မဲခေါင်၊ အောက်တိုဘာ ၈
အောက်တိုဘာ ၆ ရက် သီတင်းကျွတ်လပြည့်ညတွင် စစ်ကိုင်းတိုင်း၊ ချောင်းဦးမြို့၌ အများပြည်သူ ဘာသာရေးမီးထွန်းပွဲတော်ကျင်းပရန် စုဝေးနေစဉ် စစ်ကောင်စီဘက်မှ ပါရာဂလိုက်ဒါများဖြင့် ပြင်းထန်သော ဗုံးများကြဲချခြင်းကြောင့် ကလေးများစွာအပါ အနည်းဆုံး အယောက် ၄၀ သေဆုံးမှုသည် ဟားမက်စ်၏ အောက်တိုဘာ ၇ ရက် လူသတ်ပွဲအား ပြန်လည် ပဲ့တင်ထပ်စေသည်ဟု ဗြိတိန် Thesun သတင်းဌာနက အောက်တိုဘာ ၈ ရက် မွန်းလွဲပိုင်း၌ တင်ဆက်သွားခဲ့သည်။
၂၀၂၃ ခုနှစ် အောက်တိုဘာ ၇ ရက်တွင် ဟားမက်စ်တို့သည် အစ္စရေးနယ်စပ်သို့ ကားများ၊ ပါရာဂလိုက်ဒါများနှင့် နိုဗာဂီတဖျော်ဖြေပွဲအတွင်း ဝင်ရောက်ကာ မြင်မြင်သမျှ ပစ်သတ်ခဲ့သည့် အကြမ်းဖက်မှုကြောင့် ၁၀၀၀ ကျော်သေဆုံးပြီး ၂၅၀ ကျော်ပြန်ပေးဆွဲခံခဲ့ရသည်။
အောက်တိုဘာ ၇ ရက် ၂ နှစ်ပြည့်ရန် တစ်ညသာအလိုတွင် ချောင်းဦးမြို့ရှိ သီတင်းကျွတ်မီးထွန်းပွဲတော်အား စစ်ကောင်စီမှ ပါရာဂလိုက်ဒါများဖြင့် ရက်စက်စွာ ဗုံးကြဲခဲ့ခြင်းဖြစ်သည်ဟု The Sun က ဖော်ပြသွားသည်။
ထိုဖော်ပြမှုတွင် ဘာသာရေးပွဲကျင်းပရေးကော်မတီဝင်များထံ မေးမြန်းရာ အနည်းဆုံး ၄၀ သေဆုံးပြီး ၈၀ ကျော် ဒဏ်ရာရကာ ကလေးများသည် အလောင်းကောက်မရလောက်အောင်ပင် အစိတ်စိတ် ဖြစ်သွားကြောင်း၊ အောက်တိုဘာ ၈ ရက်တွင် သဂြိုလ်ရန် စီစဉ်နေသော်လည်း မမှတ်မိသည့် အလောင်းအပိုင်းအစများ ပြီးစီးအောင် မကောက်နိုင်သေးဟု ဖြေကြားသွားသည်။
BBC မြန်မာပိုင်းအစီအစဉ်တွင် ချောင်းဦးအား ထိန်းချုပ်ထားနိုင်သည့် ဒေသခံ ပီဒီအက်ဖ်များက သတင်း ကြိုတင်ရရှိလိုက်ပြီး လူစုခွဲရန် ကြိုးစားစဉ်မှာပင် မိနစ်ပိုင်းအတွင်း ပါရာဂလိုက်ဒါများရောက်လာကာ ဗုံးကြဲခံရခြင်းဖြစ်သည်ဟု ဖော်ပြခဲ့သည်။
နိုင်ငံတကာလွတ်ငြိမ်းချမ်းသာခွင့် လူ့အခွင့်အရေးအဖွဲ့ Human rights က မြန်မာပြည်သူများ ချက်ချင်း မဖြစ်မနေအကာအကွယ်ပေးရန် လိုအပ်နေပြီဖြစ်ကြောင်းနှင့် Amnesty’s Myanmar မှ သုတေသီ ဂျိုးဖရီးမန်းက နိုင်ငံတကာ အသိုင်း အဝိုင်းသည် မြန်မာ့ပဋိပက္ခအား မေ့လျော့ထားချိန် စစ်ကောင်စီသည် ထိုအားနည်းချက်ကို အားသာချက်အဖြစ်အသုံးချကာ အရေးယူခံရခြင်းများမရှိဘဲ စစ်ရာဇဝတ်မှုများ ပြောင်ပြောင်တင်းတင်း ကျူးလွန်နေသည်ဟု ဝေဖန်ရှုတ်ချသွားခဲ့သည်။
စစ်ကောင်စီကမူ ၂၀၂၁ အာဏာသိမ်းပြီးနောက် ပထမဆုံး ရွေးကောက်ပွဲအဖြစ် ဒီဇင်ဘာလအတွင်း ရွေးကောက်ပွဲပင် ပြန်လည်ကျင်းပရန် တိုက်ပွဲများကို အရှိန်မြှင့်တိုက်ခိုက်နေသည်။
ကိုကလင်း
Ref: Thesun
#စစ်ကောင်စီ
#ဟားမက်စ်
#အကြမ်းဖက်မှု
#ချောင်းဦး
#သီတင်းကျွတ်
#ဆီမီးထွန်းပွဲ
