မဲခေါင်၊ ဩဂုတ် ၁၂
ဥရောပတစ်လွှားတွင် တောမီးများပျံ့နှံ့လောင်ကျွမ်းနေပြီး ဂရိနိုင်ငံ အေသင်မြို့တောင်ဘက် ကီရာတီယာဒေသတွင် ဧက ၁၆၀၀၀ မီးလောင်ကာ အနည်းဆုံး တစ်ဦး သေဆုံးခဲ့သည်ဟု သိရသည်။
ယင်းဒေသတစ်ဝိုက် ၃ ရက်ဆက်တိုက်တောမီးများလောင်ကျွမ်းနေခဲ့ကာ အိပ်ယာထဲမှ သက်ကြီးရွယ်အို အမျိုးသားတစ်ဦး သေဆုံးနေသည်ကို မီးသတ်သမားများက တွေ့ရှိခဲ့ခြင်းဖြစ်သည်။
လေပြင်းတိုက်ခတ်ခြင်းသည် ဩဂုတ် ၁၁ ရက်အထိ ရှိနေသည့်အတွက် မီးလောင်ကျွမ်းကူးစက်မှုများလည်း ရှိနေဦးမည်ဖြစ်ကာ လက်ဗ်ရီယိုမြို့တော်ဝန် ဒီမီထရစ်လောက်ကပ်စ်က ကီယာတီယာ ဒေသသို့ မီးသတ်သမား ၂၆၀၊ မီးသတ်ကား ၈၀ နီးပါး၊ မီးသတ်လေယာဉ် ၁၂ စီးစေလွှတ်ထားပြီး နေအိမ်များ၊ သစ်တောနှင့်စိုက်ပျိုးခင်များစွာ မီးလောင်ပျက်စီးခဲ့သည်ဟု ပြောကြားခဲ့သည်။
တောမီးသည် မြေထဲပင်လယ်တစ်ကြော ကူးစက်ပျံ့နှံ့နေသလို အီတလီတွင်လည်း ရဲရင့်သော မီးသတ် သမားများသည် အမျိုးသားဥယျာဉ် ဗက်ဆူဗီးယက်စ်တောင်ဆီသို့ ဦးတည်လောင်ကျွမ်းနေသော တောမီးအား အသည်းအသန်ငြိမ်သတ်နေရသည်။
နေပယ်မြို့အနီး မီးတောင်သို့ တောင်တက်ကြသူများ အားလုံးလည်း မတက်ကြရန် ပိတ်ပင်ကြောင်း ကြေညာထားရသည်။ အီတလီတောမီးသည် ဩဂုတ် ၈ ရက်နေ့ကတည်းကလောင်ကျွမ်းနေခြင်းဖြစ်သည်။
ပြင်သစ်နိုင်ငံတောင်ပိုင်း အူဒီဒေသတွင်လည်း ဆယ်စုနှစ်များအတွင်း အကြီးမားဆုံးတောမီးလောင်မှုကြောင့် မီးသတ်သမား ၁၄၀၀ ကျော်ကို ဩဂုတ် ၉ ရက်နေ့ကတည်းက စေလွှတ်ငြိမ်းသတ်ခိုင်းနေရပြီး တစ်ပတ်အတွင်း ၆၂ စတုရန်းမိုင်ကျယ်သော မီးလောင်ပြင်များ ဖြစ်ပေါ်ခဲ့သည်။
ပေါ်တူဂီနိုင်ငံ ထရန်ကိုဆိုရှိ ဆန်တာမာရီယာဒေသ ဆာအိုပီဒရိုအရပ်တွင်လည်း တောမီးများလောင်ကျွမ်းနေကာ မီးသတ်သမား ၃၀၀ ကျော်ဖြင့် ငြိမ်းသတ်နေရပြီး ယင်းဥရောပတောမီးများသည် တူရကီမှ စတင် လောင်ကျွမ်းကူးစက်လာခြင်းဖြစ်ကြောင်း သိရသည်။
မြေထဲပင်လယ်အရှေ့ပိုင်းဒေသများတွင် တောမီးကြောင့် အနည်းဆုံး ၁၇ ဦးသေဆုံးခဲ့ပြီးဖြစ်ကာ အပူချိန်သည် စံချိန်တင်အဖြစ် ၅၀ ဒီဂရီဆဲလ်စီးယက်စ်အထိ မြင့်တက်နေသည်။
ကိုကလင်း
Ref: Thesun
#MeKongNews
#ဥရောပ
#တောမီး
#ဂရိ
#လူသေဆုံး
