မဲခေါင်၊ ဩဂုတ် ၁
စစ်ကောင်စီ ပြန်လည်သိမ်းပိုက်ထားသည့် ရှမ်းပြည်မြောက်ပိုင်း၊ နောင်ချိုမြို့သို့ မြို့တွင် အမှန်တကယ် နေထိုင်သူ ဒေသခံအစစ်မှအပ ကျန်လူများ ဝင်ရောက်သွားလာခွင့်မရှိကြောင်း စစ်ကောင်စီမှ ကန့်သတ်ထားသည်ဟု ခရီးသည်တင်ယာဥ်လိုင်းများထံမှ သိရသည်။
ရှမ်းပြည် မှတ်ပုံတင် စိစစ်ရေးကဒ် ၁၃/ဖြစ်သူများပင်လျင် နေထိုင်ကြောင်း အထောက်အထား မပြနိုင်ပါက ပြင်ဦးလွင် အတက် ၁၆ မိုင် စစ်ဆေးရေးဂိတ်မှ ပေးမလွှတ်ဟု ယာဥ်မောင်းများက ပြောသည်။
“နောင်ချိုမှာ အမှန်တကယ်နေတဲ့အထောက်အထားမပါရင်၊ လုံးဝ မရဘူး။ ပြန်လွှတ်တယ်။ လူကုန်တားက အတိုင်ခံထားရတော့ နောင်ချို မှမကဘူး။ ပြင်ဦးလွင်နေသူ မဟုတ်ရင် မြို့ပေါ် ယာဥ်လိုင်း ကားတောင် သွားခွင့်မရဘူး။ ညှိပေးလည်းလတ်တလောတော့ မရဘူး” ဟု ဇူလိုင် ၃၁ရက်တွင် မဲခေါင်သို့ ပြောသည်။
ရှမ်းမြောက်သို့ တက်ရာတွင် နောင်ချိုလမ်းကို အသုံးမပြုနိုင်သဖြင့် ဂိတ်နည်းပါးသည့် အင်တော၊ ကျောက်ဂူလမ်းကို အသုံးပြုကြသော်လည်း မိုးတွင်း လမ်းအလွန်ဆိုး၍ ကားဗွက်နစ်သည်ကို ထွန်စက်ဖြင့် ဆွဲရခြင်း၊ ကားအပျက်များခြင်းတို့ကြောင့် တောင်ကြီး-လွိုင်လင်-မိုင်းရယ်-လားရှိုးလမ်း၊ နောင်ပိန်မှ သီပေါ ၉မိုင်လမ်းခွဲ နှင့် ဝက်ဝံ-ယင်းငိုပင်-ပလောင်ကျောင်း-ဇီးဖြူပင်-မိုင်းလုံ-ကျောက်မဲ-သီပေါ လမ်းတို့မှသာ သွားလာနေကြရကြောင်း သိရသည်။
“လမ်းမှာ ဂိတ်ပေါင်း ၄၄ ဂိတ်ရှိတယ်။ ဆက်ဆံရေး ကောင်းတာ၄ဂိတ်ပဲ ရှိပြီး ၅ ဂိတ်က အတော်ဆိုးတယ်။ ကျန်ဂိတ်တွေလည်း ပုံမှန်ဆိုတာက ၁၃/မဟုတ်ရင် ပိုပေးရတာပဲ။ ဆိုးတဲ့ဂိတ်တွေထက် နည်းတာပဲရှိတယ်။ အားလုံးပေးရတာပဲ” ဟု ပြောသည်။
ပုံမှန် ၁၃/ ဆိုပါက ကားတစ်စီးလုံး ၄ယောက်အပါမှ တစ်ဂိတ်လျှင် ကျပ်၅၀၀၀ သာပေးရသော်လည်း ၁၃/မဟုတ်ပါက လူတစ်ယောက်ကို တစ်ဂိတ်လျှင် ကျပ် ၂သောင်း မှ ငါးသောင်းအထိ တောင်းယူကြောင်း သိရသည်။
အဆိုးဆုံးဂိတ်များမှာ လွိုင်လင်မှ ကျေးသီးကြားရှိ ဂိတ်၅ဂိတ်ဖြစ်သည်ဟု ဆိုသည်။
“၄၄ဂိတ် ဆိုတာ စစ်တပ်ဂိတ်တွေချည်းပဲ။ တိုင်းရင်းသားတပ်ဂိတ်တွေကတော့ ရစ်တာမရှိဘူး။ ကုန်ကားတွေတော့ ပို အတောင်းကြမ်းတယ်” ဟု ပြောသည်။
လက်ရှိ ကားခများမှာ probox လိုကားမျိုး လူတစ်ဦးလျင် ၂သိန်းခွဲမှ ၃သိန်းခွဲအထိရှိပြီး အတက်တွင်သာ လူရပြီး အဆင်းလူ အရနည်းသဖြင့် လမ်းပေးရများသောကြောင့် ကားသမားအများစု တွက်ချေ မကိုက်ကြဟု ပြောသည်။
စစ်ကောင်စီသည် နောင်ချိုကို ဇူလိုင်၁၆ရက်က ပြန်လည်ရရှိပြီးနောက် လူအများပြန်လာနေထိုင်ရန် ဒန်ပေါက်ကျွေးခြင်း၊ မီးပေးခြင်းစသည့် ဆွဲဆောင်မှုများပြုလုပ်နေသော်လည်း ယမန်နေ့ ဇူလိုင်၃၀ရက်တွင် MNDAA တစိတ်တပိုင်း ထိန်းချုပ် ကွတ်ခိုင်ကို ဗုံးကြဲခြင်းနှင့် SSPP လှုပ်ရှားနယ်မြေ နောင်ပိန်ရှိ ဘုန်းကြီး ကျောင်းကို လက်နက်ကြီးနှင့် ပစ်ခတ်သဖြင့် ကိုရင်အပါအဝင် လူအများကို သတ်ဖြတ်ထားခြင်းကြောင့် စစ်ကောင်စီအသုံးချဝါဒဖြန့်သူများက လွဲ၍ ပြန်လာနေထိုင်ကြသူ နည်းပါးကြောင်း သိရသည်။
မဟာ
#MeKongNews
#နောင်ချို
#စစ်ကောင်စီ
#စစ်ဆေးရေးဂိတ်
#ပြင်ဦးလွင်
