မဲခေါင်၊ သြဂုတ် ၇

ရှမ်းပြည်မြောက်ပိုင်း၊ ကျောက်မဲမြို့နယ်၊ နောင်ပိန်တွင် ယမန်နေ့ မွန်းလွဲပိုင်းမှ စတင်ကာ မိုးသည်းထန်စွာ ရွာသွန်းမှုကြောင့် “လုပ်ပါကန်” ကျိုးပေါက်ပြီး ရေကြီးရေလျှံမှု ဖြစ်ပေါ်လျက်ရှိကြောင်း ဒေသခံများထံမှ သိရသည်။

သြဂုတ်လ ၆ ရက်၊ မွန်းလွဲပိုင်းမှ စ၍ နောင်ပိန်ဝန်းကျင်တွင် မိုးသည်းထန်စွာ ရွာသွန်းသဖြင့် လုပ်ပါကန် ကျိုးပေါက်ပြီး နောင်ပိန် အမှတ် ၅ ရပ်ကွက်၊ ရွှေလမင်းဆီဆိုင်ရှေ့ လမ်းမကြီးတွင် ရေကျော်ကာ ဖြတ်မောင်းသော ကွန်ဒါဖစ် ကားတစ်စီး ရေနှင့် မျောပါသွားပြီး ယာဉ်ပေါ်တွင် လူ၂ဦး ပါရှိသွား‌ကြောင်း သိရပါသည်။

ယင်းလမ်းမှာပင် ဆိုင်ကယ်တစ်စီးနှင့် ခြောက်ဘီးကားတစ်စီးလည်း မျောပါသွားခဲ့ကြောင်းသိရသည်။

“ဆိုင်ကယ်လူက ရေစီးထဲမပါသွားဘူး။ မနေ့ညနေက ရေစီးနဲ့မျောသွားတဲ့ ဟွန်ဒါဖစ်တစီး၊ ခြောက်ဘီးကားနဲ့ လူတယောက်ကို ရွာမကြီးဘက်အနီးမှာ အသက်ရှင်ရက် ပြန်တွေ့ခဲ့တယ်။ လူတစ်ယောက်တော့ ရှာနေဆဲပဲ။ ၅ ရပ်ကွက်မှာ ရေက လူတရပ်ကျော်ပါတယ်။ မိုးကလည်း ရွာနေဆဲပါ။ မိုးများ ရေတိုးပြီး ကန်ကျိုးပေါက်တာပါ။ ရေကြီးမှုက လွန်ခဲ့တဲ့ အနှစ် ၂၀ ကျော်က တခါဖြစ်ပါတယ်။ ယခုနေရာပါဘဲ။ အခုမှ ပြန်ဖြစ်တာ” ဟု ဒေသခံတစ်ဦးက မဲခေါင်ကို ယနေ့ သြဂုတ်လ၇ရက် နံနက်ပိုင်းတွင် ပြောသည်။

ယခုအခါ ကယ်ဆယ်ရေးများ အရေးပေါ်လိုအပ်နေပြီး ရေမကျမီ မော်တော်ကားနှင့် ဆိုင်ကယ်များ ဖြတ်မောင်းခြင်းမပြုကြပါရန် တားမြစ်ထားသည်။

ရေကြီးမှုဖြစ်စဉ်ကြောင့် ပြောင်းဖူးခင်း၊ ကြံခင်း ဧကပေါင်းများစွာ ရေနှစ်မြုပ်လျှက်ရှိပြီး ဆုံး ရှုံးမှုများနိူင်ကြောင်း သိရသည်။

နောင်ပိန် အမှတ်(၃)ရပ်ကွက်ရှိ အနိမ့်ပိုင်းအိမ်များလည်း ရေဝင်နစ်မြုပ်လျှက်ရှိပြီး မိုးဆက်ရွာသွန်းနေသဖြင့် အများပြည်သူများ သတိထားသွားလာကြရန် လိုအပ်ကြောင်းသိရသည်။

အလားတူ ယမန်နေ့ နံနက်ပိုင်းမှ စတင်၍ ယနေ့နံနက်ပိုင်းအထိ မိုးသည်းထန်စွာရွာသွန်းမှုကြောင့် ရှမ်းတောင်နှင့် ရှမ်းမြောက်နေရာအချို့၌ လမ်းရေကျော်ခြင်း၊ တောင်စောင်းများ ပြိုကျခြင်းရှိခဲ့ပြီး ယာဥ်များအခက်အခဲ ကြုံရကြောင်း စုံစမ်းသိရသည်။

ပင်လုံ-ဟိုပုံးကြားကျောက်တန်း လမ်းပိုင်း၌ တောင်ပြို၍ အတက်အဆင်းကားငယ်များ ၂ နာရီခန့် စောင့်ဆိုင်းပြီးမှ ဖြတ်သန်းခဲ့ရပြီး မိုင်းကိုင်-နမ့်လန်ကြားနေရာများ၌ လမ်းရေကျော်ခြင်း ရွံနွံမြေစေးများ လမ်းပေါ်ကျဆင်း၍ မောင်းနှင်သွားလာဖို့ ခက်ခဲခြင်းများကို ကြုံခဲ့ရကြောင်း ယာဥ်မောင်းများထံမှ စုံစမ်းသိရသည်။

ယနေ့နံနက်ပိုင်းအထိ ကျောက်မဲ၊ သီပေါ၊ လားရှိုး၊ နမ့်လန်ဒေသများ၌ မိုးများရွာသွန်းလျက်ရှိကာ သာစည်-နောင်ပိန်လမ်းကြောင်း၊ နမ့်လန်-ကျောက်ဂူလမ်းကြောင်းများ သွားလာရန် မလွယ်ကူနိုင်သေးဟု ယာဥ်မောင်းများက ပြောသည်။

မဟာ
#MeKongNews
#နောင်ပိန်
#ရေကြီးရေလျှံ
#ရှမ်းပြည်မြောက်ပိုင်း
#ရေထဲမျောပါ
#လုပ်ပါကန်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)