မဲခေါင်၊ ဩဂုတ် ၂၅
နယ်စပ်နှင့် ရေကြောင်းမှ ကုန်စည်တင်သွင်းလာမှုတို့ကို ထိန်းချုပ်ကန့်သတ်ထားသည့် စစ်ကောင်စီသည် လေကြောင်းမှတဆင့် ကုန်စည်တင်သွင်းလာမှုကိုပါ ပိတ်ပင်ကန့်သတ်လိုက်ကြောင်း လုပ်ငန်းရှင်များထံမှ သိရသည်။
ပြည်ပမှ ကုန်ပစ္စည်းများကို လိုင်စင်မရှိဘဲ ပါဆယ်ပုံစံဖြင့် တင်သွင်းလာမှုကို တင်းတင်းကြပ်ကြပ် စစ်ဆေးနေသည့်အတွက် Commercial Cargo Flight ဝန်ဆောင်မှုပေးသည့် လုပ်ငန်းအချို့ ရပ်နားလိုက်ရခြင်း ဖြစ်သည်။
ထိုင်းနိုင်ငံမှတဆင့် လေကြောင်းဖြင့် ထိုင်း-မြန်မာ ကုန်တင်လေယာဉ်ဝန်ဆောင်မှုပေးသည့် New Light Cargo လုပ်ငန်းက Commercial Cargo Flight ခေတ္တရပ်နားတော့မည်ဖြစ်ကြောင်း ဩဂုတ်လ ၂၃ ရက်နေ့တွင် ထုတ်ပြန်ခဲ့သည်။
လေကြောင်းမှတဆင့် တင်သွင်းမှုကို ကုမ္ပဏီလိုင်စင်ဖြင့် သွင်းကုန်၊ ထုတ်ကုန် လုပ်ဆောင်နေသည့် ကုမ္ပဏီများကိုမူ ခွင့်ပြုထားဆဲဖြစ်ကြောင်း Logistics လုပ်ငန်းရှင်တစ်ဦးက ပြောသည်။
“ကုမ္ပဏီလိုင်စင်နဲ့ import export လုပ်တာဆို ရတယ်။ Hand Carry နဲ့ သွင်းနေတာ ထုတ်နေတာကို ပိတ်တာပါ” ဟု ၎င်းက ပြောသည်။
Air Cargo ပုံစံဖြင့် ကုန်စည်တင်သွင်းလာမှုတို့ကို ထိန်းချုပ်ကန့်သတ်လာသည့် ပုံစံကြောင့် ကုန်စည်များ ဈေးမြင့်တက်လာဖွယ် ရှိနေပြီး သယ်ယူပို့ဆောင်ရေးစရိတ်မှာလည်း မြင့်တက်လာနိုင်ကြောင်း စီးပွားရေးလုပ်ငန်းရှင်တစ်ဦးက ဆိုသည်။
စစ်ကောင်စီသည် တရားမဝင်ကုန်သွယ်မှု တားဆီးရေးဟု ဆိုကာ ရှမ်းအရှေ့၊ ရှမ်းမြောက်၊ မြဝတီနှင့် ကော့သောင်း-ရနောင်းဘက်မှ ကုန်စည်တင်သွင်းလာမှုတို့ကို ထိန်းချုပ်ကန့်သတ်ပြီးနောက် ထပ်မံ၍ Air Cargo ဖြင့် ကုန်စည်တင်သွင်းလာမှုတို့ကို ကန့်သတ်လာခြင်း ဖြစ်သည်။
စစ်ကောင်စီသည် လေကြောင်းမှတဆင့် Cargo ဖြင့် ပို့ဆောင်သည့် ကုန်ပစ္စည်းများကိုသာ တင်းတင်းကြပ်ကြပ်စစ်ဆေးသည်သာမက လေကြောင်းခရီးသည်များ သယ်ဆောင်လာသည့် ပစ္စည်းများကိုလည်း တင်းတင်းကြပ်ကြပ်စစ်ဆေးပြီး ဖမ်းဆီးမှုများ ပြုလုပ်နေကြောင်း ၎င်းတို့ ဝါဒဖြန့်သတင်းစာများတွင် ဖော်ပြထားသည်။
ဖေသန်း
#MeKongNews
#AirCargo
#YangonAirPort
#Import #Trade
#ကုန်သွယ်ရေး
