မဲခေါင်၊ ဇူလိုင် ၃၀
ရှမ်းပြည်တောင်ပိုင်း၊ အောင်ပန်းမြို့၊ မင်္ဂလာရပ်ကွက်ရှိ ‘ပ’လပ်မြေကို ကလောခရိုင်အုပ်ချုပ်ရေးမှူးက အငြိမ်းစားဗိုလ်ချုပ်ညွန့်တင် ဆိုသူကို ချထားပေးသည့်အတွက် မြို့နေလူထုက မကျေနပ်ကြကြောင်း ဒေသခံများက ပြောသည်။
ပြီးခဲ့သည့်ရက်ပိုင်းတွင် ကလောခရိုင်အုပ်ချုပ်ရေး ဦးစိုးမြင့်ဆိုသူက ၎င်း၏ ဆရာ ဗိုလ်ချုပ်ဟောင်း အတွက် အောင်ပန်းမြို့၊ မင်္ဂလာရပ်ကွက်ရှိ အများပြည်သူသွားလမ်းအဖြစ် အသုံးပြုနေသည့် မြေနေရာကို အုတ်တံတိုင်း ခြံခတ်ကာ ရယူခဲ့ခြင်းဖြစ်ကြောင်း သိရသည်။
“အဲလမ်းနေရာက ရှမ်းပြည်ကအကြီးဆုံး စကျင်ကျောက်တော်ကြီး ဘုရား၊ မဟာရွှေဘုရင် ဘုရားကြီးကုန်းကို လူထု ဖြတ်သန်း သွားလာအသုံးပြုနေတာ။ အရင်စစ်တပ်ခေတ်က အဲလိုပဲ လုပ်ခဲ့တာကို NLD အစိုးရခေတ်မှာ လူထုက ပြန်ရထားထားတာ။ ခုထပ်လုပ်ပြန်ပြီ” ဟု ဒေသခံတစ်ဦးက မဲခေါင်ကို ပြောသည်။
ယင်းမြေကိစ္စကို ပြုလုပ်သူ ခရိုင်မှူး ဦးစိုးမြင့် ဆိုသူမှာ စစ်တပ်မှ မိုးကျရွှေကိုယ်အဖြစ် ပြောင်းလာသည့် နှစ်သီးစားတစ်ဦး ဖြစ်ကြောင်း သိရသည်။
ယင်းအများပြည်သူဆိုင်သည့်နေရာကို တစ်ဦးပိုင်အဖြစ် ပြုလုပ်သည်ကို မင်္ဂလာရပ်ကွက် အုပ်ချုပ်ရေးမှူး ဇော်ထွန်းနှင့် အောင်ပန်းမြို့ဖွံ့ဖြိုးရေးကော်မတီတို့က မကန့်ကွက်ရဲသည်သာမက လိုက်ပါ ကူညီလုပ်ဆောင်နေကြကြောင်း သိရသည်။
“ခေတ်အရ လုပ်ကြတာဆိုပေမယ့် အများပြည်သူ သွားလာနေတဲ့ လမ်းနေရာတော့ မလုပ်သင့်ဘူး။ သူတို့က အချိန်တန်ပြောင်းသွားကြတာ။ သူတို့ လုပ်ချင်တာ လုပ်သွားကြတာကို ဒေသခံတွေပဲ ခါးစည်းခံကြရတာ။ ခုလည်း မကျေနပ်ပေမယ့် ပြောခွင့်မသာဘူး။ ပြောခွင့်သာတဲ့ တစ်ချိန်ကျ အရင်လိုပဲ ပြန်ရအောင်ယူမယ်။ လုပ်တဲ့သူတွေ ပါတဲ့သူတွေကတော့ သမိုင်းတရားခံတွေပေါ့” ဟု အောင်ပန်းဒေသခံတစ်ဦးက မဲခေါင်ကို ပြောသည်။
ယင်းမြေနေရာသည် အောင်ပန်းမှ တောင်ကြီး ပြည်ထောင်စုလမ်းမကြီးဘေး၊ ပျားမွေးမြူရေး ခြံဘေးတွင်တည်ရှိကာ ဦးအောင်ကိုဝင်းပိုင် Hotel SS အနီး ပေ ၄၀× ပေ ၅၀ အကျယ် ရှိပြီး ကာလတန်ကြေး ကျပ်သိန်း ၈၀၀၀ ခန့်ရှိကြောင်း ဒေသခံများထံက သိရသည်။
အောင်ပန်းတွင် လက်ရှိခရိုင်မှူး ရောက်ပြီးနောက်ပိုင်း လယ်ယာမြများကို သိန်းရာချီ ရယူကာ ပုံစံ ၁၀၅ နှင့် ဂရံများ ထုတ်ပေးသဖြင့် ရောင်းစားသူများပြားသည့်အတွက် ကုန်းလွင်နှင့် လှည်းရိုးကြား၊ ဆားဖိတ်တောင်အနီး ဝန်းကျင်မြေများ မကျန်သလောက်ဖြစ်ကာ ကလော၊ တောင်ကြီးအုပ်ချုပ်ရေးနှင့် မြေစာရင်းများ ပွပေါက်တိုးနေကြသည်ဟု ဒေသခံများက ပြောဆိုနေကြကြောင်း သိရသည်။
#MeKongNews
#အောင်ပန်း
#အများပိုင်မြေ
#မင်္ဂလာရပ်ကွက်
#ကလောခရိုင်
#ဦးစိုးမြင့်
