မဲခေါင်၊ စက်တင်ဘာ ၁၀
ကွမ်းယာထွက်ဝယ်သည့် ‘ဝ’ လူငယ်တစ်ဦးကို ရန်ကုန်တိုင်း၊ သာကေတမြို့နယ်အတွင်း အမည်မသိ လူတစ်စုက အတင်းအဓမ္မ ကားနှင့်ဖမ်းဆီးခေါ်ဆောင်သွားကြောင်း နီးစပ်သူများကို ကိုးကား၍ ‘ဝ’လူငယ်အသံ – Wa News Land က စက်တင်ဘာလ ၉ရက်တွင် ဖော်ပြသည်။
ဖမ်းဆီးခံရသူမှာ ရန်ကုန်တိုင်း၊ သာကေတမြို့နယ်ရှိ နတ်မောက် ဘုန်းတော်ကြီးသင် ပညာရေးကျောင်းတွင် နေထိုင်နေသည့် အသက် ၂၆ နှစ်အရွယ် ‘ဝ’တိုင်းရင်းသား မောင်ရွှေကပ်ဆိုသူ ဖြစ်ကြောင်း၊ ပြီးခဲ့သည့် စက်တင်ဘာလ ၇ ရက်၊ တနင်္ဂနွေနေ့ ညဘက် ၉ နာရီခွဲခန့်တွင် ကွမ်းယာဝယ်ရန် ထွက်သွားခဲ့ခြင်းဖြစ်ပြီး ၎င်းကို သုခ ( 5star ကားမှတ်တိုင်အနီး)တွင် ကားအမဲရောင်နှင့် အမည်မသိ လူ ၅ဦးက အတင်းအဓမ္မခေါ်ဆောင်သွားခဲ့ကာ ယခုအချိန်ထိ အဆက်အသွယ် မရရှိသေးကြောင်း သိရသည်။
၎င်းပျောက်ဆုံးမှုအတွက် မိဘဆွေမျိုးများနီးစပ်သူတွေက စိုးရိမ်နေရပြီး ၎င်းကို တွေ့ရှိပါက သာကေတမြို့နယ် နတ်မောက်ဘုန်းတော်ကြီးသင်ပညာရေးကျောင်း၊ ဖုန်း – 09660059533 သို့ အကြောင်းကြား ဆက်သွယ်ပေးကြရန် မေတ္တာရပ်ခံထားသည်။
ယင်းကိစ္စမှာ စစ်တပ်က လူမိုက်များကို အသုံးချပြီး လူဖမ်းကာ စစ်မှုထမ်းကို ငွေပေးထည့်နေသည့်မြို့ ရွာများသို့ ရောင်းစားနေခြင်းဖြစ်ကြောင်း တောင်ကြီးဒေသခံတစ်ဦးက ပြောသည်။
“ဟိုပုန်းက တပ်ဂိတ်ဆို လူဖမ်းရောင်းတာက သိန်းဆယ်ချီ၊ ရာချီ တွက်ချေကိုက်နေတော့ ခရီးသွားတွေထဲက လူငယ်လူရွယ်တွေကို ဖမ်းရောင်းနေတာ” ဟု ၎င်းက မဲခေါင်သို့ ပြောသည်။
ရန်ကုန် UG များဖြင့် ယင်းလူပြန်ပေးများကို နှိပ်ကွပ်နိုင်ရေး ကြိုးပမ်းနေသည်ဟု CDM ဗိုလ်ကြီးဇင်ယော်က ပြောသည်။
ရန်ကုန်မှ လူဖမ်းပြန်ပေးသမားများကို နှိမ်နင်းရန်အတွက် UG များ ယခင်ကဲ့သို့ ပြန်လည်လှုပ်ရှားနိုင်မှရမည်ဟု CDM တော်လှန်ရေးသမားတစ်ဦးကလည်း မှတ်ချက်ပြုသည်။
“မြို့ပြတွေမှာ UG တွေ အရင်လိုပြန်လှုပ်ရှားနိုင်မှ ပရမ်းပတာ အခြေအနေကို ဟန်ချက်ပြန်ထိမ်းနှိုင်လိမ့်မယ်။ ဒီလိုမှ မဟုတ်ရင် စစ်မှုထမ်း ခေါင်းစဥ်နဲ့ လူဖမ်း ပြန်ပေးဆွဲ ငွေညှစ်နေတဲ့ အုပ်ချုပ်ရေးမှုးတွေ ခေါင်းဆောင်တဲ့ ရပ်/ ကျေးအမည်ခံ ပျူစောထီးတွေ ၊ လူပြန်ပေးဆွဲရောင်းစားနေသူတွေလုပ်ချင်တိုင်းလုပ်တာကို ပြည်သူတွေအပြင်းအထန်ခံနေရလိမ့်မယ်။ ခံလည်းခံနေရပြီ” ဟု ၎င်းက ပြောသည်။
လက်ရှိရန်ကုန်မြို့အပါအဝင် နိုင်ငံအနှံတွင် စစ်ကောင်စီတပ်က လူငယ်များကို နေ့ညမရွေး ပေါ်တာဆွဲ ခေါ်ယူနေသည့် ဖြစ်စဥ်များ မကြာမခဏဆိုသလို ဖြစ်ပွားနေပြီး ငွေသိန်းဆယ်ချီပေးကာ ပြန်ရွေးယူနေရသည်။
စစ်ကောင်စီသည် စစ်မှုထမ်းအပတ်စဥ် ၁ကို ၂၀၂၄ခုနှစ်၊ ဧပြီလ၈ရက်က စတင်ဖွင့်လှစ်ခဲ့ရာ ပြီးခဲ့သည့် သြဂုတ်လ ၁၆ရက်က အပတ်စဥ်၁၆ကို ဖွင့်လှစ်ခဲ့ပြီး ယခုအခါ အပတ်စဥ် ၁၇အတွက် အပြင်းအထန် လူဖမ်းပြီး ရောင်းစားနေကြခြင်း ဖြစ်သည်။
Photo – Wa News Land
#MeKongNews
#ဝလူငယ်
#စစ်တပ်
#ပြန်ပေးဆွဲ
#လူမိုက်ဂိုဏ်း
