မဲခေါင်၊ ဇူလိုင် ၃၀
ဇူလိုင် ၃၀ ရက် မနက်ပိုင်းတွင် ၂၀၁၁ ခုနှစ်နောက်ပိုင်း အကြီးမားဆုံးငလျင်လည်းဖြစ် ငလျင်သမိုင်း၌ ဆဌမမြောက်အကြီးမားဆုံး ငလျင်အဖြစ် ရုရှားနိုင်ငံ ကမ်ချပ်ကာ ကျွန်းဆွယ်အရှေ့ပိုင်း ပစိဖိတ် သမုဒ္ဒရာ အနက် ၁၂ မိုင်ကို ဗဟိုချက်အဖြစ် လှုပ်ခတ်ခဲ့သော ပြင်းအား ၈ ဒသမ ၈ ရှိငလျင်ကြီးကြောင့် ဝေလငါးကြီးများ ဂျပန်နှင့် ရုရှားတွင် သောင်တင်မှုများရှိခဲ့သည်။
ငလျင်သည် ကမ်းခြေဒေသများသို့ ၈၄ မိုင်အကျယ်အထိ ပြင်းထန်စွာလှုပ်ခတ်သွားခြင်းကြောင့် ပစိဖိတ်သမုဒ္ဒရာကမ်းခြေများရှိရာ ရုရှား၊ ဂျပန်၊ ဟာဝိုင်အီ၊ ကယ်လီဖိုးနီးယားနှင့် သမုဒ္ဒရာတွင်းမှ ကျွန်းနိုင်ငံများစွာတွင် ဆူနာမီသတိပေးချက်များ ထုတ်ပြန်ခဲ့ရပြီး ဆူနာမီ ပထမလှိုင်းအဖြစ် ရိုက်ခတ် မှုများ ရှိလာခဲ့သည်။
ထိုငလျင်နှင့် ဆူနာမီပထမလှိုင်းဖြစ်ပေါ်အပြီး ဂျပန်မီဒီယာများက ၎င်းတို့၏ ချီဘာစီရင်စု၊ တာတဲယာမ အရပ် ကမ်းခြေသောင်ပြင်စပ်တွင် ဧရာမ ဝေလငါးကြီး ၄ ကောင်၊ တစ်ကောင်နှင့်တစ်ကောင် ပေအနည်းငယ်သာ ဝေးပြီးသောင်တင်လူးလွန့်နေသည့် မြင်ကွင်းကို ရုပ်သံရိုက်ကူးဖော်ပြနိုင်ခဲ့သည်။
ယင်းတာတဲယာမ ကမ်းခြေတွင်မူ ဆူနာမီပထမလှိုင်း စိုးရိမ်စရာအဆင့် မရိုက်ခတ်ခဲ့ပေ။
၁၃ ပေအထိ ဆူနာမီလှိုင်းများ တိုက်ခတ်ခဲ့ရာ ရုရှားနိုင်ငံ ကမ်ချပ်ကာ ကျွန်းစွယ် ကမ်းခြေသောင်ပြင်တွင် လည်း နောက်ထပ် ဧရာမဝေလငါးကြီး ၅ ကောင်သည် ဆူနာမီကြောင့် ရေလှိုင်းကျသွားချိန် သောင်တင် ကျန်ရစ်ခဲ့သေးကြောင်း သိရသည်။
ကမ်ချပ်ကာတွင်မူ အနီးအနားရှိ လူများက အဆိုပါ ဝေလငါးကြီးများအား ရေများပက်ပေးခြင်းဖြင့် အသက်ရှင်သန်လွတ်မြောက်နိုင်ရန် ကယ်တင်နိုင်ရေး ကြိုးစားနေကြကြောင်း သိရသည်။
ဆူနာမီပထမလှိုင်းသည် ဂျပန်တွင် လှိုင်းအမြင့် သိပ်မများဘဲ ၄ ပေလောက်သာရှိသည့် လှိုင်းများကို ကမ်းခြေတစ်ဝိုက် မြင်တွေ့ရသေးသော်လည်း လူပေါင်း ၁ ဒသမ ၂ သန်း ရွှေ့ပြောင်းခိုင်းထားကာ ဖူကူရှီးမား နျူကလီးယားစက်ရုံမှ ဝန်ထမ်းများကိုလည်း ကြိုတင် ကယ်ထုတ်ထားရကြောင်း သိရသည်။
ခန့်မှန်း ထားမှုများအရ ရုရှား ကမ်ချပ်ကာအရပ်တွင် ဆူနာမီလှိုင်းအမြင့် ၁၃ ပေ၊ ဟာဝိုင်အီတွင် ၁၀ ပေအထိ လှိုင်းကြီးများစွာရိုက်ခတ်နိုင်ကြောင်း သိရသည်။
ကိုကလင်း
Ref:Thesun
#MeKongNews
#ရုရှားငလျင်
#ဆူနာမီ
#ဝေလငါး
#သောင်တင်
#ဂျပန်
