မဲခေါင်၊ ဩဂုတ် ၁၂
ဩဂုတ် ၁၀ ရက်နေ့ ဒေသစံတော်ချိန် ည ၈ နာရီတွင် ဩစတြေးလျနိုင်ငံ ဗစ်တိုးရီးယားပြည်နယ်၌ နေထိုင် ကြသူများသည် ကောင်းကင်ထက် မီးလုံးကြီးအဖြစ် ထိုးဆင်းလာသော ဥက္ကာပျံဟု ယူဆရသော အစိုင်အခဲတစ်ခု မြေပြင်ပေါ် ကျရောက်သောကြောင့် ကျယ်လောင်သော အသံကြီးကြားရသလို နေအိမ်များပင် လှုပ်ခါသွားသည်ကို ခံစားသိရှိခဲ့ရသည်။
လူမှုကွန်ရက်များပေါ်တွင် မျက်စိကျိန်းစပ်လောက်သည့် အလင်းတန်းမီးလုံးကြီး ပျံဝဲပြီး မြေပြင်ပေါ် ကျရောက်ပုံများ တင်နေကြကာ တစ်ဦးက ဒေးလက်စ်ဖို့ဒ်အရပ်အနီး ထိုဖြစ်စဉ်ဖြစ်ပွားကာ ယခင် မည်သူမျှ ထိုဖြစ်စဉ်မျိုး မမြင်ဖူးခဲ့ဟု ရေးသားဖော်ပြခဲ့သည်။
နောက်တစ်ဦးက ခင်ပွန်းဖြစ်သူသည် ထို မီးလုံးကြီးကို မြင်တွေ့ပြီး ကျရောက်ချိန်တွင် ကျယ်လောင်သောအသံနှင့်အတူ အိမ်ပါ လှုပ်ခါသွားသည် ဟု ရေးသားခဲ့သည်။
ယင်းမီးအလင်းတန်းကြီးကို မဲလ်ဘုန်းမြို့ကောင်းကင်ယံတွင် မြင်တွေ့ကြရပြီး မြေပေါ်ကျချိန်တွင် အလင်းဖြာထွက်မှုတစ်ချက်ဖြစ်ပြီးမှ ပျောက်ကွယ်သွားသည်ဟု ဆိုသည်။
မိုနက်ရှ်တက္ကသိုလ် ပရော်ဖက်ဆာ မိုက်ကယ်ဘရောင်းက အသံထက်မြန်သော ဗုံးတစ်လုံးပေါက်ကွဲသည့် အသံမျိုးဖြစ်ကာ အမှန်တကယ် ဥက္ကာပျံကျရောက်မှုဆိုလျှင် ကမ္ဘာနှင့်အလွန်နီးကပ်စွာ ပျံသန်းသည့် ဥက္ကာပျံ ပဲ့ထွက်ကာ ကြုံတောင့်ကြုံခဲ့ ကမ္ဘာမြေပေါ် ကျလာခြင်းမျိုးဖြစ်မည်ဟု သုံးသပ်ခဲ့သည်။
ဗစ်တိုးရီးယားအရပ်တွင် ကျောက်ခဲအမျိုးအစားပေါင်းများစွာ ရှိနေသည့်အတွက် ကျလာသော ဥက္ကာပျံကို ရှာဖွေတွေ့ရှိနိုင်ရေးမှာလည်း မလွယ်ကူသောကိစ္စဖြစ်ကြောင်း၊ မြေသို့ကျပြီးချိန်တွင် အဆိုပါ ဥက္ကာပျံ အပိုင်းအစများသည် စင်တီမီတာအရွယ်မျှအထိ မှုန်မွှားသွားမည်ဟု မိုက်ကယ်ဘရောင်းက သုံးသပ်ပြောဆိုခဲ့သည်။
လွန်ခဲ့သည့် ၃ ရက်က ပါ့သ်မြို့တွင်နေထိုင်သူများသည် ကောင်းကင်၌ တစ်စက္ကန့် ၂၁ မိုင်နှုန်းနှင့်ပျံသန်းနေသော ဥက္ကာပျံတစ်ခုကိုတွေ့ရှိခဲ့ရပြီး အနောက်တောင်ပိုင်းမြို့ ကောင်းကင်တွင် သမုဒ္ဒရာရေပြင် အထက် ၄၂ မိုင်အကွာ၌ လောင်ကျွမ်းပျောက်ကွယ်သွားသည်။
ကိုကလင်း
Ref: Thesun
#MeKongNews
#ဩစတြေးလျ
#ဥက္ကာပျံ
#ဗစ်တိုးရီးယားအရပ်
#မဲလ်ဘုန်း
