မဲခေါင်၊ စက်တင်ဘာ ၁၂
ကုလသမဂ္ဂ မူးယစ်ဆေးဝါးနှင့် ရာဇ၀တ်မှုဆိုင်ရာရုံး (UNODC) က စက်တင်ဘာ ၁၁ ရက်တွင် ထုတ်ပြန် လိုက်သော အစီရင်ခံစာ၌ အရှေ့တီမောနိုင်ငံ လွတ်လပ်သော ကုန်သွယ်ရေးဇုန်အသစ်တစ်ခုနှင့် ချိတ်ဆက်သော ကျားဖြန့်သံသယ ကုမ္ပဏီများပျံ့နှံ့ဝင်ရောက်လာနေသည်ဟု ဖော်ပြသွားခဲ့သည်။
အရှေ့တောင်အာရှနိုင်ငံများတွင် အလုံပိတ်အဆောက်အအုံများစွာဖြင့် ကျားဖြန့်လုပ်ငန်းများ အများဆုံး ရှိနေခဲ့ရာမှ လက်ရှိတွင် ကမ္ဘာတစ်ဝန်းလုံးသို့ အဆိုပါဒုစရိုက်ကွန်ရက် ဖြန့်ကျက်ရောက်ရှိနေပြီဖြစ်ကာ အချို့သော အစိုးရများက နှိမ်နင်းရေးလုပ်ဆောင်သည့်တိုင် နေရာရွှေ့ပြောင်း လုပ်ကိုင်နိုင်စွမ်းရှိသည့် ကြီးမားသော အင်အားစုဖြစ်နေသည်ဟုလည်း ယင်းအစီရင်ခံစာတွင်ဆိုသည်။
ဧပြီလက UNODC ထုတ်ပြန်သော အစီရင်ခံစာ၌ ကျားဖြန့်လုပ်ငန်းကြီးများသည် လာအို၊ မြန်မာ၊ ကမ္ဘောဒီးယားတို့တွင် အခိုင်အမာရှိနေကာ တစ်နှစ် ဒေါ်လာ ၁၀ ဘီလီယံဖိုး လိမ်လည်ရယူနေကာ ဖိလစ်ပိုင်တွင်လည်း ရှိလာပြီဖြစ်သလို လက်တင်အမေရိကနှင့် အာဖရိကသို့ပါ ရောက်ရှိနေပြီဟု ဖော်ပြပါရှိခဲ့သည်။
ဩဂုတ်လကုန်ပိုင်းက အိုအီဆက်ဆီဒေသဆိုင်ရာ အာဏာပိုင်များသည် မသင်္ကာဖွယ်ရာ ကျားဖြန့် စင်တာတစ်ခုကို ဝင်ရောက်စီးနင်းဖမ်းဆီးခဲ့ရာမှ အရှေ့တီမောတွင်လည်း ကျားဖြန့်လုပ်ငန်းများ ရောက်ရှိအခြေချနေကာ ထိုစဉ်က ပြည်ပသား ၃၀ ကျော် အလုပ်လုပ်ခွင့်ပါမစ်မရှိဘဲ လုပ်ဆောင်နေ ခဲ့သည်ဟု သိရသည်။
ဖမ်းခံရသူများသည် မလေးရှား၊ အင်ဒိုနီးရှား၊ တရုတ်တို့မှဖြစ်ပြီး ၎င်းတို့သည် လူမှောင်ခိုကူးခံရကာ ရောက်ရှိခြင်းဟုတ်မဟုတ် မသိရဟုလည်း UNODC က ဆိုသည်။
အိုအီဆက်ဆီ ဒေသသည် အရှေ့တီမောနှင့် အင်ဒိုနီးရှားနှင့် ကျွန်းများကို တစ်ဝက်စီခွဲဝေပိုင်ဆိုင်ထားသော ဒေသဖြစ် ကာ ၂၀၂၄ ဒီဇင်ဘာတွင် ဒေသဆိုင်ရာအစိုးရအဖွဲ့က လွတ်လပ်သောကုန်သွယ်ရေးဇုန် (Digital Centre) ထူထောင် ပြီးနောက် ကျားဖြန့်လုပ်ငန်းများ ဆက်တိုက်ရောက်ရှိအခြေချလာခြင်းဖြစ်သည်ဟု သိရသည်။
ထိုအခြေအနေကြောင့် အာဆီယံအဖွဲ့ဝင်နိုင်ငံအဖြစ် ဝင်ရောက်ရန် အဆိုတင်သွင်းထားသော အရှေ့တီမော (တီမောလက်စတီ)ကို အာဆီယံက အဖွဲ့ဝင်ဖြစ်ခွင့်ပေးရန် ပြန်လည်စဉ်းစားရမည်ဖြစ်သည်။
ထိုနိုင်ငံလေးသည် လူဦးရေ ၁ ဒသမ ၃ သန်းသာရှိကာ ကမ္ဘောဒီးယားရှိ ကာစီနိုကွန်ရက်မှ စီးပွားရေး သမားတစ်ဦးနှင့် ချိတ်ဆက်မှုများဖြင့် ကျားဖြန့်များဝင်ရောက် နေရာယူလာခြင်းဖြစ်သည်။
ယင်းကမ္ဘောဒီးယား ကာစီနိုသူဌေးသည် မြ၀တီကျားဖြန့်လုပ်ငန်းတွင်လည်း ထင်ရှားသည့် ခေါင်းဆောင် 14K Triad ဂိုဏ်းခေါင်းဆောင် Wan Kuok-koi နှင့်စီးပွားဖက်ဖြစ်ကာ Wan Kuok-koi ကို အမေရိကန်မှ ပိတ်ဆို့အရေးယူမှု လုပ်ထားသည်။
ဖိလစ်ပိုင်၊ ထိုင်း၊ မြန်မာတို့တွင် ကျားဖြန့် နှိမ်နင်းမှုများရှိသည့် အတွက် ယင်းကျားဖြန့်များ အရှေ့တီမောသို့ ပြောင်းရွှေ့အခြေချခြင်းဖြစ်နိုင်ကြောင်းလည်း UNODC က အစီရင်ခံစားတွင် ရေးသားဖော်ပြခဲ့သည်။
ကိုကလင်း
Ref:Khaosod
#MeKongNews
#ကျားဖြန့်
#အရှေ့တီမော
#ကမ္ဘောဒီးယား
#ကာစီနို
#အိုအီဆက်ဆီဒေသ
