မဲခေါင်၊ စက်တင်ဘာ ၁၉
ဆိုင်ကယ်သူခိုး ၃ ဦးနှင့် ခိုးရာပါဆိုင်ကယ် ၈ စီးကို ရှမ်းပြည်တောင်ပိုင်း၊ တောင်ကြီးမြို့နယ်၊ အေးသာယာရဲစခန်းတွင် ဖမ်းဆီးရမိထားကြောင်း အေးသာယာရဲစခန်းက ကြေညာထားသည်။
ယမန်နေ့ စက်တင်ဘာ ၁၇ ရက် ညနေပိုင်းတွင် အေးသာယာရဲစခန်းမှ ဖမ်းဆီးရမိထားသည့် ဆိုင်ကယ်သူခိုး ၃ ဦးနှင့်အတူ ၎င်းတို့ထံမှ ဖော်ထုတ်ရရှိထားသည့် ဆိုင်ကယ် ၈ စီးကို ဓာတ်ပုံနှင့်အတူ သတင်းဖော်ပြထားခြင်း ဖြစ်သည်။
“ပျောက်တာတော့ အများကြီး၊ ခု ဖမ်းမိတဲ့ဆိုင်ကယ်ပျောက်ဆုံးသူ ပိုင်ရှင်များကိုယ်တိုင် လာရောက် စစ်ဆေးနိုင်တယ်လို့ ပြောတယ်။ လိုင်စင်ဘီးတွေကတော့ ရှင်းတယ်။ အုံနာဘုတ် ပါရင်ပြီးတယ်။ W ကတော့ ဆိုင်ကယ်ချက်စီ ကို ဖုန်းနဲ့ရိုက်ထားတာ ပါရင်ကောင်းတယ်” ဟု ရဲစခန်းနှင့် နီးစပ်သူတစ်ဦးက မဲခေါင်ကို ပြောသည်။
တောင်ကြီးမြို့ပေါ်နှင့် မြို့နယ်အတွင်း နေ့စဥ်နီးပါး ဆိုင်ကယ်များ ပျောက်ဆုံးနေရာ ယခု အေးသာယာ ရဲစခန်းက ခိုးဘီး အများအပြားကို ဆိုင်ကယ်သူခိုးများနှင့်အတူ ဖော်ထုတ်ဖမ်းဆီးရမိခြင်း ဖြစ်ကြောင်း သိရသည်။
အေးသာယာမှ ဆိုင်ကယ်ပျောက်သူတစ်ဦးကမူ ၎င်းဆိုင်ကယ်ပျောက်၍ စခန်းသို့ တိုင်ကြားစဥ်က စခန်းရဲတစ်ဦးက ဆုံးပြီဟု ပြောကြားခဲ့သဖြင့် အမှုမဖွင့်ဘဲ လှည့်ပြန်လာခဲ့ရသည့် ဖြစ်ရပ်လည်း ရှိသည်ဟု ဆိုသည်။
“တို့များပျောက်တုန်းက အရစ်ကျနဲ့ဝယ်ထားတဲ့ kenbo 110 လိုင်စင်ပါ အမည်ပေါက်ပြောင်းပြီးသားလေးမို့ ပျောက်ပျောက်ချင်း သွားတိုင်တာ။ ဘာရာထူးရှိတဲ့သူလည်း မသိဘူး။ ပြောချလိုက်တာ ဆုံးပြီလို့သာ မှတ်လိုက်တဲ့။ ဒီတိုင်းလှည့်ပြန်ခဲ့ရတယ်” ဟု ၎င်းကဆိုသည်။
ယင်း အေးသာယာနယ်မြေရဲစခန်းအပိုင်ဖြစ်သည့် အေးသာယာမြို့သစ် နည်းပညာတက္ကသိုလ်(တောင်ကြီး) ကျောင်းဝိုင်းအတွင်းတွင် တမြန်နေ့ စက်တင်ဘာ ၁၇ ရက်နေ့ ညနေ ၅ နာရီခန့်က Honda wave100 ခဲဖြူတစ်စီးအခိုးခံရသဖြင့် တွေ့ရှိပါကအကြောင်းကြားပေးရန် ပိုင်ရှင်က မေတ္တာရပ်ခံထားသည်။
#MeKongNews
#အေးသာယာ
#ရှမ်းတောင်
#ဆိုင်ကယ်ခိုးမှု
#ဖမ်းဆီးရရှိမှု
