မဲခေါင်၊ စက်တင်ဘာ ၄
တရုတ်နိုင်ငံ ပေကျင်းမြို့၌ ဒုတိယကမ္ဘာစစ်ပြီးဆုံးခြင်း နှစ် ၈၀ ပြည့် အခမ်းအနားကျင်းပရာ အနောက်အင်အားစုများက မကောင်းဆိုးဝါးဝန်ရိုးတန် ၃ ဖော်ဟု ခေါ်ဆိုသော ရှီကျင်းဖျင်၊ ပူတင်နှင့် ကင်ဂျုံအန်တို့ ၃ ဦး အတူရှိနေခဲ့ကြသည့် လှုပ်ရှားပုံများကို Body Language – အမူအယာဖတ် ကျွမ်းကျင်သူများက ဖတ်ရှုလေ့လာအပြီး ရှီကျင်းဖျင်သည်သာ ၎င်းတို့ထဲ ဩဇာအာဏာအကြီးမားဆုံး၊ အဖအရာတွင်ရှိနေသလိုဖြစ်သည်ဟု သုံးသပ်ခဲ့ကြသည်။
မိနစ် ၇၀ ကြာကျင်းပခဲ့သည့် အဆိုပါ စစ်ရေးပြချီတက်မှုအခမ်းအနားတွင် လက်ဆွဲနှုတ်ဆက်ပုံ၊ အထူးဧည့်သည်တော်များအတွက် ကားပေါ်တက်ပုံ၊ နေရာယူကြပုံ၊ မျက်နှာသွင်ပြင်အနေအထားများ၊ လက်ဟန်ခြေဟန်များကိုကြည့်ခြင်းအားဖြင့် ရှီကျင်းဖျင်သည်သာ ခေါင်းကိုင်ဖခင်သဖွယ် ဩဇာအကြီး ဆုံးပုံစံရှိနေသည်ကို တွေ့ရသည်ဟု Body Language – အမူအယာဖတ်ရှုမှုကျွမ်းကျင်သူများက ဆိုသည်။
Body Language – အမူအယာဖတ်ရှုမှု ကျွမ်းကျင်သူ ဒါရင်းစတန်တွန်က ရှီကျင်းဖျင်သည် အိမ်ရှင်အဖြစ် ဦးဆောင်ရသည့် အခမ်းအနားတွင် အလွန်ကောင်းမွန်သော စီမံခန့်ခွဲမှုအစီအစဉ်အတိုင်း လုပ်ဆောင်နိုင်ခဲ့ကြောင်း၊ ၎င်း၏ တရုတ်သမ္မတအဖြစ် အာဏာစက်အကြီးမားဆုံးရှိနေသည်ကို တင်ပြ နိုင်ခဲ့ကြောင်း၊ အိမ်ရှင်ဖြစ်သောကြောင့် အဆုံးစွန်သော အာဏာသည် ရှီကျင်းဖျင်လက်ထဲတွင်သာ ရှိသည်ကို ပြသခြင်းဖြစ်သလို ပူတင်နှင့်ကင်ဂျုံအန်တို့အား ဘေးနှစ်ဖက် နှစ်ချက်မှ လိုက်ပါစေမှုများတွင်လည်း ရှေ့ဆုံးသို့ တိုးထွက်နေရာယူပြခြင်း၊ ပူတင်နှင့်ကင်ဂျုံအန်တို့ကလည်း နောက်မှလိုက်ရသည်ကို ဝမ်းမြောက်ကျေနပ်သည်ဆိုသော ဟန်အမူအယာများ ပြသကြကြောင်း၊ အနောက်အင်အားစုအတွက် မကောင်းသည့်အနေအထားမှာမူ ၎င်းတို့ ၃ ဦးအကြား အလွန်နွေးထွေး သွေးစည်းနေသည်ကို ပြသသွားခြင်းဖြစ်သည်ဟု သုံးသပ်ခဲ့သည်။
နောက်ထပ် Body Language – အမူအယာ ဖတ်ရှုမှုကျွမ်းကျင်သူ ဂျူဒီကလည်း ကင်ဂျုံအန်နှင့်ပူတင်အား ရှီကျင်းဖျင် လက်ဆွဲနှုတ်ဆက်နေပုံများသည် အဖအရာမှ ရှိနေသည့်အသွင်ဆောင်ကာ ညာလက်ဖြင့် လက်ဆွဲနှုတ်ဆက်စဉ် ဘယ်လက်ပါ ထပ်မံအုပ်မိုးပြီးနှုတ်ဆက်မှုသည် ၎င်းတို့အကြားအလွန်နီးစပ်မှု၊ သွေးစည်းမှု၊ နွေးထွေးမှုကို ပြသခြင်းဖြစ်သည်ဟု သုံးသပ်ခဲ့သည်။
ကင်ဂျုံအန်သည် ရှီကျင်းဖျင်နှင့် ယှဉ်ကြည့်သည့်အခါ မျက်လွှာကို မှေးထားသလို မှုန်ကုပ်ထားသည့်ဟန်ပန်အရ အာဏာစက်အားဖြင့် မယှဉ်သာမှုကို ပြသခြင်းဖြစ်သလို ပူတင်သည်လည်း ရှီကျင်းဖျင်နောက်မှ လိုက်ရခြင်းကို ကျေနပ်သည့် ပါးချိုင့်ပင်လုံးဝန်းစွာပေါ်နေသည့် မျက်နှာပေးဖြင့် လိုက်နေသည်ကို တွေ့ရသည်ဟု သုံးသပ်သွားခဲ့သည်။
ကိုကလင်း
#MeKongNews
#ရှီကျင်းဖျင်
#ပူတင်
#ကင်ဂျုံအန်
#မကောင်းဆိုးဝါးမဟာမိတ်
Ref: Thesun
