မဲခေါင်၊ ဇူလိုင်၃၀
တိုက်ပွဲဖြစ်ပွားမှုမရှိသည့် ကွတ်ခိုင်မြို့ပေါ်ကို လေကြောင်းမှတိုက်ခိုက်ခြင်းသည် ခက်ခဲစွာပြုလုပ်ရရှိထားသည့် စစ်ပြေငြိမ်းရေး သဘောတူညီချက်ကို စစ်ကောင်စီဘက်မှ ပြင်းထန်စွာ ချိုးဖောက်လိုက်ခြင်းဟု MNDAA ယနေ့ ဇူလိုင်၃၀ရက်တွင် သတင်းထုတ်ပြန်သည်။
ဇူလိုင် ၃၀ ရက်၊ သန်းခေါင်ကျော် ၁၂ နာရီ ၅၃ မိနစ်တွင် စစ်ကောင်စီက အထူးဒေသ(၁) ကွတ်ခိုင်ခရိုင် အုပ်ချုပ်ရေးကော်မတီ၊ မဟာမိတ်တပ်မတော် (MNDAA) ကွတ်ခိုင် စစ်ဌာနတို့ရှိသည့် ကိုးကန့်မြို့ပေါ်ရှိ စစ်ရေးပစ်မှတ်မဟုတ်သော လူနေရပ်ကွက်တစ်ခုကို လေကြောင်းမှ တိုက်ခိုက်ခဲ့ရာ အပြစ်မဲ့အရပ်သား ၇ ဦး သေဆုံးပြီး ၁၃ ဦး ဒဏ်ရာရရှိခဲ့ကြောင်း၊ ဒဏ်ရာရရှိသူများတွင် အသက် ၂၀ အရွယ် တရုတ်နိုင်ငံသား တစ်ဦးလည်း ပါဝင်ခဲ့ကြောင်း ကိုးကန့်တပ်ဖွဲ့က ထုတ်ပြန်သည်။
ယင်းထုတ်ပြန်ချက်တွင် ပါရှိသည်များမှာ ယခုနှစ် အစောပိုင်းက တရုတ်အစိုးရ၏စေ့စပ်ညှိနှိုင်းမှုများဖြင့် မြန်မာအမျိုးသား ဒီမိုကရက်တစ်မဟာ မိတ်တပ်တော် (MNDAA) နှင့် မြန်မာ စစ်အာဏာရှင်အဖွဲ့ (SAC) တို့သည် တရုတ်ဘက်မှ တိုက်တွန်းမှုဖြင့် ကွန်မင်းမြို့၌ အကြိမ်ကြိမ် ဆွေးနွေးပြီးနောက် စစ်ပြေငြိမ်းရေး သဘောတူညီချက် – ဟိုင်ဂင်းသဘောတူစာချုပ် ချုပ်ဆိုခဲ့ကြောင်း၊ အထူးဒေသ(၁)တွင် စစ်ရပ်စဲခြင်းကို ရရှိခဲ့ပြီး အထူးဒေသ အုပ်ချုပ်ရေးကော်မတီသည် ဒေသခံပြည်သူများကို ဦးဆောင်ကာ စစ်ပြီးကာလ ပြန်လည်ထူထောင်ရေး လုပ်ငန်းများနှင့် ပြည်သူ့အသက်မွေးဝမ်းကျောင်းမှုဆိုင်ရာ စီမံကိန်းများကို အားဖြည့် ဆောင်ရွက်လျက်ရှိကြောင်းပါရှိသည်။
သို့သော်လည်း မြန်မာစစ်အာဏာသိမ်း တပ်ဖွဲ့များက မကြာသေးမီက ညအချိန်တွင် စစ်ပြီးကာလ ပြန်လည်တည်ဆောက်ရေးကို တက်ကြွစွာ ဆောင်ရွက်နေသည့် ကွတ်ခိုင်မြို့ကိုလေကြောင်း မှ တိုက်ခိုက်ခဲ့ခြင်းကြောင့် ပင်ကိုယ်အရ ခက်ခဲစွာရရှိထားသော စစ်ပြေငြိမ်းရေးသည် စစ်မက်၏ အရိပ်အာဝါသ ဖုံးလွှမ်းသွားခဲ့ပြီဟု ကိုးကန့်တပ်ဖွဲ့ကဆိုသည်။
အာဏာသိမ်း စစ်အုပ်စု၏ ယခုကဲ့သို့ လေကြောင်းမှ တိုက်ခိုက်မှုသည် MNDAA နှင့် ခက်ခဲစွာပြုလုပ်ရရှိထားသည့် စစ်ပြေငြိမ်းရေး သဘောတူညီချက်ကို ပြင်းထန်စွာ ချိုးဖောက်လိုက်ခြင်းဖြစ်ပြီး နှစ်ဖက်စလုံးမှ ရရှိထားသည့် စစ်ပြေငြိမ်းရေးဆိုင်ရာ ယုံကြည်မှုကို ပြင်းထန်စွာ ထိခိုက်စေခဲ့ကာ မြန်မာနိုင်ငံ ရှမ်းပြည်မြောက်ပိုင်း စစ်မီးပြန်လည်လောင်ကျွမ်းမှု အန္တရာယ်ကို တိုက်ရိုက် မြှင့်တင်လိုက်ခြင်းပင် ဖြစ်သည်ဟု ကိုးကန့်တပ်ဖွဲ့က ထုတ်ပြန်သည်။
လက်ရှိအချိန်တွင် MNDAA ဘက်မှ ကိစ္စရပ် ပိုမိုမဆိုးရွားလာစေရန် ထိန်းသိမ်းနိုင်စွမ်းကို ဆက်လက်ထိန်းသိမ်းထားပြီး တင်းတင်းမာမာရှိမနေဘဲ ထိန်းချုပ်မှုဖြင့် တုံ့ပြန်လျက်ရှိသည်ဟု ထုတ်ပြန်ချက်တွင် ဖော်ပြပါရှိသည်။
#MeKongNews
#ကိုးကန့်တပ်ဖွဲ့
#MNDAA
#စစ်ကောင်စီ
#လေကြောင်းတိုက်ခိုက်မှု
