မဲခေါင်၊ သြဂုတ် ၇
ဆိုင်ကယ်ပျောက်သည့်အကြောင်း လူမှုကွန်ရက်ပေါ်တင်သူတစ်ဦးကို ဆိုင်ကယ်တွေ့နေ၍ ငွေယူလာရန် ဖုန်းဆက်ပြောပြီး ကူညီခ မပေးပါက ဆိုင်ကယ်ကိုမီးရှို့ပစ်ပြီး လာယူသူကို အန္တရာယ်ပြုမည်ဟု ဆဲရေး တိုင်းထွာမှုများ ပြုလုပ်ခဲ့ကြောင်း သိရသည်။
မိုင်းလားတွင် သြဂုတ် ၃ရက်က ဆိုင်ကယ်အသစ် ခိုးယူခံရသည်ကို ကျိုင်းတုံမှ ဆွေမျိုးတော်သူက ဖေ့စ်ဘွတ်ပေါ်တင်ခဲ့ရာ ယမန်နေ့ သြဂုတ်လ၆ရက်တွင် လူတစ်ဦးက ဆိုင်ကယ်တွေ့ထားပြီ၊ တာလေ၌ ဆိုင်ကယ် လာကြည့်ရန် ဖုန်းဖြင့် ဆက်သွယ်လာခြင်း ဖြစ်ကြောင်း သိရသည်။
ဆိုင်ကယ် လာကြည့်ရန် အချိန်တစ်နာရီခန့် ကြာမည်ကို မစောင့်နိုင်ဟု ပြောပြီး ၎င်းတို့အမည်ခံနှင့် ရွေးပေးထားမည်၊ ကူညီခ ကျပ်တစ်သိန်းလောက်တော့ ပေးရမည်ဟု တောင်းဆိုကြောင်း သိရသည်။
“သူတို့ပြောတာက သူခိုးရော ပစ္စည်းရော မိထားတယ်တဲ့။ အဖွဲ့စည်းတခုကလို့ သူတို့ကို သူတို့ ပြောတယ်။ ပြောတော့ ကျမအကိုဖြစ်သူက မေးတာပေါ့။ ဘယ်အဖွဲ့က ဖမ်းထားပေးလည်း မေးလို့တဲ့ စိတ်တိုပြီး ဆဲတယ်။ အကိုကလည်း လူလိမ်ဖြစ်မှာစိုးလို့ သေချာအောင်မေးတာ၊ အဲ့ဒါနဲ့ အပြန်လှန်ဆဲရော။ အကိုက ဆိုင်ကယ်လည်း မယူတော့ဘူး။ ရေစက်ချလိုက်ပြီ။ မင်းတို့ဘာသာ မင်းတို့ ဆိုင်ကယ်ကို ကြိုက်တာလုပ် လို့ ပြောလိုက်ပြီး ဖုန်းချလိုက်တယ်” ဟု ကိုယ်တွေ့ကြုံရသူက ပြောသည်။
သို့သော် လိမ်သည့်အဖွဲ့ဘက် ဖုန်းထပ်ဆက်လာပြီး ထပ်မံဆဲဆိုကြောင်း၊ Viber သုံးပါက ဆိုင်ကယ်ကို မီးရှို့ပြမည်ဟု ထပ်မံခြိမ်းခြောက်ခဲ့ကြောင်း သိရသည်။
“ဆိုင်ကယ်လိုချင်တယ်မလား ဟုမေးပြီး လာကြည့်ရဲရင် လာကြည့်လိုက်။ တစစီဖြစ်အောင် လုပ်လွှတ်လိုက်မှာ” ဟု ခြိမ်းခြောက်လာသဖြင့် ဖုန်းချသွားကြောင်း ၎င်းကပြောသည်။
တာချီလိတ်မှ အသိအား အကူအညီတောင်းပြီး တာလေသို့ စေလွှတ် ကြည့်ခိုင်းရာတွင်လည်း မတွေ့ရ ဟုဆိုသည်။
ကျိုင်းတုံ၊ တာချီလိတ်၊ မိုင်းလားတို့တွင် နေ့စဥ်လိုလို ဆိုင်ကယ်များ ပျောက်ဆုံးနေသော်လည်း ပြန်လည်ရရှိမှုမှာ အနည်းအကျဥ်းသာဖြစ်ပြီး ယခုလို ပျောက်သည့်ဆိုင်ကယ်တွေ့ထားပြီဆိုကာ လိမ်လည် ငွေတောင်းခံခြင်း၊ ဆဲရေးတိုင်းထွာခြင်း၊ ခြိမ်းခြောက်ခြင်းများကို မသမာသူအချို့က ဖုန်းဆက်ပြုမှုခြင်းများ ရှိနေကြောင်း သိရသည်။
#MeKongNews
#ကျိုင်းတုံ
#ဆိုင်ကယ်ပျောက်
#ချိန်းခြောက်ခံရမှု
#ငွေတောင်း
