မဲခေါင်၊ စက်တင်ဘာ ၁၄
တာချီလိတ်-မယ်ဆိုင် ချစ်ကြည်ရေးတံတား-၁ တာဝန်ကျ လူဝင်မှုကြီးကြပ်ရေး ဝန်ထမ်းများက ကမ်းကူးသူများထံမှ မှတ်ပုံတင်နှင့် စမတ်ကတ်ကိစ္စများ အကြောင်းပြပြီး ငွေပိုတောင်းသည့်အတွက် လက်လုပ်လက်စား ပြည်သူများ အခက်အခဲတွေ့နေရကြောင်း ဒေသခံများထံမှ သိရသည်။
တာချီလိတ်ဘက်ကနေ မယ်ဆိုင်ဘက်ကို ကမ်းကူးသူများထံမှာ မှတ်ပုံတင် ၈/(မကွေးတိုင်းမှတ်ပုံတင်)၊ ၁၁/(ရခိုင်မှတ်ပုံတင်) ဖြစ်နေသည်ဟု အကြောင်းပြ၍ လည်ကောင်း၊ စမတ်ကတ်မရှိသည့်အတွက် ဟူ၍လည်ကောင်း အကြောင်းပြကာ တံတား-၁ တာဝန်ကျ လဝကများက ငွေကြေးပိုမို ကောက်ခံခြင်းဖြစ်ကြောင်း ကိုယ်တွေ့ကြုံရသူတစ်ဦးနှင့် နီးစပ်သူက ပြောသည်။
“စမတ်ကတ်မရှိလို့ဆိုပြီး ဘတ် ၄၀၀ တောင်းတာလည်း ကြုံဖူးတယ်။ ၈/ မှတ်ပုံတင် ဖြစ်နေလို့ဆိုပြီးလည်း ဘတ် ၁၀၀ တောင်းတာမျိုးရှိတယ်။ အကြောင်းအမျိုးမျိုးပြပြီးတောင်းတယ်။ ရှိတဲ့လူ၊ အဆင်ပြေတဲ့လူကတော့ ကိစ္စမရှိပေမယ့် တစ်နေ့လုပ်မှ ၂၀၀၊ ၂၅၀ လောက်ရတဲ့ လက်လုပ်လက်စားတွေက အရမ်းအခက်အခဲဖြစ်ကြတယ်” ဟု ၎င်းကပြောသည်။
တာချီလိတ်-မယ်ဆိုင် ဖြတ်သန်းရာတွင် မြန်မာဘက်၌ ကျပ်တစ်ထောင် (ကျပ်တစ်ထောင်မရှိပါက ဘတ် ၂၀ ပေးရ)နှင့် ထိုင်းဘက်အခြမ်းတွင် ၁၀ ဘတ် (ပထမအကြိမ်ဘတ် ၂၀) သာ တရားဝင် သတ်မှတ်ထားသော်လည်း မြန်မာဘက်အခြမ်း လဝကများက ဘတ် ၁၀၀ မှ ဘတ် ၄၀၀၊ ၅၀၀ အထိ အကြောင်းအမျိုးမျိုးပြ တောင်းခံနေခြင်း ဖြစ်သည်။
လူနှင့် တပိုင်တနိုင်ကုန်များ ဖြတ်သန်းသည့် တာချီလိတ်-မယ်ဆိုင် ချစ်ကြည်ရေးတံတား-၁ တွင် တာဝန်ကျသည့် လဝကများအနေဖြင့် နေ့စဉ်ဖြတ်သန်းသွားလာသူများထံမှ လည်ကောင်း၊ စာအုပ်အပြာ (၁ နှစ် သက်တမ်းရှိ ယာယီဖြတ်သန်းခွင့်စာအုပ်) ပြုလုပ်သူများထံမှလည်ကောင်း နည်းမျိုးစုံ ပညာပြကာ ငွေတောင်းခံမှုများ ပြုလုပ််ကြောင်း ဒေသခံတစ်ဦးက ပြောသည်။
“တံတား လဝကတွေက တော်တော်နာမည်ထွက်တယ်။ တကယ်ဆို သူတို့မှာ တခြားရနေတာတွေလည်း အများကြီးရှိပါတယ်။ အဆင်မပြေတဲ့လူတွေဆီကနေ ဒီလိုတောင်းတာကတော့ လွန်တာပေါ့” ဟု ၎င်းကပြောသည်။
တာချီလိတ်-မယ်ဆိုင် နေ့စဉ်ဖြတ်သန်းသွားလာသူများတွင် လည်ပတ်သွားလာသူများသာမက တာချီလိတ်ဘက်မှ မယ်ဆိုင်ဘက်သို့ သွားရောက်အလုပ်လုပ်ကိုင်သူများ၊ ကုန်စည်ဝယ်ယူရောင်းချသူများ၊ ကျောင်းပို့/ကြို ပြုလုပ်သူများနှင့် အခြားအလုပ်သမားများစွာ ပါဝင်ကြောင်း ဒေသခံများထံမှ သိရသည်။
#MeKongNews
#တာချီလိတ်
#လဝက
#မယ်ဆိုင်
#တံတား၁
မှတ်ချက် – ပုံဟောင်း
