မဲခေါင်၊ ဩဂုတ် ၁၉
ဩဂုတ် ၁၈ ရက်က အိမ်ဖြူတော်တွင် ယူကရိန်းသမ္မတ ဇီလန်းစကီး၊ အီးယူနှင့် နေတိုးအဖွဲ့ ခေါင်းဆောင်များ ဒေါ်နယ်ထရမ့်နှင့် တွေ့ဆုံဆွေးနွေးပြီးနောက် ယူကရိန်းငြိမ်းချမ်းရေး ၂ ပတ်အတွင်း ဇီလန်းစကီးနှင့် ပူတင်တို့ မျက်နှာချင်းဆိုင်ဆွေးနွေးတော့မည်ဟု ဂျာမန်အဓိပတိ ဖရိုင်းဒရစ်မာ့ဇ်က အတည်ပြုသွားခဲ့သည်။
ဩဂုတ် ၁၅ ရက်က အလက်စကားတွင် ထရမ့်နှင့်ပူတင်တို့ သမိုင်းဝင်ဆွေးနွေးမှုလုပ်ဆောင်ခဲ့ပြီး နောက် ယခု ဥရောပခေါင်းဆောင်းများနှင့်ဇီလန်းစကီးကို အိမ်ဖြူတော်သို့ ခေါ်ဆောင်ပြီး ထပ်မံ ဆွေးနွေးရာ ထရမ့်ထံမှ လုံခြုံရေးအာမခံချက်ရရှိခြင်းနှင့် စစ်အဆုံးသတ်နိုင်ရေးလိုအပ်ချက်ကြောင့် ပူတင်နှင့် မျက်နှာချင်းဆိုင်တွေ့ဆုံရန် အသင့်ဖြစ်နေပြီဟု ဇီလန်းစကီးက ပြောကြားခဲ့သည်။
၂၀၂၂ ခုနှစ်မှစတင်ပြီး ယူကရိန်းကို ရုရှားက ကျူးကျော်စစ်ဆင်နွှဲပြီးနောက် ရုရှားနှင့်ယူကရိန်း ကိုယ်စား လှယ်များ ငြိမ်းချမ်းရေးအတွက် အကြိမ်ကြိမ်တွေ့ဆုံဆွေးနွေးခဲ့ကြသော်လည်း မည်သည့်အောင်မြင်မှု မှ မရှိခဲ့ဘဲ ယခုမှ ထရမ့်ဦးဆောင်ကာ ၃ ပွင့်ဆိုင် ဆွေးနွေးမှုဖြင့် မကြာခင် စစ်ပွဲကြီး အဆုံးသတ်နိုင်မည့် ငြိမ်းချမ်းရေးစာချုပ် ချုပ်ဆိုသွားနိုင်တော့မည်ဟုလည်း အိမ်ဖြူတော်က ထုတ်ပြန်သည်။
ထရမ့်သည် ဇီလန်းစကီးနှင့် တစ်ယောက်ချင်းတွေ့ဆုံသလို ဥရောပခေါင်းဆောင်များနှင့်လည်း အိမ်ဖြူ တော်တွင် တွေ့ဆုံပြီးနောက် ပူတင်ထံ မိနစ် ၄၀ ကြာ ဖုန်းဆက်သွယ်ပြောဆိုအပြီး ၂ ပတ်အတွင်း ပူတင်နှင့်ဇီလန်းစကီးတို့ ငြိမ်းချမ်းရေးအတွက် မျက်နှာချင်းဆိုင်တွေ့ဆုံဆွေးနွေးရန် သဘောတူညီချက် ရခဲ့ခြင်းဖြစ်သည်။
မည်သည့်နေရာ မည်သည့်အချိန် ဇီလန်းစကီးနှင့်ပူတင်တို့ တွေ့ဆုံမည်ကိုမူ မသိရှိရ သေးပေ။
ကရင်မလင်နန်းတော် အကြီးအကဲတစ်ဦးဖြစ်သော ယူရီယူရှာကော့ဗ်ကလည်း ရုရှားနှင့် ယူကရိန်းငြိမ်းချမ်းရေးကိစ္စဆွေးနွေးနိုင်စေရန် နွေးထွေးစွာဆောင်ရွက်ပေးခဲ့သော ဒေါ်နယ်ထရမ့်အား ကျေးဇူးအထူးတင်ရှိကြောင်း ထုတ်ပြန်ပြောဆိုခဲ့သည်။
ဒေါ်နယ်ထရမ့်ကိုယ်တိုင်ကလည်း “စစ်ပွဲကြီး ပြီးတော့မှာပါ။ ဒီလူကြီးလူကောင်းကလည်း အဆုံးသတ် ချင်တယ်။ ပူတင်ကလည်း အဆုံးသတ်ချင်နေတယ်။ တစ်ကမ္ဘာလုံးကလည်း ဒီစစ်ပွဲပြီးဖို့ ဝိုင်းကြိုးစားပေးနေကြတယ်။ ကျွန်တော်တို့ အဆုံးသတ်ပေးနိုင်တော့မှာပါ” ဟု မီဒီယာများကို ပြောသွားခဲ့သည်။
ကိုကလင်း
Ref: Thesun
#MeKongNews
#ရုရှား
#ယူကရိန်း
#ငြိမ်းချမ်းရေးဆွေးနွေးပွဲ
#ဒေါ်နယ်ထရမ့်
