မဲခေါင်၊ စက်တင်ဘာ ၁၅
ရှမ်းပြည်နှင့် ကရင်ပြည်နယ်တို့တွင် ကျားဖြန့်လုပ်ငန်းအများအပြားကို နှိမ်နင်းပြီးနောက် ကမ္ဘာဒီယားရှိ ကျားဖြန့်လုပ်ငန်းများ၌ လုပ်ကိုင်ရန် တာချီလိတ်နယ်စပ်ဒေသမှ လူငယ်များကို ပစ်မှတ်ထားပြီး ခေါ်ယူလူကုန်ကူးလာကြောင်း တာချီလိတ်ဒေသခံများထံမှ သိရသည်။
ထိုင်း-မြန်မာနယ်စပ်ဒေသဖြစ်သည့် တာချီလိတ်တွင် စီးပွားရေးနှင့် အလုပ်အကိုင်အခွင့်အလမ်း ကျဆင်းနေပြီး အလုပ်လက်မဲ့လူငယ်များ များပြားလာသည့်အပေါ် ကမ္ဘောဒီယားနိုင်ငံအတွင်းရှိ ကျားဖြန့်ငွေလိမ်ဂိုဏ်းများ၌ လုပ်ကိုင်ရန် ပွဲစားများက နည်းမျိုးစုံဖြင့် စည်းရုံကာ လူကုန်ကူးနေခြင်းဖြစ်ကြောင်း တာချီလိတ်မြို့မှ လူငယ်တစ်ဦးက ပြောသည်။
“ကျွန်တော်အသိတစ်ယောက် ကမ္ဘောဒီယားကို အလုပ်သွားလုပ်တာ ရောင်းစားခံလိုက်ရတယ်။ သွားတုန်းကတော့ သူတို့ မယ်ဆိုင်ထိ လာခေါ်ပေးတယ်။ အဓိက တရုတ်စကား၊ ထိုင်စကားတတ်တဲ့သူတွေကို ဘာသာပြန်ဆိုပြီး ခေါ်တာ၊ လစာလဲ တစ်လ ဘတ် ၃သောင်းလောက်ရမယ်လို့ပြောတယ်။ ဟိုရောက်တော့ ထိုင်းဘတ် ၃သိန်းနဲ့ ရောင်းစားခံရတယ်ပြောတယ်။ ပြန်လာချင်ရင် ပိုက်ဆံလျော်ခိုင်းတယ်” ဟု ၎င်းက ပြောသည်။
ပွဲစားများက လူငယ်များကို စည်းရုံးပြီးနောက် လာအို၊ ထိုင်းနှင့် တရုတ်နယ်စပ်တွင် ကျားဖြန့်အတွေ့အကြုံရှိသည့် လူငယ်တစ်ဦးလျှင် ဘတ် ၅သိန်းဝန်းကျင်၊ အတွေ့အကြုံမရှိသည့် လူငယ်တစ်ဦးလျှင် အသက်အရွယ်ကိုလိုက်ပြီး ဘတ် တစ်သိန်းမှ ၃သိန်းဝန်းကျင်ဖြင့် ကမ္ဘောဒီးယားရှိ ကျားဖြန်ရုံများတွင် ပြန်လည်ရောင်းချခြင်းဖြစ်ကြောင်း လူပွဲစားအသိုင်းအဝိုင်းနှင့် နီးစပ်သည့် သတင်းရင်းမြစ်တစ်ဦးက ပြောသည်။
ပြီးခဲ့သည့်လပိုင်းအတွင်းကပင် တာချီလိတ်မြို့မှ အမျိုးသမီးငယ်တစ်ဦး ကမ္ဘောဒီးယားရှိ ကျားဖြန့်ရုံတစ်ခုတွင် ရောင်းစားခံရပြီး အခန်းပိတ်ကာ ညှင်းပန်းနှိပ်စက်ခံရသည့်အတွက် မိသားစုမှ ဒေါ်လာ ၄၀၀၀ (ဘတ် ၁သိန်း၃သောင်းခန့်) ဖြင့် ပြန်လည်ရွေးထုတ်ခဲ့ရကြောင်း ယင်းသတင်းရင်းမြစ်ကပြောသည်။
“တချို့ကလည်း ကျားဖြန့်လုပ်ရမယ်မှန်း သိသိနဲ့ သွားကြတာ။ ဟိုရောက်မှ မလုပ်နိုင်တော့ ဒုက္ခရောက်ကြတာပေါ့။ တာချီလိတ်မှာ အလုပ်အကိုင်ကရှား၊ တာချီလိတ်မှ မဟုတ်ပါဘူး၊ တနိုင်ငံလုံးမှာ ရှားနေတော့ ရွေးချယ်စရာမှ မရှိကြတာ” ဟု ၎င်းက ပြောသည်။
တာချီိလိတ်နယ်စပ်ဒေသတွင် လူငယ်အများစုမှာ အလုပ်အကိုင်ရှားပါးလာသည့်အတွက် ငါးဂိမ်းခုံများတွင် အလွယ်တကူဝယ်လို့ရသည့် စိတ်ကြွဆေးပြားသုံးစွဲပြီး မူးယစ်ကျေးကျွန်ဖြစ်ကာ ခိုး၊ ဆိုး၊ နှိုက်နှင့် ဒုစရိုက်မှုများတွင် ပါဝင်လာကြောင်း ဒေသခံများက ဆိုသည်။
စစ်ကောင်စီက ကုန်သွယ်ရေးလုပ်ငန်းများကို တင်းကြပ်စွာ ဖမ်းဆီးခြင်း၊ သဘာဝဘေးဖြစ်သည့် ရေကြီးမှုကို မကြာခဏကြုံတွေရခြင်း စသည့် အခက်အခဲများကြောင့် တာချီလိတ်မြို့တွင် စီးပွားရေးလုပ်ငန်းအများစု ကြပ်တည်းနေပြီး ဒေသခံများလည်း စီးပွားရေးကျဆင်းမှုဒဏ် ခံစားနေရကြောင်း သိရသည်။
#MeKongNews
#တာချီလိတ်
#ကမ္ဘောဒီးယား
#ကျားဖြန့်
#လူကုန်ကူး
