မဲခေါင်၊ စက်တင်ဘာ ၁၄
ယူကရိန်းကျူးကျော်စစ်ကို ရုရှားရပ်တန့်သွားစေရန်အတွက် နေတိုးအဖွဲ့ဝင်နိုင်ငံများအားလုံး ရုရှားထံမှ ရေနံဝယ်ယူမှုများကို လုံး၀ရပ်ဆိုင်းလိုက်ပြီး ရုရှားမှ ရေနံအဓိက ဝယ်ယူနေသည့် တရုတ်ကိုလည်း အားလုံးက သွင်းကုန်အခွန် ၅၀ မှ ၁၀၀ ရာခိုင်နှုန်းအထိ စည်းကြပ်မှဖြစ်မည်ဟု အမေရိကန်သမ္မတ ဒေါ်နယ်ထရမ့်က စက်တင်ဘာ ၁၃ ရက်တွင် တိုက်တွန်းသည်။
စက်တင်ဘာ ၁၀ ရက်နေ့က ယူကရိန်းအား ပစ်ခတ်သည့် ရုရှားဒရုန်းများ နေတိုးအဖွဲ့ဝင် ပိုလန်နိုင်ငံ လေပိုင်နက်ထဲသို့ ဝင်လာသဖြင့် ပစ်ချခဲ့ရမှုများဖြစ်ခဲ့ပြီးနောက် ယခုလို ရုရှား၏ စစ်ပွဲဆင်းနွှဲ့နေနိုင်ခြင်း တွင် အဓိကဝင်ငွေရင်းမြစ်မှာ ရေနံနှင့်သဘာ၀ဓာတ်ငွေဖြစ်ပြီး ၎င်းတို့အားအဓိက ဝယ်ယူကာ အားဖြည့်ပေးနေသော တရုတ်ကိုလည်း တစ်ပေါင်းတည်းထိခိုက်စေမည့် လုပ်ဆောင်မှုများ လုပ်သင့်သည်ဟု ဒေါ်နယ်ထရမ့်က ဆိုသည်။
စစ်ပြီးဆုံးရန် ရုရှားနှင့်ဆွေးနွေးမှုတွင် နေတိုးမဟာမိတ်များဘက်က ရုရှားရေနံကို အားကိုးနေရလျှင် ညှိနှိုင်းမှုအာဏာ လျော့ပါစေမည်ဖြစ်သောကြောင့် အားလုံး ရုရှားမှ ရေနံစိမ်းများ မဝယ်တော့ဘဲ တရုတ်ကိုပါ သွင်းကုန်အခွန် ၅၀ မှ ၁၀၀ ရာခိုင်နှုန်းအထိ တိုးမြှင့်ကောက်ခံမှသာလျှင် ထိရောက်နိုင်မည် ဟု ဒေါ်နယ်ထရမ့်က တိုက်တွန်းသွားခြင်းဖြစ်သည်။
၂၀၂၃ ခုနှစ်နောက်ပိုင်း နေတိုးအဖွဲ့ဝင်တူရကီသည် ရုရှားရေနံဝယ်ယူမှုတွင် တတိယ အများဆုံး ဝယ်ယူသည့် နိုင်ငံဖြစ်လာကာ ၎င်းရှေ့တွင် တရုတ်နှင့် အိန္ဒိယတို့က အများဆုံး ဝယ်ယူတင်သွင်းထား ကြောင်း သိရသည်။
စွမ်းအင်နှင့်သန့်ရှင်းသောလေ သုတေသနစင်တာ၏ ထုတ်ပြန်မှုအရ နေတိုးအဖွဲ့ဝင် ၃၂ နိုင်ငံအတွင်း ရုရှားထံမှ ရေနံဝယ်ယူနေဆဲနိုင်ငံများထဲ ဟန်ဂေရီနှင့်ဆလိုဗက်ကီးယား တို့လည်း ပါဝင်နေသေးသည်ဟု သိရသည်။
နေတိုးမဟာမိတ်နိုင်ငံများတွင် ရုရှားမှ ရေနံစိမ်းဝယ်ယူတင်သွင်းမှုကို ရပ်ဆိုင်းလိုက်ပါက ပြည်တွင်း ပို့ဆောင်ရေးကဏ္ဍများစွာ ထိခိုက်စေကာ ရေနံစျေးသည်လည်း ပိုမိုမြင့်မားလာနိုင်သဖြင့် အနောက်တိုင်းတစ်ခုလုံး စီးပွားရေးကို ဆိုးကျိုးသက်ရောက်နိုင်သည်ဟု ရှုမြင်ထားသဖြင့် ရုရှားထံမှ ဆက်လက် ဝယ်ယူနေကြခြင်းဖြစ်သည်။
ကိုကလင်း
Ref: france24
#ရုရှား
#ရေနံ
#တရုတ်
#ဒေါ်နယ်ထရမ့်
#တူရကီ
#ဟန်ဂေရီ
#ဆလိုဗက်ကီးယား
