်ကျင်သီ တံတား အနီး တစ်ဝိုက် မှာ လက်နက်ကြီး၊ လက်နက်ငယ်များ အလုံးအရင်းဖြင့် ခုခံနေသဖြင့် တိုက်ပွဲများပြင်းထန်စွာဖြစ်နေကြောင်း မြေပြင်သတင်းအရင်းအမြစ်အရသိရသည်။
“စစ်တပ်က သေချာပေါက် သိမ်းနိုင်မယ်ယူဆလို့ ရွာတွေကိုတောင် အမိန့်ထုတ်ထားတယ် သူတို့ကိုကြိုဖို့တဲ့” ဟု ၎င်းကပြောသည်။
၎င်းအပြင်စစ်တပ်က သီပေါမြို့ကို သိမ်းပိုက်မိပါက ပန်းစီးနှင့် ကြိုရမည်ဟု ဖိအားပေးစေခိုင်းထားခံရသည့် ရွာများမှာ ကျင်သီကျေးရွာအုပ်စု၊ ဘော်ကြိုကျေးရွာအုပ်စု၊ မာန်ဟဲကျေးရွာအုပ်စုနှင့် စံဖိတ်ကျေးရွာအုပ်စုတို့ဖြစ်ကြောင်း ဒေသခံများထံက စုံစမ်းသိရသည်။
#MeKongNews
#ဘော်ကြိုဘုရား
#သီပေါမြို့နယ်
#TNLA
#စစ်ကောင်စီ
#ရှမ်းမြောက်
